Nna anyị Dọrọ Aka na Ntị site nʼaka Jeremaya

Usuu ndị agha Ijipt dọpụrụ ndị Babilọn pụọ, Jerusalem nwekwa olileanya; Jeremaya wetara okwu Nna anyị na ha ga-alọghachi gbaa obodo ahụ ọkụ. Mgbe ọ na-apụ maka ihe gbasara ezinụlọ ya, e jidere ya dịka onye na-agbapụ agbapụ, tie ya ihe, tụba ya nʼụlọ mkpọrọ. Zedekaya jụrụ ya na nzuzo maka okwu, nata okwu siri ike, ma nye ya nri.

Isi 37.

Zedekaya nwa Josaya ghọrọ eze nʼọnọdụ Konaya nwa Jehoiakim, onye Nebukadneza eze Babilọn mere ka ọ bụrụ eze nʼala Juda. Ma ya onwe ya, ndị ohu ya, na ndị bi nʼala ahụ egeghị ntị nʼokwu Nna anyị nke o kwuru site nʼaka Jeremaya onye amụma.

Eze Zedekaya zigaara Jeremaya onye amụma Jehukal nwa Shelemaya na Zefanaya nwa Maaseya onye nchụaja, sị, “Biko, kpeere anyị ekpere nʼebe Nna anyị nọ.”

Nʼoge ahụ, Jeremaya ka na-abịa na-apụ nʼetiti ndị mmadụ, nʼihi na a tụbebeghị ya nʼụlọ mkpọrọ. Ndị agha Fero esitela nʼIjipt pụọ; mgbe ndị Babilọn nọ na-agba Jerusalem gburugburu nụrụ akụkọ ya, ha si na Jerusalem wezuga onwe ha.

Mgbe ahụ, okwu Nna anyị rutere Jeremaya onye amụma, sị:

Ihe ndị a ka Nna anyị nke Izrel na-ekwu: Gwa eze Juda onye zitere unu ka unu jụọ m ajụjụ, sị, Ndị agha Fero nke pụtara inyere unu aka na-alaghachi nʼala ha, bụ Ijipt. Mgbe ahụ, ndị Babilọn ga-alọghachi buso obodo a agha, dọta ya nʼagha, surekwaa ya ọkụ.

Ihe ndị a ka Nna anyị na-ekwu: Unu arafula onwe unu, na-asị, “Ndị Babilọn aghaghị isi nʼebe anyị nọ pụọ”—nʼihi na ha agaghị apụ. Ọ bụrụgodu na unu etigbuo ndị agha Babilọn niile na-ebuso unu agha, ebe ọ bụ naanị ndị merụrụ ahụ fọdụrụ nʼụlọ ikwu ha, ha ga-ebili surekwaa obodo a ọkụ.

A Jidere Jeremaya ma Tụba Ya nʼỤlọ Mkpọrọ

Ugbu a, mgbe ndị agha Babilọn si na Jerusalem wezuga onwe ha nʼihi ndị agha Fero, Jeremaya hapụrụ Jerusalem pụọ gawa nʼala Benjamin, ka ọ nweta oke ya nʼebe ahụ nʼetiti ndị mmadụ. Mgbe o ruru nʼỌnụ Ụzọ Ama Benjamin, onyeisi ndị nche aha ya bụ Irija nwa Shelemaya nwa Hananaya jidere Jeremaya onye amụma, sị, “Ị na-agbakwuru ndị Babilọn!”

Jeremaya sịrị, “Ọ bụ ụgha! Anaghị m agbakwuru ndị Babilọn.” Ma Irija egeghị ya ntị, o jidere Jeremaya, kpọrọ ya gakwuru ndịisi ọchịchị.

Ndịisi ọchịchị were iwe megide Jeremaya, tie ya ihe, tụba ya nʼụlọ mkpọrọ nʼụlọ Jonatan odeakwụkwọ, bụ ụlọ e mere ka ọ bụrụ ụlọ mkpọrọ.

Ya mere, Jeremaya banyere nʼụlọ mkpọrọ dị nʼokpuru ala, nʼime ọnụ ụlọ ndị ahụ, nọrọ nʼebe ahụ ọtụtụ ụbọchị. Mgbe ahụ, Eze Zedekaya ziri ozi ka a kpọta ya. Eze ahụ jụrụ ya ajụjụ na nzuzo nʼụlọeze ya, sị, “O nwere okwu ọbụla si nʼebe Nna anyị nọ?” Jeremaya zara sị, “E nwere.” Ọ sịrị, “A ga-arara gị nye nʼaka eze Babilọn.”

Jeremaya jụrụ Eze Zedekaya, sị, “Olee mmehie m mehiere megide gị, na megide ndị ohu gị, na megide ndị a, nke mere i ji tụba m nʼụlọ mkpọrọ? Olee ebe ndị amụma unu nọ ugbu a, bụ ndị buru amụma sị, ‘Eze Babilọn agaghị abịakwute unu maọbụ bịakwute ala a’? Ma ugbu a, biko gee m ntị, onyenwe m eze: ka arịrịọ m ruo gị nʼobi—ezighachikwala m nʼụlọ Jonatan odeakwụkwọ, ka m ghara ịnwụ nʼebe ahụ.”

Eze Zedekaya nyere iwu, ha etinye Jeremaya nʼogige ndị nche, na-enyekwa ya otu ogbe achịcha kwa ụbọchị site nʼokporo ámá ndị na-eme achịcha, ruo mgbe achịcha niile dị nʼobodo ahụ gwụrụ. Ya mere, Jeremaya nọgidere nʼogige ndị nche.