Seneibü Bouei Jeremia Danko Kaangko Lauda
Ijepbü lakjaibüei Babilonbü satenan sepeila kujinei, Jerusalem maanglemkei; lausikei Jeremiaei haoen touje louiban ho sangnyu wanei juoklabü dogo seneibü Bou ngüh louibakei. Chem kümsilei shanga louko hauko kijinei, hao soletbü dogo lapan, ngümbei hoba khinkukei. Zedekiaei huphangshoua ngüh che phekei, kaangbü che hapkei, hoba hao la bamang ngetkei.
37 1Babilon Choba Nebukadnezarei Jihuda kaoa Choba yeitibü Josia shou Zedekiaei Jehoiakim shou Konia jeila songdakkei. 2Lausikei hao, hao khangenbü shuong, hoba kaodak kabü mütshuongeikei thuseibü Jeremia danko Boueibü lenbü ngüha ale.
3Zedekia Chobaei Shelemia shou Jehucal hoba ungshedbou Maaseia shou Zephania thuseibü Jeremia jungto hautian laukei, “Sanoudambo kün shanga seneibü Bou to welaukuashi.”
4Jeremia tou mütshuong yoa louko hauko kikei; haoenei hao thüngdang to mojinko kikei. 5Faraoeibü lakjaibü Ijep ka angkei; hobaje Jerusalem komlepan kibü Babilonbüei kho ditkei, haoen Jerusalem ka sepeinyu longeikei.
6Hobaje Boueibü ngüh thuseibü Jeremia jungto louan laukei:
7Israel seneibü Bouei hai lauda: Kan to ngo phela shanga hautibü Jihuda Choba to lenashi, Kan to thuila angbü Faraoeibü lakjaibü Ijep kaodak to sepeinyu ngailabü. 8Hobaje Babilonbüei sepeinyu longean ho sangnyu khulimbo wapyolabü, hoba kho lelabü, hoba wana juoklabü.
9Seneibü Bouei hai lauda: Kan lulu tekhüpbolangjan, “Babilonbü maimaitham kün jungka kukalabü” dogo lauko; haoen akukalabü. 10Kan to wapyobü Babilonbü lakjaibü tan pendou kanei haitisikei, hoba haoeneibü neichema kaangko leilubü müt lolo joulonga, haoen loenan ho sangnyu wana juoklabü.
Jeremia Lapan Thüngdang to Jinkubü
11Hobaje ladang Faraoeibü lakjaibü shanga Babilonbü lakjaibü Jerusalem ka sepeinyu longeikei, 12Jeremia Benjamin kaoa mütshuong lühbaka haoeibü phet lela shanga Jerusalem ka meimeijung haukei. 13Benjamin Bakhüna, lombou leiyeibou Hanania shou Shelemia shou Irija kibou thuseibü Jeremia lapan laukei, “Nyi Babilonbü jungto satan hauda!”
14Jeremiaei laukei, “Yepeijawek! Ngo Babilonbü jungto asatlabü.” Lausikei Irijaei hao to ngüha ale, haoei Jeremia lapan jaishou shuong jungto leian haukei.
15Jaishou shuongei Jeremia to khauangkei, hoba hao to ngümbei, hoba thüngdang to kümbü Ngühkhüm lenbou Jonathan chema hao jailean phokei.
16Hibü Jeremia thüngshang laangpob chem to atkei, hoba lanei haoei chalou juong thüngkei. 17Hobaje Zedekia Chobaei hao leila hautikei, hoba haoenei hao leibakei. Chobaei hao to chem phanga huphanga pheyoko laukei, “Seneibü Bou ka ngüh che kia lo?” Jeremiaei laukei, “Kia. Nyi Babilon Choba ika khümbo kuan aplabü.”
18Jeremiaei Zedekia Choba to laukei, “Kanei ngo jaila lele, ngei no khulimbo, kaibü khangenbü shuong khulimbo, ayingsi ho mütshuong khulimbo ai shabü shona? 19‘Babilon Choba kan khulimbo ayingsi ho kaodak khulimbo alonglabü’ dogo tetenbü ngüh laubü kaneibü thuseibü shuong touje laeto kia? 20Sanoudambo kü ngüh ditashi, ngeibü bunyu Choba: ngeibü subüjabü kaibü thedanga longtiashi, ngo Ngühkhüm lenbou Jonathan chem to tongde angaitijan, aying tegü ngo lanei hailabü.”
21Hobaje Zedekia Chobaei ngühkhüm kukei, hoba haoenei Jeremia lombou shuong khonga phokei, hoba sangnyu kabü wentek wanjung sühko, wentek ngoubü shuongeibü khongchi ka chaangbou hao la wentek che che kukei. Hibü Jeremia lombou shuong khonga thüngkei.
