எரேமியா 37

37 ¹பாபிலோன் ராஜாவாகிய நேபுகாத்நேச்சார் யூதாவின் தேசத்தில் ராஜாவாக்கின, யோயாக்கீமின் குமாரனாகிய கோனியாவுக்குப் பதிலாக, யோசியாவின் குமாரனாகிய சிதேக்கியா ஆண்டான். ²ஆனாலும் அவனாகிலும், அவனுடைய ஊழியக்காரராகிலும், தேசத்தின் ஜனங்களாகிலும், தீர்க்கதரிசியாகிய எரேமியா மூலமாய் எங்கள் பிதா சொன்ன வார்த்தைகளுக்குச் செவிகொடுக்கவில்லை.

³ராஜாவாகிய சிதேக்கியா, செலேமியாவின் குமாரனாகிய யூகாலையும், ஆசாரியனாகிய மாசெயாவின் குமாரனாகிய செப்பனியாவையும் தீர்க்கதரிசியாகிய எரேமியாவினிடத்திற்கு அனுப்பி: “எங்கள் பிதாவை நோக்கி எங்களுக்காக விண்ணப்பம்பண்ணும்” என்று சொல்லச்செய்தான்.

⁴அப்பொழுது எரேமியா ஜனங்களுக்குள்ளே போக்கும் வரத்துமாயிருந்தான்; அவர்கள் அவனை இன்னும் சிறையில் அடைக்கவில்லை. ⁵பார்வோனுடைய சேனை எகிப்திலிருந்து புறப்பட்டு வந்திருந்தது; எருசலேமை முற்றிக்கை போட்டிருந்த கல்தேயர் அதைக் கேள்விப்பட்டபோது, எருசலேமை விட்டுத் திரும்பிப்போனார்கள்.

⁶அப்பொழுது எங்கள் பிதாவின் வார்த்தை தீர்க்கதரிசியாகிய எரேமியாவுக்கு உண்டாகி, அவர் சொன்னதாவது:

⁷இஸ்ரவேலின் எங்கள் பிதா சொல்லுகிறது என்னவென்றால்: என்னிடத்தில் விசாரிக்கும்படி உங்களை அனுப்பின யூதாவின் ராஜாவினிடத்தில் நீங்கள் சொல்லவேண்டியது: இதோ, உங்களுக்கு உதவிசெய்யப் புறப்பட்டுவந்த பார்வோனுடைய சேனை தன் தேசமாகிய எகிப்துக்குத் திரும்பிப்போகும். ⁸அப்பொழுது கல்தேயர் திரும்பிவந்து, இந்த நகரத்தின்மேல் யுத்தம்பண்ணி, அதைப் பிடித்து, அக்கினியால் சுட்டெரிப்பார்கள்.

⁹எங்கள் பிதா சொல்லுகிறது என்னவென்றால்: ‘கல்தேயர் நிச்சயமாய் நம்மைவிட்டுப் போய்விடுவார்கள்’ என்று சொல்லி உங்களை நீங்களே ஏமாற்றிக்கொள்ளாதேயுங்கள்; அவர்கள் போகமாட்டார்கள். ¹⁰உங்களோடே யுத்தம்பண்ணுகிற கல்தேயருடைய சேனையையெல்லாம் நீங்கள் முறியடித்தாலும், அவர்களில் காயப்பட்டவர்கள்மாத்திரம் தங்கள் கூடாரங்களில் மீதியாயிருந்தாலும், அவர்கள் எழும்பி, இந்த நகரத்தை அக்கினியால் சுட்டெரிப்பார்கள்.

