Mizpaa Gedalia Haitibü
Ishmaelei Gedalia yoa shaukei, kheijinei hao hoba hao yoa kibü pendou haitikei, shausiyung lembü müt saolei to meimeikei, hoba püngkhün to mang jembei. Johananei haüyobü shuong khümenkei; lausikei Ishmael satenkei. Babilonei habü shanga ai kümlabü dogo hatko, joubü shuong Ijep kaonyek to ngaikei.
41 1Nyetboubü lita Nethanieibü shou, Elishamaeibü lilabü, Choba chempeneibü hoba Chobaeibü thükkabü jaishou che kibü Ishmael, müt an yoan Mizpaa Ahikameibü shou Gedalia jungto loukei. Hobaje khünei Mizpaa haoen liko shausiyung shaukei. 2Nethanieibü shou Ishmael hoba hao yoa kibü müt an meimeikei, hoba haoenei Shapaneibü shou, Ahikameibü shou Gedalia inei ngümbei, Babilon Chobaei kaodak thüka pienbü müt kho haitikei. 3Ishmaelei tokei Mizpaa Gedalia yoa kibü Jihudabü pendou, hoba khünei hapbü Babilonbü sepai, wapyobü müt shuong haitikei.
4Gedalia haitibü phaia nyiboubü chaloua, aoyouei kho ange shaangla, 5Shekhem, Shilo hoba Samaria ka müt saolei—kaoshang wi shuan, neisimei jitnyinan, manga apüpan—shausiyung lembü hoba ponlem seneibü Bou chem to lengan loukei. 6Nethanieibü shou Ishmael haoen haüyola Mizpaa ka longkei, hoba haujinei haapbei. Haoen to haüyojinei hao to laukei, “Ahikameibü shou Gedalia jungto loua.” 7Haoen sangnyu jenyua lotjinei, Nethanieibü shou Ishmael hoba hao mütshuongei haoen haitikei, hoba püngkhün jenyua haoen jaangan attikei. 8Haoen yoka müt anei Ishmael to laukei, “Kün tehaitijan—künei seka whet youshou, barli youshou, onang hoba honei huan phokei kia.” Hibü haoei haoen langkei püetkei, joubü yoa ahaitiko.
9Ishmaelei haitibü müt pendoueibü mang jaangan attibü püngkhün kho, Asa Chobaei kümbü yaangbü che kikei, aishanga haoei Israel Choba Baasha to hatkei. Nethanieibü shou Ishmaelei kho haibü müt shuongei shentikei.
10Ishmaelei Mizpaa joubü müt pendou, Chobaeibü nouyangshou shuong hoba Mizpaa joubü pendou thüngbou lapbei, khübü lombou shuong lajamleibou Nebuzaradanei Ahikameibü shou Gedalia la kukei. Nethanieibü shou Ishmaelei haoen thüngbou lapan Ammonbü to danjung haula longkei.
11Ladang Kareaeibü shou Johan hoba hao yoa kibü sepai lajamleibou pendouei Nethanieibü shou Ishmaelei kümbü amaibü pendou ditkei, 12haoenei müt pendou leian Nethanieibü shou Ishmael to wapyola haukei, hoba Gibeona kibü thim yaangbüa hao hapbei. 13Ladang Ishmaeleibü müt pendouei Kareaeibü shou Johan hoba hao yoa kibü sepai lajamleibou pendou hapbei, haoen olinkei. 14Hibü Ishmaelei Mizpaa ka leibü langsenbü pendou longeian Kareaeibü shou Johan jungto haukei. 15Lausikei Nethanieibü shou Ishmael müt set yoan Johan jungka satenkei, hoba Ammonbü to haukei.
16Kheijinei Kareaeibü shou Johan hoba hao yoa kibü sepai tan lajamleibou pendouei, Ishmaelei Ahikameibü shou Gedalia haitian phaia Johanei Nethanieibü shou Ishmael ka khümenbü joubü müt pendou—sepai, yaksa, nashou hoba leiyeibou shuong, Gibeon ka leian loubü—Mizpaa ka leikei. 17Haoen meimeikei hoba Ijep to haula, Bethlehem napheinei kibü Gerut Kimham to ngaikei, 18aishanga haoen Babilonbü to hatkei, aieilausi Nethanieibü shou Ishmaelei Babilon Chobaei kaodak thüka pienbü Ahikameibü shou Gedalia haitikei.
