An Kashe Gedaliya a Mizfa
Isma'ila ya ci abinci tare da Gedaliya, sa'an nan ya kashe shi da duk waɗanda suke tare da shi, ya kashe mahajjata tamanin masu ɗauke da hadayu, ya cika wata rijiya da gawawwaki. Yohanan ya kuɓutar da waɗanda aka kama; Isma'ila ya tsere. Don tsoron abin da Babila za ta yi game da wannan, sauran mutanen suka kama hanyar Masar.
41 1A wata na bakwai, Isma'ila ɗan Netaniya, ɗan Elishama, wanda yake daga zuriyar sarauta kuma babban hafsan sarki, ya zo wurin Gedaliya ɗan Ahikam a Mizfa, tare da mutane goma. A can kuwa suka ci abinci tare a Mizfa. 2Sai Isma'ila ɗan Netaniya ya tashi tare da mutane goman nan da suke tare da shi, suka kashe Gedaliya ɗan Ahikam, ɗan Shafan, da takobi. Suka kashe mutumin da sarkin Babila ya naɗa a kan ƙasar. 3Isma'ila kuma ya kashe dukan Yahudawan da suke tare da Gedaliya a Mizfa, da sojojin Babila da aka same su a can, wato mayaƙa.
4A rana ta biyu bayan an kashe Gedaliya, kafin kowa ya san haka, 5sai ga mutum tamanin daga Shekem, da Shilo, da Samariya suka zo, da suka aske gemunsu, suka yayyage tufafinsu, suka tsattsaga jikunansu, ɗauke da hadayun gari da turare, don su kai gidan Ubanmu. 6Sai Isma'ila ɗan Netaniya ya fito daga Mizfa don yă tarye su, yana kuka yayinda yake tafiya. Da ya tarar da su, sai ya ce musu, “Ku zo wurin Gedaliya ɗan Ahikam.” 7Da suka shiga tsakiyar birnin, sai Isma'ila ɗan Netaniya da mutanensa suka kashe su, suka jefar da su cikin rijiya. 8Amma goma a cikinsu suka ce wa Isma'ila, “Kada ka kashe mu, gama muna da alkama, da sha'ir, da mai, da zuma ɓoye a gona.” Saboda haka ya bar su, bai kashe su tare da sauran ba.
9Rijiyar da Isma'ila ya jefar da dukan gawawwakin mutanen da ya kashe, ita ce babbar rijiyar da Sarki Asa ya haƙa saboda yana tsoron Ba'asha sarkin Isra'ila. Isma'ila ɗan Netaniya ya cika ta da gawawwaki.
10Sa'an nan Isma'ila ya kame sauran dukan mutanen da suke a Mizfa, wato 'ya'yan sarki mata, da duk sauran da aka bari a Mizfa, waɗanda Nebuzaradan shugaban masu gadi ya danƙa wa Gedaliya ɗan Ahikam. Isma'ila ɗan Netaniya ya kame su, ya kama hanya zuwa wajen Ammonawa.
11Da Yohanan ɗan Kareya da dukan shugabannin mayaƙa da suke tare da shi suka ji dukan muguntar da Isma'ila ɗan Netaniya ya yi, 12sai suka ɗauki dukan mutane, suka tafi don su yaƙi Isma'ila ɗan Netaniya, suka same shi kusa da babban tafki a Gibeyon. 13Da dukan mutanen da suke tare da Isma'ila suka ga Yohanan ɗan Kareya da dukan shugabannin mayaƙa da suke tare da shi, sai suka yi farin ciki. 14Saboda haka dukan kamammun da Isma'ila ya kwaso daga Mizfa suka juya, suka tafi wurin Yohanan ɗan Kareya. 15Amma Isma'ila ɗan Netaniya ya tsira daga hannun Yohanan tare da mutum takwas, ya ci gaba zuwa wajen Ammonawa.
16Sa'an nan Yohanan ɗan Kareya da dukan shugabannin mayaƙa da suke tare da shi suka ɗauki sauran mutanen da Yohanan ya kuɓutar daga hannun Isma'ila ɗan Netaniya daga Mizfa, bayan Isma'ila ya kashe Gedaliya ɗan Ahikam, wato sojoji, da mata, da yara, da hafsoshin da aka dawo da su daga Gibeyon. 17Suka kama hanya, suka tsaya a Gerut-Kimham kusa da Baitalami, suna nufin Masar, 18domin suna tsoron Babilawa, tun da yake Isma'ila ɗan Netaniya ya kashe Gedaliya ɗan Ahikam, wanda sarkin Babila ya naɗa a kan ƙasar.