ኤርምያስ 40

40 ¹የዘበኞች አለቃ ናቡዘረዳን ኤርምያስን በራማ ነጻ ካደረገው በኋላ ከአባታችን ዘንድ ወደ እርሱ የመጣው ቃል ይህ ነው፤ ይህም የሆነው ወደ ባቢሎን ይወሰዱ በነበሩት የኢየሩሳሌምና የይሁዳ ምርኮኞች ሁሉ መካከል በሰንሰለት ታስሮ ተወስዶ ሳለ ነበር። ²የዘበኞች አለቃም ኤርምያስን ወስዶ እንዲህ አለው፤ “አምላክህ በዚህ ስፍራ ላይ ይህን መዓት አስቀድሞ ተናግሮ ነበር። ^a a v2 እነዚህ ቃላት የተነገሩት በባቢሎናዊ አዛዥ እንጂ ከእግዚአብሔር ወገኖች በአንዱ አይደለም፤ ስለዚህ እግዚአብሔርን የፍርድ አምላክ አድርጎ ይጠራዋል እንጂ አባት ብሎ አይደለም፤ ይህ ቅርበት የእግዚአብሔር ልጆች ነውና። ³እነሆ፣ እግዚአብሔር አመጣው፤ እንደ ተናገረውም ፈጸመ፤ ይህ የደረሰባችሁ ሁላችሁ በእግዚአብሔር ላይ ኀጢአት ሠርታችሁ ስላልታዘዛችሁት ነው። ⁴እነሆ፣ ዛሬ በእጅህ ላይ ካለው ሰንሰለት ነጻ አደርግሃለሁ። ከእኔ ጋራ ወደ ባቢሎን መምጣት መልካም መስሎ ቢታይህ ና፤ እኔም እጠብቅሃለሁ። ባይሆን ግን አትምጣ፤ እነሆ፣ ምድሪቱ ሁሉ በፊትህ ናት፤ መልካምና የተገባ መስሎ ወደ ታይህ ስፍራ ሂድ።” ⁵ኤርምያስ ገና ሳይሄድ ናቡዘረዳን፣ “የባቢሎን ንጉሥ በይሁዳ ከተሞች ላይ ወደ ሾመው ወደ ሳፋን ልጅ ወደ አሂቃም ልጅ ወደ ጎዶልያስ ተመለስ፤ በሕዝቡ መካከል ከእርሱ ጋራ ተቀመጥ፤ ወይም መልካም መስሎ ወደ ታይህ ሁሉ ሂድ” አለው። ከዚያም የዘበኞች አለቃ ስንቅና ስጦታ ሰጥቶ አሰናበተው።

⁶ኤርምያስም ወደ ምጽጳ ወደ አሂቃም ልጅ ወደ ጎዶልያስ ሄደ፤ በምድሪቱ ውስጥ ከቀሩት ሕዝብ ጋራ ከእርሱ ዘንድ ተቀመጠ።

ጎዶልያስ ቀሪውን ሕዝብ ሰበሰበ

⁷በሜዳ የነበሩት የጦር አለቆች ሁሉና ሰዎቻቸው፣ የባቢሎን ንጉሥ አሂቃም ልጅ ጎዶልያስን በምድሪቱ ላይ እንደ ሾመውና ወደ ባቢሎን ያልተማረኩትን የምድሪቱን ድኾች ወንዶች፣ ሴቶችና ሕፃናት በአደራ እንደ ሰጠው በሰሙ ጊዜ፣ ⁸ወደ ምጽጳ ወደ ጎዶልያስ መጡ፤ እነርሱም የናታንያ ልጅ እስማኤል፣ የቃሬ ልጆች ዮሐናንና ዮናታን፣ የተንሁመት ልጅ ሠራያ፣ የኔጦፋታዊው የኤፋይ ልጆችና የመዓካታዊው ልጅ ይአዛንያ ነበሩ፤ እነርሱና ሰዎቻቸውም መጡ። ⁹የሳፋን ልጅ የአሂቃም ልጅ ጎዶልያስም ለእነርሱና ለሰዎቻቸው እንዲህ ብሎ ማለላቸው፤ “ባቢሎናውያንን ለማገልገል አትፍሩ። በምድሪቱ ተቀመጡ፤ የባቢሎንን ንጉሥ አገልግሉ፤ መልካምም ይሆንላችኋል። ^b b v9 በዕብራይስጡ፦ ከለዳውያን፤ እዚህ ላይ የባቢሎንን ሹማምትና ወታደሮች ለማመልከት የገባ ነው። ¹⁰እኔም ወደ እኛ በሚመጡት ባቢሎናውያን ፊት እናንተን ወክዬ በምጽጳ እቀመጣለሁ። እናንተ ግን የወይን ጠጅ፣ የበጋ ፍሬና ዘይት ሰብስቡ፤ በማሰሮዎቻችሁም አከማቹ፤ በያዛችኋቸውም ከተሞች ተቀመጡ።”

¹¹በሞዓብ፣ በአሞን፣ በኤዶምና በየአገሩ ሁሉ የነበሩት አይሁድ ሁሉ ደግሞ፣ የባቢሎን ንጉሥ በይሁዳ ቀሪ ሕዝብ እንዳስቀረና የሳፋን ልጅ የአሂቃም ልጅ ጎዶልያስን በእነርሱ ላይ እንደ ሾመ ሰሙ። ¹²አይሁድ ሁሉ ተበትነው ከነበሩበት ስፍራ ሁሉ ተመለሱ፤ በይሁዳ ወዳለው ወደ ምጽጳ ወደ ጎዶልያስ መጡ፤ እጅግ ብዙ የወይን ጠጅና የበጋ ፍሬም ሰበሰቡ።

¹³የቃሬ ልጅ ዮሐናንና በሜዳ የነበሩት የጦር አለቆች ሁሉ ወደ ምጽጳ ወደ ጎዶልያስ መጡ፤ ¹⁴እንዲህም አሉት፤ “የአሞን ንጉሥ በኣሊስ ይገድልህ ዘንድ የናታንያን ልጅ እስማኤልን እንደ ላከ አታውቅምን?” የአሂቃም ልጅ ጎዶልያስ ግን አላመናቸውም።

¹⁵የቃሬ ልጅ ዮሐናንም በምጽጳ ጎዶልያስን በስውር እንዲህ አለው፤ “እባክህ የናታንያን ልጅ እስማኤልን ልግደለው፤ ማንም አያውቅም። ለምን ነፍስህን ይወስዳል? ወደ አንተ የተሰበሰቡትም አይሁድ ሁሉ ተበትነው የይሁዳ ቀሪ ሕዝብ ለምን ይጠፋል?”

¹⁶የአሂቃም ልጅ ጎዶልያስ ግን የቃሬን ልጅ ዮሐናንን፣ “ይህን ነገር አታድርግ፤ ስለ እስማኤል የምትናገረው ሐሰት ነው” አለው።