எரேமியா கைதுசெய்யப்பட்டு சிறையிலடைக்கப்படுதல்

¹¹பார்வோனுடைய சேனையினிமித்தம் கல்தேயருடைய சேனை எருசலேமைவிட்டு நீங்கிப்போனபோது, ¹²எரேமியா ஜனங்களின் நடுவே அங்கே தன் பங்கை அடையும்படி பென்யமீன் தேசத்திற்குப் போகும்படி எருசலேமிலிருந்து புறப்பட்டான். ¹³அவன் பென்யமீன் வாசலில் வந்தபோது, அனனியாவின் குமாரனாகிய செலேமியாவின் மகனான யீரியா என்னும் காவற்சேனையின் தலைவன் அங்கே இருந்து, தீர்க்கதரிசியாகிய எரேமியாவைப் பிடித்து: “நீ கல்தேயரிடத்திற்குத் தப்பியோடிப்போகிறாய்!” என்றான்.

¹⁴அதற்கு எரேமியா: “அது பொய்! நான் கல்தேயரிடத்திற்குத் தப்பியோடிப்போகிறதில்லை” என்றான்; ஆனாலும் யீரியா அவன் சொல்லைக் கேளாமல், எரேமியாவைப் பிடித்து, அவனைப் பிரபுக்களிடத்திற்குக் கொண்டுபோனான்.

¹⁵பிரபுக்கள் எரேமியாவின்மேல் கோபங்கொண்டு, அவனை அடித்து, சிறைச்சாலையாக்கப்பட்டிருந்த யோனத்தான் என்னும் எழுத்தனுடைய வீட்டில் அவனைக் காவலில் வைத்தார்கள்.

¹⁶இப்படியாக எரேமியா நிலவறையின் புற்றறைகளுக்குள் போனான்; அங்கே அநேகநாள் இருந்தான். ¹⁷பின்பு ராஜாவாகிய சிதேக்கியா ஆள் அனுப்பி, அவனை வரவழைத்து, தன் அரமனையில் இரகசியமாய் அவனை விசாரித்து: “எங்கள் பிதாவினிடத்திலிருந்து ஏதாகிலும் வார்த்தை உண்டா?” என்று கேட்டான். அதற்கு எரேமியா: “உண்டு; நீர் பாபிலோன் ராஜாவின் கையில் ஒப்புக்கொடுக்கப்படுவீர்” என்றான்.

¹⁸மேலும் எரேமியா ராஜாவாகிய சிதேக்கியாவை நோக்கி: “நீர் என்னைக் காவலில் வைக்கத்தக்கதாக நான் உமக்கு விரோதமாகவும், உம்முடைய ஊழியக்காரருக்கு விரோதமாகவும், இந்த ஜனத்திற்கு விரோதமாகவும் என்ன பாவம் செய்தேன்? ¹⁹‘பாபிலோன் ராஜா உங்களுக்கு விரோதமாகவும் இந்த தேசத்திற்கு விரோதமாகவும் வரமாட்டான்’ என்று உங்களுக்குத் தீர்க்கதரிசனம் சொன்ன உங்கள் தீர்க்கதரிசிகள் இப்பொழுது எங்கே? ²⁰இப்போதும் ராஜாவாகிய என் ஆண்டவனே, தயவுசெய்து எனக்குச் செவிகொடும்; என் விண்ணப்பம் உமக்கு முன்பாக ஏற்றுக்கொள்ளப்படுவதாக; நான் அங்கே சாகாதபடிக்கு, என்னை எழுத்தனாகிய யோனத்தானுடைய வீட்டிற்குத் திரும்ப அனுப்பிவிடாதேயும்” என்றான்.

²¹அப்பொழுது ராஜாவாகிய சிதேக்கியா கட்டளையிட, அவர்கள் எரேமியாவைக் காவற்சாலையின் முற்றத்தில் வைத்து, நகரத்தின் அப்பமெல்லாம் தீர்ந்துபோகுமளவும், அப்பஞ்சுடுகிறவர்களுடைய வீதியிலிருந்து அனுதினமும் ஒரு அப்பத்தை அவனுக்குக் கொடுக்கச்செய்தார்கள். இப்படியாக எரேமியா காவற்சாலையின் முற்றத்தில் தங்கியிருந்தான்.