Isaia 29 FHB Father's Heart Bible™

29 ¹Kaĩ ũrĩ na haaro Arieli, ĩĩ Arieli, itũũra rĩrĩa Daudi aambĩire hema! Ongererai mwaka harĩ mwaka ũrĩa ũngĩ; rekei ciathĩ ithiũrũrũkage. ²No rĩrĩ, nĩngahatĩrĩria Arieli mũno, na nĩgũkaagĩa na macakaya na kĩrĩro; nake nĩagaatuĩka harĩ niĩ ta riiko rĩa kĩgongona. ³Nĩngakwamba hema ngũthiũrũrũkĩrie mĩena yoothe; nĩngakũrigiicĩria na rũthingo, na ngwambĩrĩrie mĩthiringo ya mbaara. ⁴Nĩũkanyiihio; nĩũkaaria ũrĩ thĩ, na ciugo ciaku ihooreranie thĩinĩ wa rũkũngũ. Mũgambo waku ũkoima thĩ ta wa ngoma, na mĩario yaku ĩkĩheehagĩra kuuma rũkũngũinĩ. ⁵No kĩrĩndĩ gĩa thũ ciaku nĩgĩgaatuĩka ta rũkũngũ rũhũthũ, na kĩrĩndĩ gĩa arĩa matarĩ tha gĩtuĩke ta mahuti marĩa marahurutwo nĩ rũhuho. Naguo ũndũ ũcio ũgaakĩka o rĩmwe, o narua. ⁶Nĩũgaceererwo nĩ Ithe witũ wa mbũtũ cia igũrũ, na ngwa na gĩthingithia na mũrurumo mũnene, na kĩhuhũkanio na huruta na rũrĩrĩmbĩ rwa mwaki ũrĩa ũcinaga. ⁷Nakĩo kĩrĩndĩ gĩa ndũũrĩrĩ ciothe iria irũaga mbaara na Arieli, arĩa oothe marũaga nake na kĩĩhitho gĩake na kũmũhatĩrĩria, magaatuĩka ta kĩrooto, ta kĩoneki kĩa ũtukũ. ⁸Gũgaatuĩka ta rĩrĩa mũndũ mũhũtu arootaga atĩ nĩararĩa, agĩũkĩra ngʼaragu yake ĩtarĩ ĩhũũnie; kana ta rĩrĩa mũndũ mũnyootu arootaga atĩ nĩaranyua, agĩũkĩra ahwĩrĩte, nyooto yake ĩtahoretio. Ũguo noguo gũgaatuĩka harĩ kĩrĩndĩ gĩa ndũũrĩrĩ ciothe iria irũaga na Kĩrĩma gĩa Zayuni. ⁹Gegai na mũmake; tuumithiai maitho manyu, na mũtuĩke atumumu! Nĩ arĩĩu, no ti ndibei; nĩmarĩĩndĩrĩkaga, no ti nĩ ũndũ wa njoohi ĩrĩ hinya. ¹⁰Nĩgũkorwo Ithe witũ nĩamũitĩrĩirie roho wa toro mũritũ; nĩahingĩte maitho manyu, nĩo anabii, na akahumbĩra mĩtwe yanyu, nĩo aroti. ¹¹Kĩoneki gĩothe harĩ inyuĩ nĩ ta ciugo cia gĩkũnjo kĩrĩa kĩhingĩrĩre na mũhũũri. Rĩrĩa maakĩnengera mũndũ ũrĩa ũũĩ gũthoma, makamwĩra atĩrĩ, “Thoma ũũ, ndagũthaitha,” we akoiga atĩrĩ, “Ndingĩhota; nĩkĩhingĩre na mũhũũri.” ¹²Na rĩrĩa gĩkũnjo kĩu kĩanengerwo mũndũ ũrĩa ũtooĩ gũthoma, makamwĩra atĩrĩ, “Thoma ũũ,” we akoiga atĩrĩ, “Niĩ ndiũĩ gũthoma.”

