Butisyetap Jerusalem
Koolil lugeet. Kebut irimeet, kolaban Zedekiah ak kinam, koger lagokyik kemei, ak kieeny konyekyik ak korat eng' sirimwek. Kobeel nganaseet ak kibagakchi pichu mbareenik. Kityach Jeremiah eng' ng'atuutetap Nebukadnesar ineegei; koarorchini Kwandanyo Ebed-Melek saboonnyi amu koimang'u ineendet.
Ng'alaali Kwandanyo eng' mustarisyek 16–18
39 1Eng' kenyiitap sogool ne po laitornatetap Zedekiah laitoryatap Judah, eng' arawet ne po taman, konyo Nebukadnesar laitoryatap Babilon kobooto lugeennyi tugul kowendi Jerusalem ak koyiem. 2Eng' kenyiitap taman ak agenge ne po Zedekiah, eng' arawet ne po ang'wan, eng' peetuut ne po sogool ne po arawet, kebut nganaseet. 3Konyo anyun pounik tugul che po laitoryatap Babilon ak kobuur eng' Kurgeet ne po Kween: Nergal-Sharezer, Samgar-Nebo, Sarsekim Rab-saris, Nergal-Sharezer Rab-mag, ak pounik alak tugul che po laitoryatap Babilon. a a v3 Rab-saris ak Rab-mag ko ki kainaik che oo che po pounigap laitoryatap Babilon. 4Ye kingo keer Zedekiah laitoryatap Judah ak murenigap lugeet tugul icheek, komwei kobun nganaseet eng' kemeut, kobun mbareetap laitoryat, eng' kurgeet ne mi kwenutap irimoik aeng'; ak komanda kowendi Arabah. 5Ago ki oon lugeetap Babilon icheek ak konyoor Zedekiah eng' warengetap Jeriko. Ki nam ineendet ak komutyi Nebukadnesar laitoryatap Babilon eng' Ribla eng' emetap Hamath, ole ki kotil ineendet kirwooget. 6Ki eeny laitoryatap Babilon lagogap Zedekiah eng' Ribla eng' tainnyi, ak koeeny piik tugul che taagunotiin che po Judah. 7Yeityo koisto konyegap Zedekiah ak korat ineendet sirimwek che po kariik si koip Babilon.
8Ki beel Babiloniik koitap laitoryat ak kooriigap piik eng' maat, ak ki iluul irimoigap Jerusalem. 9Ki imut Nebusaradan kiptaiyatap riibiik koba Babilon piik alak che ki kagotep eng' nganaseet, ak piik che ki kagong'et koba kap ineendet, ak piik alak che ki kagotep. 10Ago ki pagaakta Nebusaradan kiptaiyatap riibiik piik alak che poorotiin miising' che ki ma tinyei kiy, eng' Judah, ak ki igoochi mbareenigap sabibuk ak mbareenik eng' peetuunooto.
11Ki kagong'at Nebukadnesar laitoryatap Babilon agobo Jeremiah eng' Nebusaradan kiptaiyatap riibiik, koleenji, 12“Nam ineendet ak iriip ineendet; amat iyai ineendet kiy ne ya, ago yai kiy age tugul ne soomei.”
13Kiyookto anyun Nebusaradan kiptaiyatap riibiik ng'olyoot, kobooto Nebushazban Rab-saris, Nergal-Sharezer Rab-mag, ak kiptainik tugul che oo che po laitoryatap Babilon. 14Ki imut icheek Jeremiah kobun katanit ne po riibiik ak ki igoochi Gedalia weeriitap Ahikam, weeriitap Shapan, si koip koo. Ki tebi anyun eng' kwenutap piik.
15Ki nyoonji ng'olyootap Kwandanyo Jeremiah ye ki kirat eng' katanit ne po riibiik, koleenji:
16“Ba imwachi Ebed-Melek Kusindet: Kale Kwanda ne po lugosyegap kipsengwet, Kwandap Israel: Keere, aibu ng'olyoogapnyu kowendi nganaseet ni agobo ne ya, ma agobo ne myee, ak eng' peetuunooto, koityi eng' taing'ung'. 17Ago asarin eng' peetuunooto, kole Kwandanyo; ma kiityin eunegap piik che iywei. 18Asarin iman; ma ibut rotwetap chok. Egu saboondang'ung' kakchinetap lugeet agobo inyee, amu kiyan anee, kole Kwandanyo.”