Anthu Adasala Athawira ku Ejitu
Yohanani na anango alonga kuti Yeremiya ndi nyakunama, mbakhonda kuti Baba wathu an'tuma, mbapasa mulando Baruki, mbatenga onsene adasala kuenda nawo ku Ejitu, Yeremiya pabodzi nawo. Ku Tapanesi iye akwirira miyala pa mbuto inadzakhala mpando waumambo wa Nabukodonozori. Ngozi idathawa iwo isadza kuatowera.
43 1Pidamala Yeremiya kupanga anthu onsene mafala onsene a Baba wawo—mafala onsene akhadantuma Baba wawo toera kualonga kwa iwo. 2Azariya mwana wa Hosaiya, Yohanani mwana wa Kareya, na amuna onsene akudzikuza apanga Yeremiya kuti: “Iwe usalonga uthambi! Baba wathu nkhadakutuma iwe toera kulonga, ‘Lekani kuenda kakhala ku Ejitu.’ 3Nee, Baruki mwana wa Neriya asakuphwesa iwe toera kutiwukira ife, toera kutipereka m'manja mwa Ababilonya toera atiphe peno atitengere ku ubitcu ku Babilonya.”
4Na tenepo Yohanani mwana wa Kareya, atsogoleri onsene a magulu a nkhondo, na anthu onsene akhonda kubvera fala ya Baba wathu toera kukhala m'dziko ya Yuda. 5Na tenepo Yohanani mwana wa Kareya na atsogoleri onsene a magulu a nkhondo akwata anthu onsene adasala a Yuda, ale akhadabwerera kubuluka ku madziko onsene adamwazikira iwo, toera kukhala m'dziko ya Yuda. 6Akwata amuna, akazi, ana, ana aakazi a mambo, na munthu onsene adasiya Nebuzaradani nkulu wa anyakuonera kuna Gedaliya mwana wa Ahikami, mwana wa Safani, pabodzi na Yeremiya mprofeta na Baruki mwana wa Neriya. 7Na tenepo aenda ku Ejitu, mbakhonda kubvera fala ya Baba wathu, mbafika ku Tapanesi.
8Penepo fala ya Baba wathu yabwera kuna Yeremiya ku Tapanesi:
9“Kwata miyala mikulu m'manja mwako, mbuikwirire m'dongo, pa guwa ya nzerwa pa ntsuwo wa nyumba ya umambo ya Farao ku Tapanesi, amuna a Yuda mbakakuona. 10Penepo upange iwo tenepa: ‘Ipi ndi pinalonga Baba wa Nkhondo za Kudzulu, Baba wathu wa Izarayeli: Ine ndinacemera ntumiki wanga Nebukadenezari mambo wa Babilonya, mbaikha Ine mpando wace waumambo padzulu pa miyala iyi idakwirira Ine pano, iye anadzatambalaza guwa yace yaumambo padzulu pa iyo. 11Iye anadzabwera mbamenya Ejitu: kufa kwa ale akufunika kufa, ubitcu kwa ale akufunika ubitcu, supada kwa ale akufunika supada. 12Ndinagomeka moto m'nyumba za kulambira za milungu ya Ejitu; Nebukadenezari anadzazipisa mbatenga milungu yawo. Iye anadzakulunga dziko ya Ejitu nkhundu mwace ninga n'kumbizi anakulunga nguwo yace, mbabuluka penepo mwakukhonda kupwazika. 13Iye anadzaswa mizati yakucena ya Heliopoli m'dziko ya Ejitu, mbapisa nyumba za kulambira za milungu ya Ejitu.’” a a v13 Pano “Beti-semexi” (“nyumba ya dzuwa”) ndi nzinda wa Ejitu udacemerwa na Agerego kuti Heliopoli, uyu ukhali pakati pa kulambira kwa dzuwa ku Ejitu — tayu nzinda unowu wa dzina ibodzi ene uli ku Yuda.
