Jeremiah 37

37 ¹Josiahwui naomayara Zedekiahna Jehoiakimwui naomayara Coniahwui mahutli munga. Ali Babylonwui awunga Nebuchadnezzarna Judah ngaleili awunga sāhaowa. ²Kha ana, awui raobing, lah ngalei chiwui mibingnala, Jeremiah marānli hāngngasakkahai ithumwui Avāwui tui chi makhanganāna.

³Awunga Zedekiahna Shelemiahwui naomayara Jehucal kala Ma-aseiahwui naomayara pāngmon Zephaniahli Jeremiah marānli chihovāda hānga, "Ina kapona, ithumwui vang ithumwui Avāli seihā sāmilu."

⁴Chitharan Jeremiahna mibingwui ngachaili rāda vāda leisai; athumna ali phātopli mazangrangsai. ⁵Pharaohwui raimibingna Egyptwui eina zatphoka; Jerusalemli kuinamda leikasā Babylonwui raimibingna chi shā tharan, Jerusalemwui eina ngalanthuihaowa.

⁶Chieina ithumwui Avāwui tui chi Jeremiah marānli rāhānga:

⁷Israelwui ithumwui Avāna hithāda hānga: Nathumli ili ngahān khavai chihovai Judahwui awungali hānglu, Nathumli khangachon khavai zatphok kahai Pharaohwui raimibing chi athumwui ngalei Egyptli latungra. ⁸Chieina Babylonwui raimibing latungda keinung hili ngararda, chi khuihailaga mei eina thottāra.

⁹Ithumwui Avāna hithāda hānga: Nathum khalatta maminamalu, "Babylonnaobingna ithumwui eina ngalanthuiphara" da hānglaga, kaja athum mangalanmara. ¹⁰Nathumli ngarar kasā Babylonwui raimibing saikorali nathumna shaothatrala, kala khamā za̱kasā mibing maningkha athumwui kachonshimli ngachakyānglala, athum ngakarthuida keinung hili mei eina thottāra.

Jeremiahli Tukkhuida Phātopli Sanghaina

¹¹Chitharan Pharaohwui raimibingwui vang eina Babylonwui raimibingna Jerusalemwui eina ngalanthuikahai atamli, ¹²Apam chili mibingwui ngachaili awui sharuk khuikhavai Jeremiahna Jerusalemwui eina Benjamin ngaleili shanga. ¹³Benjamin ngaveili, khamayona kathāna, Hananiahwui ara̱ Shelemiahwui naomayara Irijahna Jeremiah marānli tukkhuida hānga, "Na Babylonnaobingli yāmsangda kajina!"

¹⁴Jeremiahna hānga, "Kapik! Ina Babylonnaobingli mayāmsangmara." Kha Irijahna awui tui makhuisangla Jeremiahli tukkhuida wungnaobingli khuivai.

¹⁵Wungnaobingna Jeremiahli malungvāthaoda, ali shaoshaomihailaga, phātop khavai sākahai kapime Jonathanwui shimli sanghai.

¹⁶Chithāda Jeremiahna phātopshimwui alungkayāng pambingli zangda, chili chirankha pamkahaina. ¹⁷Chieina Awunga Zedekiahna ali ahokhui ngasakta khuishokmi. Awungana ali konungli ngathumsāda ngahāna, "Ithumwui Avāwui eina tui leila?" "Lei," da Jeremiahna hānga. "Na Babylonwui awungawui pāngli horsangmihaora."

¹⁸Jeremiahna Awunga Zedekiahli ngahāna, "Nawui mangāli, nawui raobingwui mangāli, kala mi hiwui mangāli ina khi morei sāhaoda, nana ili phātopli sangmikhala? ¹⁹Nawui marānbing, 'Babylon awungana nathumtungli, kala ngalei hili marāmara' da marānmikahaibing ara kachili lei? ²⁰Ili nganāmilu, ishamei awunga: iwui kapo nawui mangāli kāshungranu; Jonathan kapimewui shimli ili makachihovāmilu, chithakha ina chili mathimara."

²¹Awunga Zedekiahna kaso mihaowa, chieina athumna Jeremiahli mayon khavai yāngkhupli sanghaowa, kala keinung chiwui kashakazā saikora yaongakānranglakha eina tangda kashakazā sākabingwui chānrei eina thangkachida khamuihāng akharip ali mihaowa. Chithāda Jeremiahna mayon khavai yāngkhupli pamsai.