Bachi Thaka Khan Egypt Te Polai Jai
Johanan aru baki khan Jeremiah ke misa kowa manuh koise, amar Pitri tai ke pathaise koi kene namanise, aru Baruch ke dosh dise, tar pichete baki thaka sob manuh khan ke Egypt te loi jaise, Jeremiah bhi tarkhan logot. Tahpanhes te tai Nebuchadnezzar laga singhason khara hobo jagah te pathor khan gaar dise. Tarkhan ki khatra pora bhagise, etu tarkhan pichete ahi ase.
43 1Jetia Jeremiah pora sob manuh khan ke tarkhan laga Pitri laga sob kotha koi diya khotom korise—tarkhan laga Pitri pora tarkhan ke kobole tar ke pathai diya sob kotha. 2Hoshaiah laga chokra Azariah, Kareah laga chokra Johanan, aru sob ahankari manuh khan pora Jeremiah ke koise, “Tumi misa koi ase! Amar Pitri pora, ‘Egypt te thakibole na-jabi,’ koi kobole tumi ke patha nai.” 3“Nahoi, Neriah laga chokra Baruch pora amikhan ke morai dibole nahole Babylon te bondi kori loijabole, Babylon laga manuh khan laga hath te amikhan ke di dibole, tumi ke amikhan bisorte uksai ase.”
4Karne Kareah laga chokra Johanan, sob sipahi laga adhikari khan, aru sob manuh khan pora Judah desh te thakibole amar Pitri laga awaj namanise. 5Karne Kareah laga chokra Johanan aru sob sipahi laga adhikari khan pora, Judah laga desh te thakibole, ji sob desh te tarkhan ke charibchari kori disele ta pora wapas aha Judah laga bachi thaka sob manuh khan ke loise. 6mota khan, maiki khan, bacha khan, raja laga chukri khan, aru pohora-dar laga henapoti Nebuzaradan pora Shaphan laga chokra, Ahikam laga chokra Gedaliah logote chari diya sob manuh, aru bhabobadi Jeremiah aru Neriah laga chokra Baruch ke bhi loise. 7Karne amar Pitri laga awaj namani kene tarkhan Egypt te ghusise, aru Tahpanhes tak ahise.
8Titia Tahpanhes te amar Pitri laga kotha Jeremiah logote ahise:
9“Tumi laga hath te dangor pathor khan loi lobi aru Judah laga manuh khan sai thaka homoi te, Tahpanhes te Pharaoh laga mahal laga ghusa jaga te thaka it laga rasta te, matir bhitor te eitu khan lukai rakhibi.” 10“Titia tarkhan ke kobi: ‘Sorgo laga sipahi khan laga Pitri, Israel laga amar Pitri pora koise: Moi Babylon laga raja, Moi laga noukar Nebuchadnezzar ke matibole pathai ase, aru Moi yate lukai rakha eitu pathor khan uporte Tar singhason rakhibo, aru tai eitu khan uporte tar rajyo laga tombu lagai dibo.’” 11“‘Tai ahibo aru Egypt ke mari dibo: moribole thaka khan nimite mrityu, bondi hobole thaka khan nimite bondi-ghor, talwar nimite thaka khan nimite talwar.’” 12“‘Moi Egypt laga debodebi khan laga mondir khan te jui lagai dibo; Nebuchadnezzar pora eitu khan ke julai dibo aru loijabo. Mer-rokhiya pora tar kapra lagai thaka nisena tai Egypt desh ke nijor gaw te lagai lobo, aru eku nuksan nohoi kene ta pora ulai jabo.’” 13“‘Tai Egypt desh te thaka Heliopolis laga pobitro khamba khan bhangi dibo aru Egypt laga debodebi khan laga mondir khan te jui lagai dibo.’” a a v13 Yate “Beth-shemesh” (“suryo laga ghor”) tu Greek manuh khan pora Heliopolis koi diya Egypt laga sheher ase, Egypt laga suryo puja laga kendro—Judah te thaka eke nam laga sheher nohoi.