Jerusalem Tuongbü
Komlepbü sühkei. Sangnyu laang baekei, Zedekia bangan laphetkei, haoeibü shousi shuong haitibü hapan, nyek leilutian chinam yangmenei khühkei. Sangnyu wanei juokkei hoba shalebü shuong to sek shuong ngaikei. Nebukadnezar lolo ngühkhüma Jeremia leiyenkei; seneibü Bouei Ebedmelek to hao to maanglembü shanga haoeibü thu onkei.
39 1Jihuda Choba Zedekia songdakbü po güboubü, lit anboubüa, Babilon Choba Nebukadnezarei haoeibü mütshuong pendou yoa Jerusalem khulimbo louan kho komlepbei. 2Zedekiaei songdakbü po anthükche boubü, lit leiboubüa, lit güboubünyet, sangnyu kümthang hanyetkei. 3Kheijinei Babilon Choba yaangenbü shuong pendou louan Jenyu Koukhüna setkei: Nergal-Sharezer, Samgar-Nebo, Rab-saris Sarsekhim, Rab-mag Nergal-Sharezer, hoba Babilon Choba yaangenbü joubü shuong. a a v3 Rab-saris si Rab-mag kho Babilon chobabü yaangenbü shuong yoa yaangbü nyenhang shuong kikei. 4Ladang Jihuda Choba Zedekia hoba sepai shuong pendouei haoen hapbei, haoen chasem ka Choba bamang danko, ba nyi kanglanga kibü koukhüm danko sangnyu ka satkei; hoba hao Araba aeto haukei. 5Lausikei Babilonbü mütshuongei haoen shijung hauan Jerikho pholia Zedekia laphetkei. Haoenei hao lapan Hamat kaoa Ribla to Babilon Choba Nebukadnezar jungto leibakei, khünei haoei hao to matjem kukei. 6Babilon Chobaei Ribla to Zedekiaeibü shousi shuong hao hapbo haitikei, hoba Jihudabü yaangenbü shuong pendou haitikei. 7Kheijinei haoei Zedekiaeibü nyek leilutikei hoba Babilon to leila shanga chinam yangmenei hao khühkei.
8Babilonbü shuongei Choba chem hoba mütshuongeibü chem shuong khokei wana juokkei, hoba Jerusalem kümthang leilutikukei. 9Lombou shuong leiyeibou Nebuzaradanei sangnyua apyobü mütshuong joubü, hao jungto danjung haubü satenbü shuong, hoba thüngbü joubü mütshuong Babilon to langsentikei. 10Lombou shuong leiyeibou Nebuzaradanei aieikei akibü shalebü mütshuong atei Jihuda kaodaka apyokei, hoba kho chalou haoen la semlüh hoba sek kukei.
11Tou Babilon Choba Nebukadnezarei Jeremia shangabü lombou shuong leiyeibou Nebuzaradan danko ngühkhüm kuko laukei, 12“Hao leian hao küpjemashi; hao to amaibü tekümma, lausikei hao ai hilaje kho pendou kümashi.”
13Kheijinei lombou shuong leiyeibou Nebuzaradanei, Rab-saris Nebushazban, Rab-mag Nergal-Sharezer, hoba Babilon Choba yaangenbü thüka shuong pendou yoa ngühlang hautikei. 14Haoenei Jeremia lombou shuong khongmang ka leijung louan, chem to leila shanga Shapan shou Ahikameibü shou Gedalia ika kukei. Hibü haoei mütshuong yoa thüngkei.
15Jeremia lombou shuong khongmanga thüngan kijinei, seneibü Boueibü ngüh hao jungto loukei:
16“Hauan Kush bou Ebed-Melek to lenashi: Lakjaibü dan Bou, Israelbü Bouei hai lauda: Chühashi, ngei kü ngüh shuong ho sangnyu khulimbo maibü shanga ayingko, amaibü shanga sungbalabü, hoba kho chaloua khübü no thedanga tükdelabü. 17Lausikei kho chalou ngei no khümenlabü, dogo Bouei lauda; no hatbü müt shuong ik to khümbo akulabü. 18Ngei no khümenlabü; no inei atuonglabü. No ngo to maanglembüei, kaibü langkei no shanga soletbü peisilei tegü kilabü, dogo Bouei lauda.”
