Ubanmu Ya Yi Gargaɗi ta Wurin Irmiya

Sojojin Masar sun janye Babilawa, Urushalima kuwa ta sa zuciya; Irmiya ya kawo maganar Ubanmu cewa za su dawo su ƙone birnin. Yana barin birni domin al'amarin iyalinsa, sai aka kama shi a matsayin mai gudu zuwa wajen abokan gaba, aka yi masa duka, aka sa shi a kurkuku. Zedekiya ya tambaye shi a ɓoye ko akwai magana, ya sami mai tsanani, ya kuma ba shi abinci.

Babi na 37.

Zedekiya ɗan Yosiya ya yi sarauta a maimakon Koniya ɗan Yehoyakim, wanda Nebukadnezzar sarkin Babila ya naɗa sarki a ƙasar Yahuda. Amma ko shi, ko fadawansa, ko mutanen ƙasar, ba su kula da maganar Ubanmu da aka faɗa ta wurin annabi Irmiya ba.

Sarki Zedekiya ya aiki Yehukal ɗan Shelemiya da Zefaniya ɗan Ma'aseiya firist wurin annabi Irmiya su ce, “Muna roƙonka, ka yi mana addu'a ga Ubanmu.”

A lokacin Irmiya yana ta kai da kawowa cikin mutane, gama ba a riga an sa shi a kurkuku ba. Mayaƙan Fir'auna kuwa suka fito daga Masar. Da Babiloniyawa da suke kewaye da Urushalima suka ji labari, sai suka janye daga Urushalima.

Sai maganar Ubanmu ta zo wurin annabi Irmiya cewa,

Ga abin da Ubanmu na Isra'ila yake cewa, Ka faɗa wa sarkin Yahuda wanda ya aike ka wurina ka tambaye ni cewa, Mayaƙan Fir'auna da suka fito domin su taimake ka, suna komawa gida ƙasarsu ta Masar. Sa'an nan Babiloniyawa za su dawo su yaƙi wannan birni, su ƙwace shi, su kuma ƙone shi da wuta.

Ga abin da Ubanmu yake cewa, Kada ku ruɗi kanku, kuna cewa, “Lalle Babiloniyawa za su rabu da mu.” Ba za su rabu ba. Ko da kun hallaka dukan mayaƙan Babila da suke yaƙe ku, har waɗanda suka ji rauni kaɗai suka ragu cikin tentunansu, za su tashi su ƙone wannan birni da wuta.

An Kama Irmiya Aka Sa shi a Kurkuku

To, sa'ad da mayaƙan Babila suka janye daga Urushalima saboda mayaƙan Fir'auna, sai Irmiya ya fita daga Urushalima zuwa ƙasar Benyamin domin ya karɓi rabonsa a can cikin mutane. Da ya kai Ƙofar Benyamin, sai shugaban masu gadi mai suna Iriya ɗan Shelemiya ɗan Hananiya ya kama annabi Irmiya ya ce, “Kana gudu zuwa wurin Babiloniyawa ne!”

Irmiya ya ce, “Ƙarya ce! Ba na gudu zuwa wurin Babiloniyawa.” Amma Iriya bai kula da shi ba, sai ya kama Irmiya ya kai shi wurin shugabanni.

Shugabannin kuwa suka yi fushi da Irmiya, suka yi masa dūka, suka sa shi a kurkuku a gidan Yonatan marubuci, wanda aka mai da shi kurkuku.

Haka Irmiya ya shiga ɗakunan ƙarƙashin ƙasa na kurkukun, a can kuma ya kwana kwanaki masu yawa. Sa'an nan Sarki Zedekiya ya aika aka fito da shi. Sarki ya tambaye shi a ɓoye a cikin fada ya ce, “Akwai wata magana daga wurin Ubanmu?” Irmiya ya ce, “Akwai. Za a bashe ka ga sarkin Babila.”

Irmiya ya tambayi Sarki Zedekiya ya ce, “Yaya na yi maka zunubi, ko ga fadawanka, ko ga wannan jama'a, da ka sa ni a kurkuku? Ina annabawanku yanzu, waɗanda suka yi annabci cewa, ‘Sarkin Babila ba zai zo yaƙe ku ko wannan ƙasa ba’? Yanzu ina roƙonka, ka saurare ni, ya ranka yă daɗe sarki. Bari roƙona yă kai gare ka, kada ka mai da ni gidan Yonatan marubuci, don kada in mutu a can.”

Sai Sarki Zedekiya ya ba da umarni, suka sa Irmiya a filin masu gadi, suna ba shi gurasa guda kowace rana daga titin masu tuya, har sai da gurasar birnin ta ƙare. Haka Irmiya ya zauna a filin masu gadi.