Isaiah 29

29 ¹Ègbé ni fún Arieli, Arieli, ìlú tí Dafidi pàgọ́ sí! Ẹ fi ọdún kún ọdún; ẹ jẹ́ kí àwọn àjọyọ̀ máa yípo. ²Síbẹ̀ Èmi yóò pọ́n Arieli lójú, ọ̀fọ̀ àti ẹkún yóò sì wà; yóò sì dà bí ibi ìdáná pẹpẹ fún mi. ³Èmi yóò pàgọ́ yí ọ ká ní gbogbo àyíká; Èmi yóò fi odi dó tì ọ́, èmi yóò sì gbé àwọn ohun ìdótì ró sí ọ. ⁴A ó rẹ̀ ọ́ sílẹ̀; láti ilẹ̀ ni ìwọ yóò ti sọ̀rọ̀, ọ̀rọ̀ rẹ yóò sì rẹlẹ̀ nínú eruku. Ohùn rẹ yóò ti inú ilẹ̀ wá bí ti òkú, ọ̀rọ̀ rẹ yóò sì kùn jáde láti inú eruku. ⁵Ṣùgbọ́n ogunlọ́gọ̀ àwọn ọ̀tá rẹ yóò dà bí eruku wẹ́wẹ́, ogunlọ́gọ̀ àwọn aláìláàánú yóò sì dà bí ìyàngbò tí ń fò lọ. Yóò sì ṣẹlẹ̀ ní ìṣẹ́jú kan, lójijì. ⁶Baba àwọn ọmọ ogun ọ̀run yóò bẹ̀ ọ́ wò pẹ̀lú àrá àti ìmìtìtì ilẹ̀ àti ariwo ńlá, pẹ̀lú ìjì àjàgbàgbà àti ìjì líle àti ọ̀wọ́-iná tí ń jóni run. ⁷Ogunlọ́gọ̀ gbogbo àwọn orílẹ̀-èdè tí ń gbóguntì Arieli, gbogbo àwọn tí ń bá a àti odi agbára rẹ̀ jà tí wọ́n sì ń rọ ọ́ mọ́lẹ̀, yóò dà bí àlá, bí ìran òru. ⁸Yóò rí bí ìgbà tí ebi ń pa ènìyàn tí ó lá àlá pé òun ń jẹun, tí ó sì jí pẹ̀lú ebi tí kò tí ì rẹ̀; tàbí bí ìgbà tí òǹgbẹ ń gbẹ ènìyàn tí ó lá àlá pé òun ń mu omi, tí ó sì jí ní àárẹ̀, tí òǹgbẹ rẹ̀ kò tí ì sán. Bẹ́ẹ̀ ni yóò rí fún ogunlọ́gọ̀ gbogbo àwọn orílẹ̀-èdè tí ń bá Òkè Síónì jà. ⁹Ẹ dàrúdàpọ̀, kí ẹnu kí ó yà yín; ẹ fọ́ ara yín lójú kí ẹ sì fọ́jú! Wọ́n mutí yó, ṣùgbọ́n kì í ṣe fún wáìnì; wọ́n ta gbéregbère, ṣùgbọ́n kì í ṣe látàrí ọtí líle. ¹⁰Nítorí Baba wa ti dà ẹ̀mí oorun jíjìn sí yín lórí; ó ti dí ojú yín, ẹ̀yin wòlíì, ó sì ti bo orí yín, ẹ̀yin aríran. ¹¹Gbogbo ìran náà dà bí ọ̀rọ̀ inú ìwé kíká tí a fi èdìdì dì fún yín. Nígbà tí wọ́n bá fi í fún ẹni tí ó mọ̀wé kà, tí wọ́n wí pé, “Jọ̀wọ́ ka èyí,” ó wí pé, “Èmi kò lè kà á; a ti fi èdìdì dì í.” ¹²Nígbà tí a bá fi ìwé náà fún ẹni tí kò mọ̀wé kà, tí wọ́n wí pé, “Ka èyí,” ó wí pé, “Èmi kò mọ̀wé kà.”

