UJeremiya 38 FHB Father's Heart Bible™

38 ¹UShefatiya unyana kaMatan, uGedaliya unyana kaPashure, uYukali unyana kaShelemiya, noPashure unyana kaMalekiya, bamva uYeremiya exelela bonke abantu, esithi:

²Utsho uBawo wethu ukuthi: Lowo uhleli kulo mzi uya kufa likrele, yindlala, sisibetho; kodwa lowo uphuma aye kumaBhabheli uya kudla ubomi, umphefumlo wakhe ube ngamaxhoba kuye. ³Utsho uBawo wethu ukuthi: Lo mzi uya kunikwa ngenene emkhosini wokumkani waseBhabheli, awuthimbe.

⁴Bathi abathetheli kukumkani: Makabulawe lo mntu afe. Kaloku ngamazwi anjengala awathoba amandla ezandla zamadoda omkhosi aseleyo kulo mzi, nawabantu bonke. Kaloku lo mntu akafuni kulungileyo kubo, ufuna okubi.

⁵Wathi ukumkani uZedekiya: Yabonani, usesandleni senu; kaloku ukumkani akanako ukwenza nto nxamnye nani.

⁶Bamthabatha ke uYeremiya, bamphosa emhadini kaMalekiya unyana wokumkani, owawuse kwintendelezo yabalindi, bemhlisa ngezintya. Umhadi lowo wawungenamanzi, kukho udaka kuphela lodwa; waza watshona uYeremiya edakeni.

⁷Ke uEbhede-meleki umKushi, umbusi wendlu yokumkani, weva ukuba bamfaka uYeremiya emhadini. Ngelo xesha ukumkani wayehleli esangweni lakwaBhenjamin, ⁸Waphuma uEbhede-meleki endlwini yokumkani, wathetha nokumkani, wathi: ⁹Nkosi yam kumkani, la madoda enze ububi kuko konke ababenzileyo kuYeremiya umprofeti, emphosa emhadini ukuba afe yindlala; kaloku akusekho sonka emzini.

¹⁰Ukumkani wamwisela umthetho uEbhede-meleki umKushi, wathi: Thabatha amadoda angamashumi omathathu apha, uhambe nawo, umnyuse uYeremiya umprofeti emhadini engekafi.

¹¹Wawathabatha ke uEbhede-meleki amadoda, waya endlwini yokumkani, egumbini elingaphantsi kobuncwane, wathabatha izidwedwe ezindala neengubo ezonakeleyo, wazihlisa ngezintya zaya kuYeremiya emhadini. ¹²Wathi uEbhede-meleki umKushi kuYeremiya: Faka ezi zidwedwe ezonakeleyo neengubo phantsi kwamakhwapha akho, ngaphantsi kwezintya. Wenjenjalo ke uYeremiya. ¹³Bamnyusa ke uYeremiya emhadini ngezintya; wahlala uYeremiya kwintendelezo yabalindi.

Ukumkani Uva Ilizwi likaBawo wethu

¹⁴Waza ukumkani uZedekiya wathumela wabiza uYeremiya umprofeti, wamzisa esangweni lesithathu lendlu kaBawo wethu. Wathi ukumkani kuYeremiya: Ndikubuza into; uze ungandifihleli nto.

¹⁵Wathi uYeremiya kuZedekiya: Ukuba ndithe ndakuxelela, akuyi kundibulala na? Ukuba ndithe ndakunika iqhinga, akuyi kundiphulaphula.

¹⁶Wafunga ngasese ukumkani uZedekiya kuYeremiya, wathi: Ehleli nje uBawo wethu, owasenzela obu bomi, andiyi kukubulala, andiyi kukunikela esandleni sala madoda afuna umphefumlo wakho.

¹⁷Wathi uYeremiya kuZedekiya: “Utsho uBawo wemikhosi yasezulwini, uBawo wamaSirayeli, ukuthi: Ukuba uthe waphuma waya kubathetheli bokumkani waseBhabheli, uya kusinda umphefumlo wakho, lo mzi awuyi kutshiswa ngomlilo, uya kudla ubomi wena nendlu yakho. ¹⁸Kodwa ukuba uthe akwavuma ukuphuma uye kubathetheli bokumkani waseBhabheli, lo mzi uya kunikwa kumaBhabheli, awutshise, ungasindi wena esandleni sawo.”

¹⁹Wathi ukumkani uZedekiya kuYeremiya: “Ndiyawoyika amaYuda awaphambela kumaBhabheli, hleze ndinikwe esandleni sawo, andiphathe kakubi.”

²⁰Wathi uYeremiya: “Abayi kukunikela. Khawuliphulaphule izwi likaBawo wethu ngoko ndikuxelele khona, ukuze kulunge kuwe, usinde umphefumlo wakho. ²¹Kodwa ukuba uthe akwavuma ukuphuma, nalo ilizwi uBawo wethu andibonise lona:

²²Yabona! Onke amankazana aseleyo endlwini yokumkani wakwaYuda aya kukhutshelwa kubathetheli bokumkani waseBhabheli, athi: ‘Abahlobo bakho obubathembileyo bakulahlekisile, bakoyisa; iinyawo zakho zitshone edakeni, baza bakufulathela.’”

²³“Bonke abafazi bakho nabantwana bakho baya kukhutshelwa kumaBhabheli, ungasindi wena esandleni sawo, kodwa ubanjwe ngukumkani waseBhabheli, utshiswe nalo mzi ngomlilo.”

²⁴Waza uZedekiya wathi kuYeremiya: “Makungabikho bani owaziyo ngale ncoko, hleze ufe. ²⁵Ukuba abathetheli bathe beva ukuba ndithethile nawe, beza kuwe besithi: ‘Sixelele into oyithethileyo kukumkani, noko akuxelele kona; uze ungasifihleli nto, hleze sikubulale,’ ²⁶uze uthi kubo: ‘Bendicela kukumkani ukuba angandibuyiseli endlwini kaYonatan, ndiye kufela khona.’”

²⁷Beza bonke abathetheli, bambuza uYeremiya; wabaphendula ngokwaloo mazwi ebewawiselwe ngukumkani. Bathi cwaka ke, ngokuba intetho leyo yayingevakalanga. ²⁸Wahlala uYeremiya kwintendelezo yabalindi, kwada kwayimini yokuthinjwa kweYerusalem. Waba khona ke apho ekuthinjweni kweYerusalem.