Ndambu yina yásala yítina ku Ngiphiti
Yowani yi bana bankaka bisi tela Yelemiya mutu wa luvunu, bisi suwangana ni Tata wetu wámutuma, amana bisi tula mulonga kwena Baluki, buna bábonga ndambu yosu yina yásala mu kunata ku Ngiphiti, Yelemiya mu kati dya bawu. Ku Tapanesi wisi zika matadi kuna kiti kya luyalu lwa Nebukadinezali kikatelama. Yambi dina bátinina dyisi kwisa kubalanda.
Tata wetu kisi zonza mu mavese 9–13
43 1Tangwa Yelemiya kámanisa kuzimbula kwena batu boosu mambu moosu ma Tata wawu—mambu moosu ma Tata wawu wáthuma mu kuzimbula kwena bawu. 2Azadiya mwana wa Hosaya, Yowani mwana wa Kaleya yi batu boosu ba lulendu bázimbula kwena Yelemiya: «Ngeyi wuti huna! Tata wetu kakútumaku mu kuzimbula ni: “Lwendaku zingila ku Ngiphiti.” 3Nkatu, Baluki mwana wa Neliya wisi kulewula ngeyi kikuma kya betu, ndangu katuheka mu moku ma bisi Babiloni ndangu batuhonda holo batunata mu kinzenza ku Babiloni.»
4Buna Yowani mwana wa Kaleya, bapfumu boosu ba basuta yi batu boosu bákolama ku ndinga ya Tata wetu, ya kuzinga mu tsi ya Yuteya. 5Buna Yowani mwana wa Kaleya yi bapfumu boosu ba basuta bábonga ndambu yosu ya Yuteya yina yávutuka tuka ku makanda moosu kuna bámwangana, ndangu bazinga mu tsi ya Yuteya. 6Bayakala, bakhetu, bana, bana bakhetu ba kinga, yi mutu wosu Nebuzaladani pfumu wa batsinzidi kásisa yi Gedaliya mwana wa Ahikami, mwana wa Safani, ha kimosi yi Yelemiya mbikudi yi Baluki mwana wa Neliya. 7Buna bákota ku Ngiphiti, mu kukolama ku ndinga ya Tata wetu, amana bátula tii yi ku Tapanesi.
8Amana ndinga ya Tata wetu yakwísa kwena Yelemiya ku Tapanesi:
9«Bonga matadi ma mbuta muna koku dyaku amana zika mawu muna tuma, muna homa dya biliki ku mwelu wa nzu ya kinga ya Fwalawo ku Tapanesi, bwosu batu ba Yuteya batala. 10Amana zimbula kwena bawu: “Tala mana makazimbula Tata mukwa ngolu zoosu, Tata wetu wa Kiseledi: Yisi thuma mu kubonga musadi wama Nebukadinesali kinga kya Babiloni, amana yikídika kiti kyandi kya luyalu hana matadi mama meni yázika kuku, amana kayala sombolu dyandi dya kinga hana mawu. 11Kakwísa amana kabeta Ngiphiti: lufwa kikuma kya bana bafwana mu kufwa, kinzenza kikuma kya bana bafwana mu kinzenza, mbedi ya phoku kikuma kya bana bafwana mu mbedi ya phoku. 12Meni yiyóka mu mbawu nzu za nzambi za Ngiphiti; Nebukadinesali kayóka mawu amana kanáta mawu. Kadivwáta tsi ya Ngiphiti hanga kalema kavwáta muzaka wandi, amana kakatuka kuna konda phasi. 13Kabukúna makunzi matoma ma Heliopolisi mu tsi ya Ngiphiti amana kayóka nzu za nzambi za Ngiphiti.”» a a v13 Hana “Beti-semesi” (disongidila “nzu ya tangwa”) kenina mbanza ya Ngiphiti yina Bangeleki batedini Heliopolisi, mbanza ya mpfunu mu kufukamina tangwa ku Ngiphiti — ka mbanza yina yi khumbu yimosi mu Yuteya ku.