¹³Baba Olódùmarè wí pé: “Nítorí àwọn ènìyàn yìí fi ẹnu wọn súnmọ́ mi tí wọ́n sì fi ètè wọn bọ̀wọ̀ fún mi, ṣùgbọ́n ọkàn wọn jìnnà sí mi; ìbẹ̀rù tí wọ́n bẹ̀rù mi jẹ́ òfin tí ènìyàn kọ́ wọn, ¹⁴nítorí náà, kíyè sí i, Èmi yóò tún ṣe iṣẹ́ ìyanu pẹ̀lú àwọn ènìyàn yìí, ìyanu lórí ìyanu; ọgbọ́n àwọn ọlọ́gbọ́n wọn yóò ṣègbé, òye àwọn olóye wọn yóò sì parẹ́.” ¹⁵Ègbé ni fún àwọn tí ń lọ jìnnà láti fi ète wọn pamọ́ fún Baba wa, tí wọ́n ń ṣe iṣẹ́ wọn nínú òkùnkùn, tí wọ́n ń wí pé, “Ta ni ó rí wa? Ta ni ó mọ̀ wá?”

¹⁶Báwo ni ẹ ṣe ń yí ohun gbogbo po! Ṣé a ó kà amọ̀kòkò sí bí amọ̀ rẹ̀—bí ẹni pé ohun tí a dá lè wí fún ẹni tí ó dá a pé, “Kì í ṣe òun ni ó dá mi,” tàbí ohun tí a mọ lè wí fún ẹni tí ó mọ ọ́ pé, “Kò mọ nǹkan kan”?

¹⁷Ǹjẹ́ kì í ṣe ní ìgbà díẹ̀ sí i ni a ó yí Lẹ́bánónì padà di oko ẹlẹ́so, tí a ó sì ka oko ẹlẹ́so sí igbó? ¹⁸Ní ọjọ́ náà, adití yóò gbọ́ ọ̀rọ̀ inú ìwé, ojú àwọn afọ́jú yóò sì ríran jáde kúrò nínú ìrọ̀lẹ̀ àti òkùnkùn. ¹⁹Àwọn onírẹ̀lẹ̀ yóò rí ayọ̀ tuntun nínú Baba wa, àwọn tálákà láàrin aráyé yóò sì yọ̀ nínú Ẹni Mímọ́ Israẹli, Baba wa. ²⁰Nítorí aláìláàánú kì yóò sí mọ́, ẹlẹ́gàn yóò sì dópin; gbogbo àwọn tí ọkàn wọn fà sí ibi ni a ó gé kúrò, ²¹àwọn tí wọ́n fi ọ̀rọ̀ kan sọ ènìyàn di ẹlẹ́ṣẹ̀, tí wọ́n dẹ pàkúté fún ẹni tí ń gba ẹjọ́ òdodo ró ní ẹnu ibodè, tí wọ́n sì fi àríyànjiyàn asán yí ẹni tí ó wà nínú òtítọ́ kúrò. ^a a v21 Ẹnu ibodè ìlú ni ilé ẹjọ́ ìgbàanì níbi tí a ti ń gbọ́ àríyànjiyàn òfin tí a sì ti ń ṣèdájọ́.

²²Nítorí náà, èyí ni ohun tí Baba wa, ẹni tí ó ra Abrahamu padà, wí nípa ilé Jakọbu: “Jakọbu kì yóò tún tìjú mọ́, ojú rẹ̀ kì yóò sì tún rẹ̀wẹ̀sì mọ́. ²³Nítorí nígbà tí ó bá rí àwọn ọmọ rẹ̀, iṣẹ́ ọwọ́ mi láàrin wọn, wọn yóò ya orúkọ mi sí mímọ́; wọn yóò ya Ẹni Mímọ́ Jakọbu sí mímọ́, wọn yóò sì bẹ̀rù Baba wa. ^b b v23 Nígbà tí Baba wa bá rí àwọn ọmọ rẹ̀ — tí ọwọ́ ara rẹ̀ dá — a bọ̀wọ̀ fún orúkọ rẹ̀. Ìmúpadàbọ̀sípò yóò bẹ̀rẹ̀ nígbà tí àwọn ọmọ tí ó dá bá yípadà sí i. ²⁴Àwọn tí ọkàn wọn ṣáko lọ yóò wá sí òye, àwọn tí ń kùn yóò sì gba ẹ̀kọ́.”