Tata wetu Wukebila Mu Nzila ya Yelemiya
Dibuka dya basuta ba Ngiphiti dyisi hambula bisi Babiloni amana Yelusalemi wisi vuvila; Yelemiya wisi nata ndinga ya Tata wetu ni bawu bakavutuka amana bakayoka mbanza. Muna kwenda mu diambu dya kanda, bámukwata hanga mutu wudiheka kwena bambeni, bámubeta amana bámukotisa mu boloku. Zedekiya wisi lomba ndinga mu kitsweki, wisi tambula yimosi ya zitu, amana wisi muheka mapha.
Tata wetu kisi zonza mu mavese 7–10
37 1Sedekiya mwana wa Yozyasi wáyala mu kyandi Koniya mwana wa Yoyakimi, wuna Nebukadinesali kyamvu wa Babiloni kámuyadika kyamvu mu tsi ya Yuteya. 2Kaasi yandi, basadi bandi yi batu ba tsi, kábalemvukaku ndinga za Tata wetu zina zázonzama mu nzila ya Yelemiya mbikudi.
3Kyamvu Sedekiya wáthuma Yekali mwana wa Shelemiya yi Sefaniya mwana wa Maaseya nganga Nzambi kwena Yelemiya mbikudi, mu kuzimbula: «Lombila kwena Tata wetu kikuma kya betu.»
4Muna tangwa dina, Yelemiya wakala kwandi kwisa yi kwenda hana kati dya batu; bámukotisaku bwawu mu boloku. 5Kibuka kya baphumbulu ba Fwalawo kyálubuka mu Ngiphiti; buna bisi Babiloni bana bakala zyungila Yelusalemi báyuka bwabuna, báyombuka ku Yelusalemi.
6Amana ndinga ya Tata wetu yísa kwena Yelemiya mbikudi:
7Mama mazonzini Tata wetu wa Kiseledi: Zimbwala kwena kyamvu wa Yuteya wuna wákutuma mu kunhyula: Kibuka kya baphumbulu ba Fwalawo kina kyálubuka mu kukusadisa, kivútuka ku nzu kuna Ngiphiti. 8Amana bisi Babiloni bakavútuka amana bakanwana yi mbanza yayi, bakayikwata, amana bakayiyoka mu mbawu.
9Mama mazonzini Tata wetu: Lutotaku benu-benu, mu kuzimbula: «Kyedika, bisi Babiloni bakatusisa.» Bakatusisaku. 10Yuka ni lwáhonda kibuka kyosu kya baphumbulu ba Babiloni bana bakala lunwana, amana kaka bayakala ba phuta basala muna masombolu ma bawu, bakatelama amana bakayiyoka mbanza yayi mu mbawu.
Bakwata Yelemiya Amana Bamukotisa mu Boloku
11Muna tangwa kibuka kya baphumbulu ba Babiloni kyáyombuka ku Yelusalemi kikuma kya kibuka kya baphumbulu ba Fwalawo, 12Yelemiya wálubuka ku Yelusalemi mu kwenda ku tsi ya Benzyame, hanga katambula kitini kyandi kwakuna hana kati dya batu. 13Hana mwelu wa Benzyame, pfumu wa batsinzidi, khumbu yandi Yiliya mwana wa Shelemiya mwana wa Hananiya, wámukwata Yelemiya mbikudi, mu kuzimbula: «Ngeyi wubati lubukila kwena bisi Babiloni!»
14Yelemiya wuvutudi: «Bingumba! Yisiku lubukila kwena bisi Babiloni.» Kaasi Yiliya kámuwilaku, wámukwata Yelemiya amana wámunata kwena bapfumu.
15Bapfumu bámuyukila Yelemiya khabu, bámubeta, amana bámukotisa mu boloku, muna nzu ya Yonatani mulongi wa mitsiku, yina yákituka boloku.
16Buna Yelemiya kákota mu suku za ha tsi za boloku, kwakuna kánanga bilumbu bya lawu. 17Amana kyamvu Sedekiya wáthuma ndangu bamunata. Kyamvu wámuhyula mu kingenga muna nzu yandi, wuzimbudi: «Keti kweku ndinga yituki kwena Tata wetu?» Yelemiya wuvutudi: «Kweku. Ngeyi kabakulambula kwena kyamvu wa Babiloni.»
18Yelemiya wámuhyula kyamvu Sedekiya, wuzimbudi: «Mu khi yásumukina kwena ngeyi, kwena basadi baku, holo kwena batu baba, ndangu wákotisa meni mu boloku? 19Kweti kwenina bambikudi baku bana bábikula: “Kyamvu wa Babiloni kakakwisaku nwana yi ngeyi holo yi tsi yayi”? 20Awisa unwa, A pfumu wama kyamvu: nlombu wama watula kwena ngeyi; vutulaku meni ku nzu ya Yonatani mulongi wa mitsiku, mukuma kwakuna yikafwila.»
21Kyamvu Sedekiya wáhana muswa, amana bámusya Yelemiya muna kyanzala kya batsinzidi, bakala muheka dipha dimosi mu kosu kilumbu, mu balabala dya bayidiki ba mapha, tii yi kuna dyákonda dipha mu mbanza. Buna Yelemiya kánanga muna kyanzala kya batsinzidi.
