Ishaya 29 FHB Father's Heart Bible™

29 ¹Kaiton Ari'el, Ari'el, birnin da Dawuda ya kafa sansani a ciki! Ku ƙara shekara a kan shekara; bari idodin su yi ta zagayowa. ²Duk da haka zan matsa wa Ari'el ƙwarai, za a kuma yi makoki da kuka; za ta zama a gare ni kamar murhun bagade. ³Zan kafa sansani kewaye da ke; zan kewaye ki da katanga, in kuma tā da kagaru a kanki. ⁴Za a ƙasƙantar da ke; daga ƙasa za ki yi magana, maganarki kuma za ta yi rauni cikin ƙura. Muryarki za ta fito daga ƙasa kamar ta fatalwa, maganarki kuma za ta yi raɗa daga cikin ƙura. ⁵Amma taron maƙiyanki za su zama kamar ƙura mai laushi, taron azzalumai kuma kamar buntun da iska take hurawa. Zai kuwa faru farat ɗaya, nan da nan. ⁶Uba na rundunonin Sama zai ziyarce ki da tsawa da girgizar ƙasa da babbar ƙara, da guguwa da hadari da harshen wuta mai cinyewa. ⁷Taron dukan al'ummai da suke yaƙi da Ari'el, dukan waɗanda suke yaƙi da ita da kagararta, suke kuma matsa mata, za su zama kamar mafarki, wahayin dare. ⁸Zai zama kamar sa'ad da mai yunwa yake mafarkin yana ci, ya farka kuwa yunwa tana nan tare da shi; ko kamar sa'ad da mai ƙishirwa yake mafarkin yana sha, ya farka kuwa a gaji, ƙishirwarsa ba ta ƙare ba. Haka kuwa za ta kasance ga taron dukan al'ummai da suke yaƙi da Dutsen Sihiyona. ⁹Ku yi mamaki ku kuma rikice; ku makanta kanku ku zama makafi! Suna bugu, amma ba da giya ba; suna tangaɗi, amma ba daga barasa ba. ¹⁰Gama Ubanmu ya zuba a kanku ruhun barci mai zurfi; ya rufe idanunku, annabawa, ya kuma rufe kawunanku, masu-duba. ¹¹Dukan wahayin nan ya zama a gare ku kamar kalmomin naɗaɗɗen littafi da aka hatimce. Sa'ad da suka ba da shi ga wani da ya iya karatu, suna cewa, “Ka karanta wannan, don Allah,” sai ya ce, “Ba zan iya ba; an hatimce shi.” ¹²Sa'ad da aka ba da littafin ga wani da ba ya iya karatu, ana cewa, “Ka karanta wannan,” sai ya ce, “Ni ban iya karatu ba.”

¹³Uba Mai Iko Duka ya ce, “Domin wannan jama'a suna kusantō ta da bakinsu, suna girmama ni da leɓunansu, amma zuciyarsu tana nesa da ni; tsoron da suke yi mini ƙa'ida ce da mutane suka koyar, ¹⁴saboda haka, ga shi, zan sāke yin al'ajabai da wannan jama'a, al'ajabai a kan al'ajabai; hikimar masu hikimarsu za ta hallaka, fahimtar masu-basira kuma za ta ɓace.” ¹⁵Kaiton waɗanda suke zurfafawa domin su ɓoye shirye-shiryensu daga Ubanmu, waɗanda ake yin ayyukansu a cikin duhu, suna cewa, “Wa ya gan mu? Wa ya san mu?”

¹⁶Yadda kuke karkatar da kome! Ya kamata a ɗauki mai tukwane kamar lakarsa ne?—sai ka ce abin da aka yi zai ce wa wanda ya yi shi, “Shi bai yi ni ba,” ko abin da aka ƙera ya ce wa wanda ya ƙera shi, “Shi bai san kome ba”?

¹⁷Ashe, ba saurun ɗan lokaci kaɗan ba sa'an nan a maida Labanon ta zama gona mai amfani, a kuma lissafta gona mai amfani kamar kurmi? ¹⁸A ranan nan kurame za su ji kalmomin littafi, idanun makafi kuma za su gani daga cikin duhu da baƙin duhu. ¹⁹Masu tawali'u za su sāke samun farin ciki cikin Ubanmu, matalauta a cikin mutane kuma za su yi murna cikin Mai Tsarki na Isra'ila, Ubanmu. ²⁰Gama azzalumi ba zai ƙara kasancewa ba, mai ba'a kuma zai ƙare; dukan waɗanda suka sa gaba ga mugunta za a datse su, ²¹waɗanda da magana suke mai da mutum mai zunubi, suke kuma kafa wa mai kāre adalci a bakin ƙofar birni tarko, da gardama banza suke karkatar da mai gaskiya. ^a a v21 Bakin ƙofar birni shi ne kotun zamanin dā inda ake sauraron ƙararraki, ake kuma yanke hukunci.

²²Saboda haka ga abin da Ubanmu, wanda ya fanshi Ibrahim, yake faɗa game da gidan Yaƙub, “Yaƙub ba zai ƙara jin kunya ba, fuskarsa kuma ba za ta ƙara shanyewa ba. ²³Gama sa'ad da ya ga 'ya'yansa, aikin hannuwana a cikinsu, za su riƙe sunana da tsarki; za su tsarkake Mai Tsarki na Yaƙub, su kuma kasance da bangirma ga Ubanmu. ^b b v23 Sa'ad da Ubanmu ya ga 'ya'yansa — waɗanda hannuwansa suka ƙera — ana girmama sunansa. Maidowa takan fara ne sa'ad da 'ya'yan da ya yi suka juyo gare shi. ²⁴Waɗanda suke yawo a ruhu za su kai ga fahimta, masu gunaguni kuma za su karɓi koyarwa.”