ኤርምያስ 41

41 ¹በሰባተኛው ወር የኤሊሳማ ልጅ የሆነው የናታንያ ልጅ እስማኤል፣ ከንጉሣዊ ዘር የተወለደና የንጉሥ ከፍተኛ ሹም የሆነው፣ ከዐሥር ሰዎች ጋር ወደ አሂቃም ልጅ ወደ ጎዶልያ ምጽጳ መጣ። በዚያም በምጽጳ አብረው ምግብ በሉ። ²የናታንያ ልጅ እስማኤልና ከእርሱ ጋር የነበሩት ዐሥሩ ሰዎች ተነሥተው የሻፋን ልጅ የሆነውን የአሂቃምን ልጅ ጎዶልያን በሰይፍ መቱት፤ የባቢሎን ንጉሥ በምድሪቱ ላይ የሾመውን ሰው ገደሉት። ³እስማኤልም በምጽጳ ከጎዶልያ ጋር የነበሩትን አይሁድ ሁሉ፣ በዚያም የተገኙትን የባቢሎን ወታደሮች፣ ተዋጊዎቹን ገደለ።

⁴ጎዶልያ ከተገደለ በኋላ በሁለተኛው ቀን፣ ማንም ገና ይህን ሳያውቅ፣ ⁵ጢማቸውን የተላጩ፣ ልብሳቸውን የቀደዱ፣ ሰውነታቸውንም የተተለተሉ ሰማንያ ሰዎች ከሴኬም፣ ከሴሎና ከሰማርያ የእህል ቍርባንንና ዕጣንን ይዘው ወደ አባታችን ቤት መጡ። ⁶የናታንያ ልጅ እስማኤል ሊቀበላቸው እያለቀሰ ከምጽጳ ወጣ። በተገናኛቸውም ጊዜ፣ “ወደ አሂቃም ልጅ ወደ ጎዶልያ ኑ” አላቸው። ⁷ወደ ከተማዪቱ መካከል በገቡም ጊዜ የናታንያ ልጅ እስማኤልና ከእርሱ ጋር የነበሩት ሰዎች ገደሏቸው፤ ወደ ጕድጓዱም መካከል ጣሏቸው። ⁸ከእነርሱ ዐሥሩ እስማኤልን፣ “አትግደለን፤ በእርሻው ተሸሽጎ ስንዴ፣ ገብስ፣ ዘይትና ማር አለን” አሉት። ስለዚህ ተዋቸው፤ ከሌሎቹ ጋር አልገደላቸውም።

⁹እስማኤል የገደላቸውን ሰዎች በድን ሁሉ የጣለበት ጕድጓድ፣ ንጉሥ አሳ የእስራኤልን ንጉሥ ባኦስን ፈርቶ የሠራው ትልቁ ጕድጓድ ነበረ። የናታንያ ልጅ እስማኤል በሙታን ሞላው።

¹⁰እስማኤልም በምጽጳ የቀሩትን ሕዝብ ሁሉ፣ የንጉሡን ሴቶች ልጆችና በምጽጳ የቀሩትን ሁሉ ማረከ፤ እነርሱም የጠባቂዎች አለቃ ናቡዘረዳን ለአሂቃም ልጅ ለጎዶልያ የተዋቸው ነበሩ። የናታንያ ልጅ እስማኤል ማረካቸው፤ ወደ አሞናውያንም ለመሻገር ተነሣ።

¹¹የካሬ ልጅ ዮሐናንና ከእርሱ ጋር የነበሩት የጦር አለቆች ሁሉ፣ የናታንያ ልጅ እስማኤል ያደረገውን ክፋት ሁሉ በሰሙ ጊዜ፣ ¹²ሰዎቹን ሁሉ ይዘው የናታንያን ልጅ እስማኤልን ሊዋጉ ሄዱ፤ በገባዖንም ባለው ታላቅ ኵሬ አጠገብ አገኙት። ¹³ከእስማኤል ጋር የነበሩት ሰዎች ሁሉ የካሬን ልጅ ዮሐናንንና ከእርሱ ጋር የነበሩትን የጦር አለቆች ሁሉ ባዩ ጊዜ ደስ አላቸው። ¹⁴ስለዚህ እስማኤል ከምጽጳ የማረካቸው ምርኮኞች ሁሉ ተመልሰው ወደ ካሬ ልጅ ወደ ዮሐናን ሄዱ። ¹⁵የናታንያ ልጅ እስማኤል ግን ከስምንት ሰዎች ጋር ከዮሐናን አመለጠ፤ ወደ አሞናውያንም ሄደ።

¹⁶ከዚያም የካሬ ልጅ ዮሐናንና ከእርሱ ጋር የነበሩት የጦር አለቆች ሁሉ፣ እስማኤል የአሂቃምን ልጅ ጎዶልያን ከገደለ በኋላ ዮሐናን ከናታንያ ልጅ ከእስማኤል ነጥቆ ያዳናቸውን የቀሩትን ሕዝብ ከምጽጳ ይዘው ሄዱ፤ እነርሱም ከገባዖን የተመለሱት ወታደሮች፣ ሴቶች፣ ልጆችና ሹማምት ነበሩ። ¹⁷ተነሥተውም ወደ ግብፅ አቅንተው በቤተ ልሔም አጠገብ ባለው ጌሩት ኪምሃም ቆሙ፤ ¹⁸ይህም የሆነው ባቢሎናውያንን ስለ ፈሩ ነበር፤ ምክንያቱም የናታንያ ልጅ እስማኤል የባቢሎን ንጉሥ በምድሪቱ ላይ የሾመውን የአሂቃምን ልጅ ጎዶልያን ገድሎ ነበር።