Báhonda Gedaliya ku Misipa
Isimayeli wádya madya hakimosi yi Gedaliya, kunima wámuhonda yandi yi batu boosu bana bakala yi yandi, amana wáhonda batu makumi nana bana bakala nata makabu, amana wábasisa kiziba ni bamvumbi. Yowani wáhulula batu ba boloku; Isimayeli wátina. Kikuma kya bweya bwa mana Babiloni kahanga mu dyambu dyadi, ndambu yina yásala yákatuka ku kwenda ku Ngiphiti.
41 1Muna ngonda ya tsambwadi, Isimayeli mwana wa Netaniya, mwana wa Elisama, wa butuka dya kyamvu amana mbuta wa basadi ba kyamvu, wísa yi batu kumi kwena Gedaliya mwana wa Ahikami ku Misipa. Kwakuna bádya madya hakimosi ku Misipa. 2Isimayeli mwana wa Netaniya wátelama, hakimosi yi batu kumi bana bakala yi yandi, amana bábeta Gedaliya mwana wa Ahikami, mwana wa Safani, ni mbedi ya phoku, bámuhonda, mutu wuna kyamvu wa Babiloni káheka mu kuyala tsi. 3Isimayeli wáhonda phi Bayuta boosu bana bakala yi Gedaliya ku Misipa, amana baphumbulu ba Babiloni bana bakala kwakuna, batu ba mvita.
4Muna kilumbu kya zodi kunima dya kuhonda Gedaliya, hana khaku mutu wosu kazaya dyambu dina, 5batu makumi nana ba ku Sikemi, ku Silo yi ku Samadiya bísa, mwevu mya bawu mavuka, miledi mya bawu myayatuka, lutu lwa bawu luzenga, mu kunata makabu ma ngenza yi pfwabidi kuna nzu ya Tata wetu. 6Isimayeli mwana wa Netaniya wákatuka ku Misipa mu kwenda kubatundakana, kakala dila buna kakala kwenda. Buna kábatundakana wubazimbwadi: «Alwisenu kwena Gedaliya mwana wa Ahikami.» 7Buna bátula hana kati dya mbanza, Isimayeli mwana wa Netaniya yi batu bandi bábahonda, mu kubatimbula hana kati dya kiziba. 8Kumi ku bawu bámuzimbwala Isimayeli: «Kutuhondaku, twenina yi bule, odizi, masi yi bwiki byaswekama mu kilanga.» Buna wábasisa, konda kubahonda yi bakwawu.
9Kiziba kina Isimayeli kátimbula lutu lwa batu boosu bana káhonda, kyákala kiziba kineni kina kyamvu Aza kásala kikuma kábanga Baasa kyamvu wa Isayeli. Isimayeli mwana wa Netaniya wákizadisa ni bamvumbi.
10Isimayeli wákwata batu boosu bana básala ku Misipa, bana ba bakhetu ba kyamvu, batu boosu bana básala ku Misipa, bana Nebuzaladani, pfumu wa batsinzidi, kásya ha moku ma Gedaliya mwana wa Ahikami. Isimayeli mwana wa Netaniya wábakwata amana wáyandika mu kuhyokila kwena bisi Amoni.
11Buna Yohanani mwana wa Kaleya yi bapfumu boosu ba baphumbulu bana bakala yi yandi báyuka mambu moosu ma mbi mana Isimayeli mwana wa Netaniya káhanga, 12bábonga batu boosu, bénda mu kunwana yi Isimayeli mwana wa Netaniya, bámuwana kuna kiziba kineni ku Ngibeyoni. 13Buna batu boosu ba Isimayeli bámona Yohanani mwana wa Kaleya yi bapfumu boosu ba baphumbulu bana bakala yi yandi, básangwala. 14Buna batu boosu bana Isimayeli kakwáta ku Misipa bávutuka amana bénda kwena Yohanani mwana wa Kaleya. 15Kaasi Isimayeli mwana wa Netaniya wátina Yohanani yi batu nana amana wenda kwandi kwena bisi Amoni.
16Buna Yohanani mwana wa Kaleya yi bapfumu boosu ba baphumbulu bana bakala yi yandi bábonga ku Misipa batu boosu bana básala, bana Yohanani kákatula kwena Isimayeli mwana wa Netaniya kunima dya Isimayeli kuhonda Gedaliya mwana wa Ahikami, baphumbulu, bakhetu, bana yi basadi, bana kávutula tuka ku Ngibeyoni. 17Báyandika mu kwenda amana básala ku Geluti-Kimami bela-bela yi Betelemi, bakala kwenda ku Ngiphiti, 18mukuma bakala banga bisi Babiloni, kikuma Isimayeli mwana wa Netaniya káhonda Gedaliya mwana wa Ahikami, wuna kyamvu wa Babiloni káheka mu kuyala tsi.
