Shākkahaibing Egyptli Yāmhaira
Johanan eina akhavabingna Jeremiahli nana kakapik tui khamatuina, ithumwui Avāna nali machihorāmana da hāngda, Baruchli morei mi; kala Jeremiah la ngasoda leikashi saikorali Egyptli thānvāhaowa. Tahpanhesli Nebuchadnezzarwui wungpamthul ngapkhavai pamli ana ngalung yatphumhai. Athumna kayāmthui kahai kashikashā chi athumwui thili rāda lei.
43 1Athumwui Avāna athumli hāngkhavai ali chihovā kahai athumwui Avāwui tui saikora chi Jeremiahna mi saikorali hāngchithei kahaiwui thili, 2Hoshaiahwui naomayara Azariah, Kareahwui naomayara Johanan, kala langkasobing saikorana Jeremiahli hānga, "Na makhamashung matuida lei! Ithumwui Avāna nali, 'Egyptli somkhavai mavāalu,' da hāngkhavai machihovamana. 3Maningmana, ithumli Chaldeanaobingwui pāngli sangda shaothatkhavai maningkha Babylonli tukthuikhavai Neriahwui naomayara Baruchna nali ithumwui makhamayāwui vang thuingararsāli."
4Chieina Kareahwui naomayara Johanan, raithānabing saikora, kala mi saikorana Judah ngaleili pamkhavai ithumwui Avāwui akhon chi manganāsangmana. 5Chieina Kareahwui naomayara Johanan kala raithānabing saikorana, athum ngapha̱ kasā miyur saikorawui eina latung kahai Judahwui shākkahaibing saikorali, Judah ngaleili sompamkhavai khuihaowa. 6Mayarnaobing, sha̱naobing, naoshinaobing, awungawui naongalāva̱bing, kala Shaphanwui naomayara Ahikamna kaphara Gedaliahwui pāngli shantriwui kathāna Nebuzaradanna horsangmi kahai mi saikora, Jeremiah marān kala Neriahwui naomayara Baruchlila khuihaowa. 7Chieina athumna ithumwui Avāwui akhon mangānamada Egyptli azunga, kala Tahpanhes tāshunga.
8Chitharan ithumwui Avāwui tui chi Tahpanhesli Jeremiahli rāhānga:
9"Napāng eina lunggui kahakvabing khuilaga, Judahwui mibingna yanglala, Tahpanhesli khalei Pharaohwui konung khāmongli khalei chek ngalungwui leikhonli athumli thumhaolu. 10Kala athumli hānglu: 'Saikorawui Avā, Israelwui Avāna hithāda hānga: Yanglu, ina iwui rao Babylon awunga Nebuchadnezzarli hokhuira, kala hili ina thum kahai lunggui hibingwuitungli awui wungpamkhong shunhaira, kala ana chibingwuitungli awui wungnaowui khaya̱lar haihaira. 11Ana rāda Egyptli shaora: kathi khavaibingna thira; raikathā khavaibingna raikathā ngasāra; kala raighai khavaibingna raighai eina thira. 12Ina Egyptwui varebingwui shimbingli mei eina thottāra; Nebuchadnezzarna varebing chi riktāra kala khuiphungda vāra. Yaokahomana awui kachon ngavai thāda, ana Egypt ngalei chi a khalatta ngavaira, kala apam chiwui eina ungkashung eina thuivāhaora. 13Ana Egypt ngaleili khalei Helio-poliswui lungshombing chi akha̱-akhā sāra, kala Egyptwui varebingwui shimbing chi mei eina riktāra.'" a a v13 Hili "Beth-shemesh" ("ngashunwui shim") chi Greekbingna Helio-polis da hokhui Egyptwui keinung, Egyptwui ngashunli khorumwui kachāng apam china—Judahli khalei aming ngatong keinung chi maningmana.
