ኤርሚያስ 42 FHB Father's Heart Bible™

42 ¹ሽዑ ኵሎም ኣሕሉቕ ሰራዊት፥ ምስ ዮሃናን ወዲ ቃሬሕን ኢዛንያ ወዲ ሆሻያን፥ ኵሉ ህዝቢ ኸዓ ካብ ንእሽቶ ክሳዕ ዓብዪ፥ ቀረቡ፤ ²ነቢይ ኤርሚያስ ከዓ ከምዙይ በልዎ፦ “በይዛኻ ምህለላና ስማዕ፤ ምእንታና፥ ስለ ኵሉ እዝ ተረፍ እዚ፥ ናብ ኣቦኻ ፀሊ፤ ከምቲ ንስኻ እትርእዮ፥ ካብ ብዙሓት ውሑዳት ተሪፍና ኣለና፤ ³ኣቦኻ ነቲ ክንከዶ ዘለና መንገድን ነቲ ክንገብሮ ዘለና ነገር ከርእየና።”

⁴ነቢይ ኤርሚያስ ድማ ከምዙይ በሎም፦ “ሰሚዐኩም ኣለኹ። ከምቲ ዝሓተትኩምኒ ናብ ኣቦኻትኩም ክፀሊ እየ፤ ኣቦኻትኩም ዝምልሶ ዅሉ ድማ ዋላ ሓንቲ እንተይሓባእኩ ክነግረኩም እየ።”

⁵ንሳቶም ድማ ንኤርሚያስ ከምዙይ በልዎ፦ “ነቲ ኣቦኻ ክነግረና ዝሰደደካ ዅሉ እንተ ዘይገበርናዮ፥ ኣቦና ኣባና ሓቀኛን እሙንን ምስክር ይኹን። ⁶ፅቡቕ ኮነ ክፉእ፥ ድምፂ ኣቦና - ነቲ ናብኡ እንሰደካ ዘለና - ክንሰምዕ ኢና፤ ድምፂ ኣቦና ምስ ሰማዕና ድማ ፅቡቕ ምእንቲ ኽኾነልና።”

⁷ድሕሪ ዓሰርተ መዓልቲ ድማ ቃል ኣቦና ናብ ኤርሚያስ መፀ። ⁸ንሱ ኸዓ ንዮሃናን ወዲ ቃሬሕን ነቶም ምስኡ ዝነበሩ ኵሎም ኣሕሉቕን ንዅሉ ህዝቢ፥ ካብ ንእሽቶ ክሳዕ ዓብዪ ፀውዐ፤

⁹ከምዙይ ድማ በሎም፦ “ነቲ ምህለላኹም ከቕርበሉ ዝሰደድኩምኒ ናይ እስራኤል ኣቦና ከምዙይ ይብል ኣሎ፦

¹⁰ኣብዛ ምድሪ እዚኣ ብሓቂ እንተ ተቐሚጥኩም፥ ክሃንፀኩም ደኣ እምበር ኣየፍርሰኩምን እየ፤ ክተኽለኩም ደኣ እምበር ኣይነቕለኩምን እየ፤ ነቲ ኣብ ልዕሌኹም ዘውረድክዎ መዓት ተመሊሰ ኣለኹ እሞ።

¹¹ነቲ ሕዚ እትፈርሕዎ ዘለኹም ንጉስ ባቢሎን ኣይትፍርሕዎ። ኣነ ከድሕነኩም ካብ ኢዱውን ኸናግፈኩም ምሳኻትኩም እየ እሞ፥ ኣይትፍርሕዎ፥ ይብል ኣቦና።

¹²ክርህርሃለኩም እየ፤ ንጉስ ባቢሎን ድማ ክርህርሃለኩም እዩ፥ ናብ ምድሪኹምውን ክመልሰኩም እዩ።

¹³ድምፂ ኣቦኻትኩም እናጠሓስኩም ግና ‘ኣብዛ ምድሪ እዚኣ ኣይንቕመጥን ኢና’ እንተ በልኩም፥ ¹⁴‘ኣይፋሉን፥ ናብታ ውግእ ዘይንርእየላ፥ ድምፂ መለኸት ዘይንሰምዓላ፥ እንጀራ ዘይንጠምየላ ግብፂ ክንከይድ፥ ኣብኣ ድማ ክንቕመጥ ኢና’ እንተ በልኩም፥ ¹⁵ኦ ተረፍ ይሁዳ፥ እምበኣር ቃል ኣቦና ስምዑ። ኣቦ ሰራዊት ሰማይ፥ ኣቦ እስራኤል ከምዙይ ይብል ኣሎ፦ ‘ናብ ግብፂ ኣቲኹም ኣብኣ ኽትቕመጡ እንተ ቘረፅኩም፥ ¹⁶እታ እትፈርሕዋ ሴፍ ኣብ ግብፂ ኽትረኽበኩም እያ፤ እቲ እትሽበርዎ ጥሜት ናብ ግብፂ ኽስዕበኩም እዩ፤ ኣብኣ ኸዓ ክትሞቱ ኢኹም። ¹⁷ኵሎም እቶም ኣብ ግብፂ ኽቕመጡ ዝቘረፁ፥ ብሴፍን ብጥሜትን ብፌራን ክሞቱ እዮም፤ ካብቲ ኣነ ዘምፅኣሎም መዓት ዝድሕን ወይ ዘምልጥ ሓደ እኳ ኣይህሉን።

¹⁸ኣቦ ሰራዊት ሰማይ፥ ኣቦ እስራኤል ከምዙይ ይብል ኣሎ፦ ‘ከምቲ ቝጥዓይ ምስ መዓተይ ኣብ ልዕሊ ህዝቢ ኢየሩሳሌም ዝፈሰሰ፥ ከምኡ ድማ ናብ ግብፂ ምስ ኣተኹም ቝጥዓይ ኣብ ልዕሌኹም ክፈስስ እዩ። መርገምን መስካሕክሒን መላገፂ ድማ ውርደትን ክትኮኑ ኢኹም፤ ነዛ ስፍራ እዚኣ ድማ መሊስኩም ኣይትርእይዋን ኢኹም።’”

¹⁹“ኦ ተረፍ ይሁዳ፥ ኣቦና ‘ናብ ግብፂ ኣይትኺዱ’ ኢሉ ተዛሪቡኩም እዩ። ሎሚ ኸም ዘጠንቀቕኩኹም ብርግፅ ፍለጡ። ²⁰ናብ ኣቦኻትኩም ሰዲድኩምኒ ኢኹም እሞ፥ ንነፍሳትኩም ኣስሒትኩም ኢኹም፤ ‘ምእንታና ናብ ኣቦና ፀሊ፤ ከምቲ ንሱ ዝብሎ ዅሉ ንገረና፥ ንሕና ኸዓ ክንገብሮ ኢና’ ኢልኩም። ²¹ሎሚ ነጊረኩም ኣለኹ፤ ግና ነቲ ንሱ ናባኻትኩም ክነግረኩም ዝሰደደኒ ዅሉ፥ ድምፂ ኣቦኻትኩም ኣይሰማዕኹምዎን። ²²እምበኣር ኣብታ ኽትቕመጡላ እትደልይዋ ስፍራ ብሴፍን ብጥሜትን ብፌራን ከም እትሞቱ ብርግፅ ፍለጡ።”