E gburu Gedalaya na Mizpa
Ishmel na Gedalaya rikọrọ nri, mgbe ahụ o gbuo ya na ndị niile nọnyeere ya, gbuo iri ndị njem asatọ bu onyinye, were ozu jupụta olulu mmiri. Johanan napụtara ndị a dọọrọ nʼagha; Ishmel gbapụrụ. Nʼịtụ egwu ihe Babilọn ga-eme nʼihi ya, ndị fọdụrụ malitere njem gaa Ijipt.
41 1Nʼọnwa nke asaa, Ishmel nwa Netanaya, nwa Elishama, onye sitere nʼagbụrụ ndị eze ma bụrụkwa otu nʼime ndịisi ozi eze, bịakwutere Gedalaya nwa Ahikam na Mizpa, ya na ndị ikom iri. Nʼebe ahụ, ha so rikọọ nri ọnụ na Mizpa. 2Ishmel nwa Netanaya biliri ọtọ, ya na ndị ikom iri ahụ so ya, ha jiri mma agha gbuo Gedalaya nwa Ahikam, nwa Shefan, gbuo nwoke ahụ eze Babilọn mere onyeisi nʼelu ala ahụ. 3Ishmel gbukwara ndị Juu niile so Gedalaya nọ na Mizpa, nakwa ndị agha Babilọn a hụrụ nʼebe ahụ—ndị ikom na-alụ ọgụ.
4Nʼụbọchị nke abụọ mgbe e gbuchara Gedalaya, tupu onye ọbụla amata ya, 5ndị ikom iri asatọ sitere na Shekem, na Shaịlo, na Sameria bịara—ndị kpụchara afụ ọnụ ha, dọwaa uwe ha, waa onwe ha nʼahụ—na-ebu onyinye mkpụrụ ọka na ihe nsure ọkụ na-esi ísì ụtọ na-aga ụlọ Nna anyị. 6Ishmel nwa Netanaya si na Mizpa pụọ izute ha, na-ebe akwa ka ọ na-aga. Mgbe ọ zutere ha, ọ sịrị, “Bịakwutenụ Gedalaya nwa Ahikam.” 7Mgbe ha batara nʼetiti obodo ahụ, Ishmel nwa Netanaya na ndị ya gburu ha, tụba ha nʼime olulu mmiri ahụ. 8Mmadụ iri nʼime ha gwara Ishmel sị, “Egbula anyị—anyị nwere ọka wiiti, na ọka balị, na mmanụ, na mmanụ aṅụ, ndị e zoro nʼọhịa.” Ya mere, o hapụrụ ha ndụ, o gbughị ha na ndị ọzọ fọdụrụ.
9Olulu mmiri ahụ ebe Ishmel tụbara ozu ndị ikom niile ọ gburu bụ nnukwu olulu ahụ eze Esa gwuru nʼihi na ọ tụrụ egwu Baasha eze Izrel. Ishmel nwa Netanaya jiri ndị nwụrụ anwụ mejuo ya.
10Ishmel dọtara nʼagha ndị niile fọdụrụ na Mizpa—ụmụ ndị inyom eze, na onye ọbụla fọdụrụ na Mizpa—ndị Nebuzaradan, onyeisi ndị nche, nyefere Gedalaya nwa Ahikam nʼaka. Ishmel nwa Netanaya dọtara ha nʼagha ma bilie ịgafe gakwuru ndị Amọn.
11Mgbe Johanan nwa Karea na ndịisi agha niile so ya nụrụ ihe ọjọọ niile Ishmel nwa Netanaya mere, 12ha kpọọrọ ndị ikom niile, gaa ịlụso Ishmel nwa Netanaya ọgụ, hụ ya nʼakụkụ nnukwu ọdọ mmiri dị na Gibeọn. 13Mgbe ndị niile so Ishmel hụrụ Johanan nwa Karea na ndịisi agha niile so ya, obi tọrọ ha ụtọ. 14Ya mere, ndị niile a dọtara nʼagha bụ ndị Ishmel sitere na Mizpa dọta chigharịrị, gakwuru Johanan nwa Karea. 15Ma Ishmel nwa Netanaya sitere nʼaka Johanan gbanarị, ya na ndị ikom asatọ, gaa nʼebe ndị Amọn nọ.
16Mgbe ahụ, Johanan nwa Karea na ndịisi agha niile so ya kpọọrọ site na Mizpa ndị fọdụrụ nʼime ndị ahụ Johanan napụtara nʼaka Ishmel nwa Netanaya, mgbe Ishmel gbuchara Gedalaya nwa Ahikam—ndị agha, na ndị inyom, na ụmụntakịrị, na ndịisi ọrụ, ndị e si na Gibeọn kpọlata. 17Ha biliri, kwụsị na Gerut Kimham nke dị nso na Betlehem, na-aga Ijipt, 18nʼihi na ha tụrụ egwu ndị Babilọn, ebe ọ bụ na Ishmel nwa Netanaya gburu Gedalaya nwa Ahikam, onye eze Babilọn mere onyeisi nʼelu ala ahụ.
