ኤርምያስ 43

43 ¹ኤርምያስ ለሕዝቡ ሁሉ የአባታቸውን ቃል ሁሉ፣ አባታቸው እንዲነግራቸው የላከውን ቃል ሁሉ ነግሮ በጨረሰ ጊዜ፣ ²የሆሻያ ልጅ አዛርያ፣ የቃሬህ ልጅ ዮሐናን፣ ትዕቢተኞቹም ሰዎች ሁሉ ኤርምያስን እንዲህ አሉት፤ “ሐሰት እየተናገርህ ነው! አባታችን፣ ‘ወደ ግብፅ ሄዳችሁ አትቀመጡ’ ብለህ እንድትናገር አልላከህም። ³ነገር ግን የኔርያ ልጅ ባሮክ፣ ይገድሉን ዘንድ ወይም ወደ ባቢሎን ይማርኩን ዘንድ ለባቢሎናውያን አሳልፎ ሊሰጠን በእኛ ላይ ያነሣሣሃል።”

⁴ስለዚህ የቃሬህ ልጅ ዮሐናን፣ የጦር አዛዦቹ ሁሉ፣ ሕዝቡም ሁሉ በይሁዳ ምድር ይኖሩ ዘንድ የተነገረውን የአባታችንን ድምፅ አልታዘዙም። ⁵ስለዚህ የቃሬህ ልጅ ዮሐናንና የጦር አዛዦቹ ሁሉ፣ ተበትነውበት ከነበሩት አሕዛብ ሁሉ በይሁዳ ምድር ለመኖር ተመልሰው የመጡትን የይሁዳን ቅሬታ ሁሉ ወሰዱ፤ ⁶ወንዶቹን፣ ሴቶቹን፣ ልጆቹን፣ የንጉሡን ሴቶች ልጆች፣ የዘበኞች አለቃ ነቡዛራዳን ከሻፋን ልጅ ከአኪቃም ልጅ ከጎዶልያ ጋር ትቶት የነበረውን ሁሉ፣ ነቢዩ ኤርምያስንና የኔርያን ልጅ ባሮክን ወሰዱ። ⁷ስለዚህ የአባታችንን ድምፅ ባለመታዘዝ ወደ ግብፅ ገቡ፤ እስከ ጣፍናስም መጡ።

⁸የአባታችንም ቃል በጣፍናስ ወደ ኤርምያስ እንዲህ ሲል መጣ፤

⁹“የይሁዳ ሰዎች እያዩህ፣ ትልልቅ ድንጋዮች በእጅህ ይዘህ በጣፍናስ ባለው በፈርዖን ቤተ መንግሥት መግቢያ ላይ ባለው በጡብ ንጣፍ፣ በሸክላ ጭቃ ውስጥ ቅበራቸው። ¹⁰ከዚያም እንዲህ ብለህ ንገራቸው፤ ‘የሰማይ ሠራዊት አባት፣ የእስራኤል አባታችን እንዲህ ይላል፤ እነሆ፣ ባሪያዬን የባቢሎንን ንጉሥ ናቡከደነፆርን እልካለሁ፤ እዚህ በቀበርኋቸው በእነዚህ ድንጋዮች ላይ ዙፋኑን አኖራለሁ፤ በላያቸውም ንጉሣዊ ድንኳኑን ይዘረጋል። ¹¹መጥቶም ግብፅን ይመታል፤ ለሞት ለተወሰኑት ሞት፣ ለምርኮ ለተወሰኑት ምርኮ፣ ለሰይፍ ለተወሰኑት ሰይፍ ይሆናል። ¹²በግብፅ አማልክት ቤተ መቅደሶች እሳት አነድዳለሁ፤ ናቡከደነፆርም ያቃጥላቸዋል፣ ይማርካቸዋልም። እረኛ ልብሱን እንደሚከናነብ የግብፅን ምድር በራሱ ላይ ይከናነባል፤ ያለ ጉዳትም ከዚያ ይወጣል። ¹³በግብፅ ምድር ያሉትን የሄልዮቡሊስን የተቀደሱ ዐምዶች ይሰብራል፤ የግብፅንም አማልክት ቤተ መቅደሶች በእሳት ያቃጥላል።’” ^a a v13 እዚህ “ቤትሳሚስ” (“የፀሐይ ቤት”) ማለት ግሪኮች ሄልዮቡሊስ ብለው የጠሩት የግብፅ ከተማ ሲሆን፣ የግብፅ የፀሐይ አምልኮ ማዕከል ነው፤ በይሁዳ የሚገኘው ተመሳሳይ ስም ያለው ከተማ አይደለም።