Joubü Shuong Ijep to Satkei
Johan hoba amaibü shuongei Jeremia to kokshoua lauda dogo laukei, seneibü Bouei hao ahauti dogo lenkei, hoba Baruk khulimbo shed phokukei; kheijinei joubü shuong pendou Ijep to leikei, Jeremia si haoen yoa. Tahpenesa Nebukadnezareibü bamang phola kaonyeka haoei laang khünkei. Haoen satbü dangbou kho haoen phaito louada.
43 1Ladang Jeremiaei mütshuong pendou to haoeneibü Bou ngüh pendou, haoeneibü Bouei haoen to lenla hautibü ngüh pendou lenkhümbei, 2Hoshaia shou Azaria, Karea shou Johan hoba amaibü haanbü shuong pendouei Jeremia to laukei, “No kokshoua lauda! Seneibü Bouei no to, ‘Kanei Ijepa kila amautishi,’ dogo lenla ahauti. 3Lausikei künei Babilonbü la khümbo kula, kün haitila ayingsi Babilon to langsenbü shanga Neria shou Barukei kün to dangbou la yeila no to sekokda.”
4Kheijinei Karea shou Johan hoba sepai lajamleibü shuong pendou hoba mütshuong pendouei Jihuda kaoa kila shanga seneibü Bouei ngüha ale. 5Kheijinei Karea shou Johan hoba sepai lajamleibü shuong pendouei, haoen lintikei phang pendou ka Jihuda kaoa kila shanga sepeinyu longeibü Jihuda joubü shuong pendou leibakei— 6bousu shuong, yaksa shuong, chilang, Chobaeibü nouyangshou shuong hoba lombou shuong leiyeibou Nebuzaradanei Shapaneibü shi, Ahikam shou Gedalia yoa apyobü müt pendou, hoba thuseibou Jeremia si Neria shou Baruk yoan leikei. 7Hibü haoen seneibü Bouei ngüha aleko Ijep kaodak to atkei, hoba Tahpenes sühko loukei.
8Hobaje Tahpenesa Jeremia jungto seneibü Boueibü ngüh louan laukei,
9“Kaibü ika laang yaangbü louan Jihudabü shuongei chühshanga Tahpenesa Farao chem koukhün kibü tham juokbü laanga, khünei kaoa kho khünashi. 10Hobaje haoen to lenshi, ‘Thükenbou Bunyubou, Israel seneibü Bouei hai lauda: Chühashi, ngei kü khangenbou Babilon Choba Nebukhadnezar ngala hautida, hoba ngei haoeibü Choba setshang hanei kü khünbü habü laang thüka kümlabü, hoba haoei khünei thüka haoeibü Choba pangkhüm shenlabü. 11Haoei louan Ijep to ngümlabü: hailabü shanga kibü shuong la hailabü, langsenbü shanga kibü shuong la langsenbü, inei haitilabü shanga kibü shuong la inei haitilabü. 12Ngei Ijepbü mühghaü shuong chem to wan juoklabü; hoba Nebukhadnezarei khünei kho juokan sungenlabü. Haoei sanlombüei jembü neisimei yuklepbü tegü Ijep kaodak hao himshuong yoshailabü, hoba khüto maibüei meimeijung haulabü. 13Hoba haoei Ijep kaodaka kibü Heliopolis saopobü laang thaonyu shuong jangnyinlabü, hoba Ijepbü mühghaü shuong chem wan juoklabü.’ ” a a v13 Hanei “Bethshemesh” (“chanyu chem”) kho Grikbüei Heliopolis dogo ngabü Ijepbü sangnyu ki, Ijepbü chanyu khangenbü thükkaen—Jihudaa kibü nyen tegübü sangnyu aying.
