ኤርምያስ 42

42 ¹የጦር አዛዦች ሁሉ ከቃሬ ልጅ ከዮሐናንና ከሆሣያ ልጅ ከዮዛንያ ጋር፣ ከታናሽ እስከ ታላቅ ሕዝቡ ሁሉ ቀርበው፣ ²ነቢዩን ኤርምያስን እንዲህ አሉት፤ “ልመናችንን እባክህ ስማ፤ ስለ እኛ፣ ስለዚህ ቀሪ ሁሉ ወደ አባትህ ጸልይ፤ እንደምታየው ከብዙ ጥቂቶች ሆነን ቀርተናልና፣ ³አባትህም የምንሄድበትን መንገድ የምናደርገውንም ነገር ያሳየን ዘንድ ነው።”

⁴ነቢዩ ኤርምያስም እንዲህ አላቸው፤ “ሰማኋችሁ፤ እንደ ጠየቃችሁት ወደ አባታችሁ እጸልያለሁ፤ አባታችሁም የሚመልሰውን ሁሉ ምንም ሳልሰውር እነግራችኋለሁ።”

⁵እነርሱም ኤርምያስን እንዲህ አሉት፤ “አባትህ ልትነግረን የሚልክህን ሁሉ ባናደርግ፣ አባታችን በእኛ ላይ እውነተኛና ታማኝ ምስክር ይሁን። ⁶መልካም ቢሆን ክፉ፣ ወደ እርሱ የምንልክህን የአባታችንን ድምፅ እንታዘዛለን፤ የአባታችንን ድምፅ ስንታዘዝ መልካም ይሆንልን ዘንድ ነው።”

⁷ከዐሥር ቀን በኋላም የአባታችን ቃል ወደ ኤርምያስ መጣ። ⁸እርሱም የቃሬን ልጅ ዮሐናንን፣ ከእርሱ ጋር የነበሩትን አዛዦች ሁሉ፣ ከታናሽ እስከ ታላቅ ሕዝቡን ሁሉ ጠርቶ፣

⁹እንዲህም አለ፤ “ልመናችሁን አቀርብ ዘንድ ወደ እርሱ የላካችሁኝ የእስራኤል አባታችን እንዲህ ይላል፤

¹⁰በዚህ ምድር በእውነት ብትኖሩ፣ አፈርሳችሁ ዘንድ ሳይሆን እሠራችኋለሁ፤ ነቅዬ ሳይሆን እተክላችኋለሁ፤ ባመጣሁባችሁ መቅሠፍት ተጸጽቻለሁና።

¹¹አሁን የምትፈሩትን የባቢሎንን ንጉሥ አትፍሩ፤ እርሱን አትፍሩ ይላል አባታችን፤ ላድናችሁና ከእጁ ላስጥላችሁ ከእናንተ ጋር ነኝና።

¹²ርኅራኄንም አሳያችኋለሁ፤ የባቢሎን ንጉሥ ይራራላችሁ ዘንድ ወደ ምድራችሁም ይመልሳችሁ ዘንድ ነው።

¹³ነገር ግን የአባታችሁን ድምፅ ባለመታዘዝ፣ ‘በዚህ ምድር አንኖርም’ ብትሉ፣ ¹⁴‘አይሆንም፤ ጦርነት ወደማናይበት፣ የመለከትም ድምፅ ወደማንሰማበት፣ እንጀራም ወደማንራብበት ወደ ግብፅ ሄደን በዚያ እንኖራለን’ ብትሉ፣ ¹⁵እናንተ የይሁዳ ቀሪዎች ሆይ፣ የአባታችንን ቃል ስሙ፤ የሰማይ ሰራዊት አባት፣ የእስራኤል አባት እንዲህ ይላል፤ ወደ ግብፅ ሄዳችሁ በዚያ ለመኖር ፊታችሁን ካቀናችሁ፣ ¹⁶የምትፈሩት ሰይፍ በግብፅ ይደርስባችኋል፤ የምትፈሩትም ራብ በግብፅ ይከተላችኋል፤ በዚያም ትሞታላችሁ። ¹⁷በግብፅ ለመኖር የወሰኑ ሁሉ በሰይፍ፣ በራብና በቸነፈር ይሞታሉ፤ ከማመጣባቸው መቅሠፍት የሚተርፍ ወይም የሚያመልጥ አይኖርም።

¹⁸የሰማይ ሰራዊት አባት፣ የእስራኤል አባት እንዲህ ይላል፤ ቍጣዬና መዓቴ በኢየሩሳሌም ነዋሪዎች ላይ እንደ ፈሰሰ፣ እናንተ ወደ ግብፅ ስትገቡ መዓቴ እንዲሁ በእናንተ ላይ ይፈስሳል፤ የመርገም፣ የድንጋጤ፣ የመሳለቅና የውርደት ነገር ትሆናላችሁ፤ ይህችንም ስፍራ ዳግመኛ አታዩም።”

¹⁹“እናንተ የይሁዳ ቀሪዎች ሆይ፣ አባታችን፦ ‘ወደ ግብፅ አትሂዱ’ ብሎ ተናግሯችኋል፤ ዛሬ እንዳስጠነቀቅኋችሁ በእርግጥ እወቁ። ²⁰በገዛ ነፍሳችሁ ዋጋ ራሳችሁን አሳሳታችሁ፤ ‘ስለ እኛ ወደ አባታችን ጸልይ፤ የሚለውንም ሁሉ ንገረን እኛም እናደርጋለን’ ብላችሁ ወደ አባታችሁ ልካችሁኝ ነበርና። ²¹ዛሬም ነገርኋችሁ፤ ነገር ግን ልነግራችሁ ከላከኝ ነገር በአንዳች የአባታችሁን ድምፅ አልታዘዛችሁም። ²²እንግዲህ ለመኖር በምትፈልጉበት ስፍራ በሰይፍ፣ በራብና በቸነፈር እንደምትሞቱ በእርግጥ እወቁ።”