ጎዳልያ ኣብ ምፅጳ ተቐተለ

እስማኤል ምስ ጎዳልያ እንጀራ በሊዑ፥ ንእኡን ንዅሎም እቶም ምስኡ ዝነበሩን ቀተሎም፥ መባእ ፆይሮም ዝመፁ ሰማንያ ሰባት ሓረዶም፥ ጕድጓድ ድማ ብምዉታት መልኦ። ዮሃናን ነቶም ምሩኻት ኣድሓኖም፤ እስማኤል ግና ኣምለጠ። እቲ ተረፍ ድማ ባቢሎን ብዛዕባ እዙይ ዝገብሮ ፈሪሑ፥ ናብ ግብፂ ኣምሪሑ ኸደ።

ምዕራፍ 41።

ኣብ ሻውዓይ ወርሒ ድማ ካብ ዘርኢ ንጉስ ዝኾነን ሓደ ኻብ ዓበይቲ ሹማምንቲ ንጉስን ዝኾነ እስማኤል ወዲ ነታንያ ወዲ ኤሊሳማ፥ ምስ ዓሰርተ ሰባት ናብ ጎዳልያ ወዲ ኣሒቃም ኣብ ምፅጳ መፀ። ኣብኡ ኸዓ ኣብ ምፅጳ ብሓባር እንጀራ በልዑ። እስማኤል ወዲ ነታንያን እቶም ምስኡ ዝነበሩ ዓሰርተ ሰባትን ድማ ተሲኦም፥ ንጎዳልያ ወዲ ኣሒቃም ወዲ ሻፋን ብሰይፊ ወቒዖም ቀተልዎ፤ ነቲ ንጉስ ባቢሎን ኣብ ልዕሊ እታ ምድሪ ዝሾሞ ሰብ ድማ ቀተልዎ። እስማኤል ከዓ ነቶም ምስ ጎዳልያ ኣብ ምፅጳ ዝነበሩ ኵሎም ኣይሁድን ነቶም ኣብኡ ዝተረኽቡ ተዋጋእቲ ባቢሎናውያን ወታደራትን ቀተሎም።

ጎዳልያ ምስ ተቐተለ ኣብ ካልአይቲ መዓልቲ፥ ገና ሓደ እኳ እንተይፈለጠ፥ ሰማንያ ሰባት ካብ ሴኬምን ካብ ሴሎን ካብ ሰማርያን፥ ጭሕሞም ተላፂዮም፥ ክዳውንቶም ቀዲዶም፥ ሰብነቶም ባሕጭሮም፥ መባእን ዕጣንን ናብ ቤት ኣቦና ፆይሮም መፁ። እስማኤል ወዲ ነታንያ ድማ ክቕበሎም ካብ ምፅጳ እናበኸየ ወፀ። ምስ ረኸቦም ከዓ “ናብ ጎዳልያ ወዲ ኣሒቃም ንዑ” በሎም። ናብ ማእኸል እታ ኸተማ ምስ ኣተዉ ድማ፥ እስማኤል ወዲ ነታንያን እቶም ምስኡ ዝነበሩ ሰባትን ቀቲሎም ናብ ማእኸል ጕድጓድ ደርበይዎም። ካብኣቶም ዓሰርተ ሰባት ግና ንእስማኤል “ኣብ ግራት ዝተሓብአ ስርናይን ስገምን ዘይትን መዓርን ኣለና እሞ፥ ኣይትቕተለና” በልዎ። ንሱ ኸዓ ምስቶም ካልኦት እንተይቀተሎም ሓደጎም።

እቲ እስማኤል ኵሎም ሬሳታት እቶም ዝቐተሎም ሰባት ዝደርበየሉ ጕድጓድ ከዓ፥ እቲ ንጉስ ኣሳ ንባኦስ ንጉስ እስራኤል ፈሪሑ ዝሰርሖ ዓብዪ ጕድጓድ እዩ ነይሩ። እስማኤል ወዲ ነታንያ ድማ ብምዉታት መልኦ።

እስማኤል ድማ ነቶም ኣብ ምፅጳ ዝተረፉ ኵሎም ህዝቢ፥ ነተን ኣዋልድ ንጉስን ነቶም ኣብ ምፅጳ ዝተረፉ ኵሎምን ማረኾም፤ ንሳቶም እቶም ሓለቓ ዘብዐኛታት ነቡዛርዳን ንጎዳልያ ወዲ ኣሒቃም ዝኣመኖም እዮም። እስማኤል ወዲ ነታንያ ኸዓ ማሪኹ ናብ ደቂ ኣሞን ክሳገር ወፀ።

ዮሃናን ወዲ ቃሬን እቶም ምስኡ ዝነበሩ ኵሎም ኣሕሉቕ ሰራዊትን ድማ፥ ነቲ እስማኤል ወዲ ነታንያ ዝገበሮ ኵሉ ክፉእ ምስ ሰምዑ፥ ንዅሎም እቶም ሰባት ወሲዶም ንእስማኤል ወዲ ነታንያ ክዋግእዎ ኸዱ፤ ኣብ ገባዖን ድማ ኣብቲ ዓብዪ ቓላይ ረኸብዎ። ኵሎም እቶም ምስ እስማኤል ዝነበሩ ህዝቢ ድማ ንዮሃናን ወዲ ቃሬን ነቶም ምስኡ ዝነበሩ ኵሎም ኣሕሉቕ ሰራዊትን ምስ ረአዩ፥ ተሓጐሱ። ስለዙይ እቶም እስማኤል ካብ ምፅጳ ዝማረኾም ኵሎም ምሩኻት፥ ተመሊሶም ናብ ዮሃናን ወዲ ቃሬ ኸዱ። እስማኤል ወዲ ነታንያ ግና ምስ ሸሞንተ ሰባት ኮይኑ ካብ ዮሃናን ኣምሊጡ፥ ናብ ደቂ ኣሞን ከደ።

ሽዑ ዮሃናን ወዲ ቃሬን እቶም ምስኡ ዝነበሩ ኵሎም ኣሕሉቕ ሰራዊትን፥ ነቶም እስማኤል ወዲ ነታንያ ንጎዳልያ ወዲ ኣሒቃም ድሕሪ ምቕታሉ፥ ዮሃናን ካብ እስማኤል ኣድሒኑ ዝተረፉ ህዝቢ፥ ማለት ተዋጋእቲ ሰባትን ኣንስትን ቆልዑን ሹማምንትን ካብ ገባዖን ዝመለሶም፥ ካብ ምፅጳ ወሰዱ። ተሲኦም ድማ ናብ ግብፂ ክኸዱ፥ ኣብ ጥቓ ቤተ ልሔም ኣብ ዘሎ ጌሩት ከመዓም ዓረፉ፥ እስማኤል ወዲ ነታንያ ነቲ ንጉስ ባቢሎን ኣብ ልዕሊ እታ ምድሪ ዝሾሞ ጎዳልያ ወዲ ኣሒቃም ስለ ዝቐተሎ፥ ንባቢሎናውያን ፈሪሖም ነበሩ።