Mizpa nung Gedalia tepsetdaktsü
Ishmaeli Gedalia den chiyunga, anungji pa aser pa den aliba ajak tepset, chiyungtsü tenla bener aruba nisung tir tepset, aser kangla ka tiyong agi yitok. Yohanani amungertem kümzük; saka Ishmael jenbua ao. Babiloni iba indang kecha inyaktsü ta tsübua, shilang aliba nüburtem Ijip limai aotsü aenshi.
41 1Ita tenetnübuba nung, chuba metsü aser chuba ketdangpur tulu ka lia, Elishama jabaso Nethania chir Ishmael, nisung ter den Mizpa nung Ahikam chir Gedalia dangi aru. Aser yangji Mizpa nung parnoki külemi chiyung. 2Nethania chir Ishmael aser pa den aliba nisung ter aramesoa, parnoki Shafan jabaso Ahikam chir Gedalia nok agi maok, Babilon chubai lima madak kümdakja nisungji tepset. 3Ishmaeli ano Mizpa nung Gedalia den aliba Yihuda nunger ajak, aser yangji anguba Babilon temerangertem, raraba nisungtemji tepset.
4Gedalia tepseter sülen tanabuba anogo nung, shiri jagi aji memetetdang, 5Shekem, Shilo, aser Samaria nungi nisung tir, pei bangsem südoka, süoshi shisa, shi jeptoka, chiyungtsü tenla aser teronem asen Tebu ki dangi bener aru. 6Nethania chir Ishmaeli parnok ajurutsü asoshi Mizpa nungi adok, pa aodang jeb. Kodang pai parnok ajuru, pai ashi, “Ahikam chir Gedalia dangi arung.” 7Kodang parnok yimti tiyong nung ai, Nethania chir Ishmael aser pa den aliba nisungtemi parnok tepseta, kangla tiyong nung parnok ajongoka yutsü. 8Parnok rongnungi ter jagi Ishmael dang ashi, “Onok metepsetla, kechiaser onoki alu nung wheat tsük, barley tsük, totzü, aser ninang mojitzü miimogo.” Anungji pai parnok taküm kümzük, tanüngba den külemi parnok metepset.
9Ishmaeli pa tepsetba nisungtem temang ajak ajongoka yuba kanglaji, Asa chubai Israel chuba Baasha tsübu nungji yangluba tulu aji liasü. Nethania chir Ishmaeli aji tasümang agi sünga enok.
10Ishmaeli Mizpa nung tanüngba nübur ajak tepuoker kümdaktsü—chuba jalatem aser Mizpa nung tanüngba nisung ajak—anüker arkotong Nebuzaradani Ahikam chir Gedalia ket nung agütsüba parnokji. Nethania chir Ishmaeli parnok apua, Ammon nunger dangi ajangtsü apuso.
11Kodang Karea chir Yohanan aser pa den aliba temeranger arkotong ajaki, Nethania chir Ishmaeli inyakba tamajung ajak angashi, 12parnoki nisung ajak anir, Nethania chir Ishmael anema raratsü oa, Gibeon nung aliba awatsüng tulu nung pa angu. 13Kodang Ishmael den aliba nübur ajaki Karea chir Yohanan aser pa den aliba temeranger arkotong ajak angu, parnok pela. 14Anungji Ishmaeli Mizpa nungi apuba tepuoker ajak meyipa, Karea chir Yohanan dangi ao. 15Saka Nethania chir Ishmaeli nisung tinü den Yohanan nungi jentet, aser Ammon nunger dangi ao.
16Idangji Karea chir Yohanan aser pa den aliba temeranger telok arkotong ajaki, Ishmaeli Ahikam chir Gedalia tepseter külen, Nethania chir Ishmael nungi Yohanani kümzükba tanüngba nübur ajak Mizpa nungi anir ao—temeranger, tetsür, tanurtem, aser Gibeon nungi tanaben anir aor tongtipurtem. 17Parnok apusoa, Bethlehem tezü aliba Gerut Kimham nung anen, Ijip lima leni aotsü, 18kechiaser parnoki Babilon nunger tsübu; Nethania chir Ishmaeli Babilon chubai lima madak kümdakja Ahikam chir Gedalia tepsetogo.