Jeremiah 42

42 ¹Nígbà náà ni gbogbo àwọn olórí ọmọ ogun, pẹ̀lú Johanani ọmọ Kareah àti Jesaniah ọmọ Hoṣaiah, àti gbogbo àwọn ènìyàn, láti èyí tí ó kéré jù dé èyí tí ó tóbi jù, súnmọ́ tòsí, ²wọ́n sì wí fún Jeremiah wòlíì náà pé, “Jọ̀wọ́ ẹ gbọ́ ẹ̀bẹ̀ wa: ẹ gbàdúrà sí Baba yín fún wa, fún gbogbo àwọn ìyókù yìí—nítorí àwa kéré níye nínú ọ̀pọ̀, gẹ́gẹ́ bí ẹ ti ń rí, ³kí Baba yín kí ó lè fi ọ̀nà tí a ó máa tọ̀ àti ohun tí a ó ṣe hàn wá.”

⁴Jeremiah wòlíì náà wí fún wọn pé, “Èmi ti gbọ́ yín. Èmi yóò gbàdúrà sí Baba yín gẹ́gẹ́ bí ẹ ti béèrè, èmi yóò sì sọ ohun gbogbo tí Baba yín bá dáhùn fún yín, èmi kì yóò fi ohunkóhun pamọ́.”

⁵Wọ́n wí fún Jeremiah pé, “Kí Baba wa kí ó jẹ́ ẹlẹ́rìí òdodo àti olóòtítọ́ sí wa bí àwa kò bá ṣe gẹ́gẹ́ bí ohun gbogbo tí Baba yín rán yín láti sọ fún wa. ⁶Yálà ó dára tàbí ó burú, àwa yóò gbọ́ ohùn Baba wa, ẹni tí àwa rán yín sí, kí ó baà dára fún wa nígbà tí àwa bá gbọ́ ohùn Baba wa.”

⁷Ní ìparí ọjọ́ mẹ́wàá, ọ̀rọ̀ Baba wa tọ Jeremiah wá. ⁸Ó sì pe Johanani ọmọ Kareah, gbogbo àwọn olórí ọmọ ogun tí ó wà pẹ̀lú rẹ̀, àti gbogbo àwọn ènìyàn, láti èyí tí ó kéré jù dé èyí tí ó tóbi jù,

⁹ó sì wí pé, “Báyìí ni Baba wa ti Israẹli, ẹni tí ẹ rán mi sí láti gbé ẹ̀bẹ̀ yín kalẹ̀ níwájú rẹ̀, wí pé:

¹⁰Bí ẹ bá dúró ní ilẹ̀ yìí nítòótọ́, èmi yóò gbé yín ró, èmi kì yóò wó yín palẹ̀; èmi yóò gbìn yín, èmi kì yóò fà yín tu—nítorí èmi ti ronúpìwàdà nípa àjálù tí mo mú bá yín.

¹¹Ẹ má ṣe bẹ̀rù ọba Babeli tí ẹ ń bẹ̀rù nísinsìnyí. Ẹ má ṣe bẹ̀rù rẹ̀, ni Baba wa wí, nítorí èmi wà pẹ̀lú yín láti gbà yín là àti láti gbà yín sílẹ̀ kúrò ní ọwọ́ rẹ̀.

¹²Èmi yóò ṣàánú fún yín, kí ọba Babeli kí ó baà ṣàánú yín, kí ó sì jẹ́ kí ẹ padà sí ilẹ̀ yín.

¹³Ṣùgbọ́n bí ẹ bá wí pé, ‘Àwa kì yóò dúró ní ilẹ̀ yìí,’ tí ẹ kò gbọ́ ohùn Baba yín, ¹⁴tí ẹ ń wí pé, ‘Rárá, àwa yóò lọ sí Ẹjibiti, níbi tí àwa kì yóò ti rí ogun, tí a kì yóò gbọ́ ìró fèrè, tí ebi oúnjẹ kì yóò pa wá, àwa yóò sì máa gbé ibẹ̀,’ ¹⁵nígbà náà ẹ gbọ́ ọ̀rọ̀ Baba wa, ẹ̀yin ìyókù Juda. Báyìí ni Baba àwọn ọmọ ogun ọ̀run, Baba Israẹli wí: Bí ẹ bá ti pinnu láti lọ sí Ẹjibiti láti máa gbé ibẹ̀, ¹⁶nígbà náà idà tí ẹ ń bẹ̀rù yóò lé yín bá ní Ẹjibiti, ìyàn tí ẹ ń páyà rẹ̀ yóò tẹ̀lé yín lọ sí Ẹjibiti, ẹ ó sì kú síbẹ̀. ¹⁷Gbogbo àwọn tí ó pinnu láti máa gbé Ẹjibiti yóò kú nípa idà, ìyàn, àti àjàkálẹ̀-àrùn; kò sí ẹni tí yóò yè tàbí tí yóò bọ́ lọ́wọ́ àjálù tí èmi yóò mú bá wọn.

¹⁸Báyìí ni Baba àwọn ọmọ ogun ọ̀run, Baba Israẹli wí: Gẹ́gẹ́ bí ìbínú àti ìrunú mi ti dà jáde sórí àwọn ènìyàn Jerusalẹmu, bẹ́ẹ̀ ni ìrunú mi yóò dà jáde sórí yín nígbà tí ẹ bá wọ Ẹjibiti. Ẹ ó sì di ohun ègún, ìpayà, ẹ̀gàn, àti ìtìjú, ẹ kì yóò sì tún rí ibí yìí mọ́.”

¹⁹“Baba wa ti sọ fún yín, ẹ̀yin ìyókù Juda pé: Ẹ má ṣe lọ sí Ẹjibiti. Ẹ mọ̀ dájúdájú pé mo kìlọ̀ fún yín lónìí. ²⁰Ẹ ti tan ara yín jẹ sí ìparun ẹ̀mí yín, nítorí ẹ rán mi sí Baba yín, ẹ ń wí pé, ‘Gbàdúrà fún wa sí Baba wa; ohunkóhun tí ó bá wí, sọ fún wa, àwa ó sì ṣe é.’ ²¹Lónìí mo ti sọ fún yín, ṣùgbọ́n ẹ kò gbọ́ ohùn Baba yín nínú ohunkóhun tí ó rán mi láti sọ fún yín. ²²Nítorí náà ẹ mọ̀ dájúdájú pé: ẹ ó kú nípa idà, ìyàn, àti àjàkálẹ̀-àrùn ní ibi tí ẹ fẹ́ láti máa gbé.”