¹³Ithe witũ Mwathani akiuga atĩrĩ: “Tondũ andũ aya manguhĩrĩria na kanua kao, na makaangoocithia na mĩromo yao, no ngoro yao ĩrĩ kũraaya na niĩ; naguo gwĩtigĩra kũrĩa maanjĩtigagĩra nĩ watho ũrutanĩtwo nĩ andũ, ¹⁴nĩ ũndũ ũcio, ta kĩoni, nĩngacooka njĩke magegania harĩ andũ aya, igegania igũrũ rĩa igegania; naguo ũũgĩ wa andũ ao oogĩ nĩũkaniinwo, naguo ũmenyo wa arĩa ao oũĩ maũndũ nĩũgaathira.” ¹⁵Kaĩ marĩ na haaro arĩa methithaga mũno nĩguo mahithe mĩbango yao harĩ Ithe witũ, arĩa ciĩko ciao ciĩkagwo ndumainĩ, makoiga atĩrĩ, “Nũũ ũratuoona? Nũũ ũtũĩ?”

¹⁶Kaĩ mũgarũranagia maũndũ mothe! Mũũmbi nĩ kwagĩrĩire atuĩke ta rĩũmba rĩake—taarĩ kĩndũ kĩrĩa gĩũmbĩtwo no kĩĩre mũũmbi wakĩo atĩrĩ, “Tiwe wanyũũmbire,” kana kĩndũ kĩrĩa gĩathondeketwo kĩĩre ũrĩa wagĩthondekire atĩrĩ, “Ndarĩ ũndũ oĩ”?

¹⁷Githĩ ti o kahinda kanini gũtigaire, Lebanoni ĩkaagarũrwo ĩtuĩke mũgũnda mũnoru, naguo mũgũnda mũnoru ũtarwo ta mũtitũ? ¹⁸Mũthenya ũcio andũ arĩa mataiguaga nĩmakaigua ciugo cia gĩkũnjo, namo maitho ma atumumu nĩmakoona, moimĩte kũrĩa kũrĩ mairia na nduma. ¹⁹Andũ arĩa enyiihia nĩmakagĩa na gĩkeno kĩerũ thĩinĩ wa Ithe witũ, nao athĩĩni gatagatĩ ka andũ nĩmagakenera Ũrĩa Mũtheru wa Isiraeli, o we Ithe witũ. ²⁰Nĩgũkorwo arĩa matarĩ tha nĩmagaathira, nao anyũrũrania nĩmakaaniinwo; nao arĩa oothe merutĩĩire gwĩka ũũru nĩmagaatinio, ²¹o acio matuaga mũndũ mwĩhia na kiugo o kĩmwe, na makaigĩra mũtego ũrĩa ũrũĩrĩra kĩhooto kĩhingoinĩ, na makahĩngĩca ũrĩa ũrĩ na kĩhooto na mĩario ya tũhũ. ^a a v21 Kĩhingo gĩa itũũra kĩarĩ nyũmba ya ciira ya tene kũrĩa maciira maathikĩrĩragio na gũgatuuo matuĩro.

²²Nĩ ũndũ ũcio Ithe witũ, ũrĩa wakũũrire Iburahĩmu, ekuuga ũũ igũrũ rĩa nyũmba ya Jakubu: “Jakubu ndagaacooka gũconorithio, o na ũthiũ wake ndũgaacooka gũthita. ²³Nĩgũkorwo rĩrĩa akoona ciana ciake, wĩra wa mooko makwa gatagatĩ kao, nĩmakaamũrĩra rĩĩtwa rĩakwa rĩrĩ itheru; nĩmagatĩĩa Ũrĩa Mũtheru wa Jakubu arĩ mũtheru, na metigĩre Ithe witũ. ^b b v23 Rĩrĩa Ithe witũ oona ciana ciake — iria ciombirwo nĩ mooko make mwene — rĩĩtwa rĩake nĩrĩtĩĩagwo. Gũcookererio kũambĩrĩriaga rĩrĩa ciana iria oombire ciamũcookerera. ²⁴Nao arĩa mahĩtĩtie ngoroinĩ ciao nĩmagataũkĩrwo, nao arĩa mateetaga nĩmagetĩkĩra ũrutani.”