Aịzaya 29 FHB Father's Heart Bible™

29 ¹Ahụhụ ga-adịrị Araịel, Araịel, obodo ebe Devid mara ụlọ ikwu ya! Tụkwasị afọ nʼelu afọ; ka mmemme na-abịaghachi. ²Ma aga m enye Araịel nsogbu, a ga-enwekwa iru újú na ịkwa ákwá; ọ ga-aghọrọ m dịka ebe ọkụ nke ebe ịchụàjà. ³Aga m ama ụlọ ikwu megide gị gburugburu; aga m eji mgbidi gbaa gị gburugburu, wulikwaa ihe nnọchibido megide gị. ⁴A ga-eweda gị ala; site nʼala ka ị ga-ekwu okwu, okwu gị ga-esikwa nʼuzuzu na-ada nwayọọ. Olu gị ga-esi nʼala pụta dịka olu mmụọ onye nwụrụ anwụ, okwu gị ga-esikwa nʼuzuzu na-ekwu okwu nwayọọ nwayọọ. ⁵Ma ìgwè ndị iro gị ga-aghọ dịka uzuzu dị nro, ìgwè ndị obi tara mmiri ga-adịkwa ka igbugbo ọka nke ifufe na-efesa. Ọ ga-emekwa nʼotu ntabi anya, na mberede. ⁶Nna nke usuu ndị agha nke eluigwe ga-eleta gị site nʼégbè eluigwe na ala ọma jijiji na oké ụzụ, site nʼoké ifufe na oké mmiri na ire ọkụ na-erepịa erepịa. ⁷Ìgwè nke mba niile na-ebuso Araịel agha, ndị niile na-alụso ya na ebe ya e wusiri ike ọgụ ma na-enyesi ya nsogbu ike, ga-adị ka nrọ, ọhụụ nke abalị. ⁸Ọ ga-adị ka mgbe onye agụụ na-agụ na-arọ nrọ na ọ na-eri nri, ma teta mgbe agụụ ya na-agụ ya; maọbụ ka mgbe onye akpịrị na-akpọ nkụ na-arọ nrọ na ọ na-aṅụ mmiri, ma teta mgbe ike gwụrụ ya, akpịrị ya ka na-akpọkwa nkụ. Otu a ka ọ ga-adịrị ìgwè nke mba niile na-alụso Ugwu Zaịọn ọgụ. ⁹Tụọnụ nʼanya ma daa mba; mechienụ onwe unu anya ka unu ghọọ ndị ìsì! Ha aṅụbigala mmanya oke, ma ọ bụghị mmanya vaịnị; ha na-adagharị, ma ọ bụghị nʼihi mmanya na-egbu egbu. ¹⁰Nʼihi na Nna anyị awụkwasịla unu mmụọ nke oké ụra; o mechiela anya unu, bụ́ ndị amụma, kpuchiekwaa isi unu, bụ́ ndị ọhụ ụzọ. ¹¹Ọhụụ ahụ niile dịịrị unu ka okwu nke akwụkwọ mpịakọta e kara akara. Mgbe ha nyere ya onye maara ịgụ akwụkwọ, sị, “Biko, gụọ nke a,” ọ na-asị, “Enweghị m ike; e kaala ya akara.” ¹²Mgbe e nyere onye na-amaghị ịgụ akwụkwọ akwụkwọ mpịakọta ahụ, sị, “Gụọ nke a,” ọ na-asị, “Amaghị m ịgụ akwụkwọ.”

¹³Nna anyị, Onye na-achị ihe niile, sịrị: “Nʼihi na ndị a jiri ọnụ ha na-abịaru m nso, were egbugbere ọnụ ha na-asọpụrụ m, ma obi ha dị anya nʼebe m nọ; egwu ha na-atụ m bụ naanị iwu mmadụ kuziiri ha, ¹⁴ya mere, lee, aga m emekwa ọrụ ebube ọzọ nʼetiti ndị a, ọrụ ebube nʼelu ọrụ ebube; amamihe nke ndị ha maara ihe ga-ala nʼiyi, nghọta nke ndị ha nwere uche ga-apụkwa nʼanya.” ¹⁵Ahụhụ ga-adịrị ndị na-eme ihe omimi iji zobe atụmatụ ha site nʼebe Nna anyị nọ, ndị na-arụ ọrụ ha nʼọchịchịrị, ndị na-asị, “Ònye na-ahụ anyị? Ònye matara anyị?”

¹⁶Leenụ ka unu si atụgharị ihe niile! Ò kwesịrị ka a na-emeso onye ọkpụ ite dịka ụrọ ya—dịka a ga-asị na ihe e kere pụrụ ịgwa onye kere ya, “Ọ bụghị ya kere m,” maọbụ ihe a kpụrụ akpụ pụrụ ịgwa onye kpụrụ ya, “O nweghị ihe ọ ma”?

¹⁷Ọ bụ na ọ fọdụghị naanị obere oge, Lebanọn ga-aghọ ubi na-amị mkpụrụ hiri nne, ubi na-amị mkpụrụ hiri nne ka a ga-agụ dịka oké ọhịa? ¹⁸Nʼụbọchị ahụ, ndị ntị chiri ga-anụ okwu nke akwụkwọ mpịakọta, anya ndị ìsì ga-esikwa nʼoké ọchịchịrị na ọchịchịrị gbagidi gbagidi hụ ụzọ. ¹⁹Ndị dị umeala nʼobi ga-enwetakwa ọṅụ ọhụrụ nʼime Nna anyị, ndị ogbenye nʼetiti ụmụ mmadụ ga-aṅụrịkwa ọṅụ nʼime Onye Nsọ nke Izrel, bụ́ Nna anyị. ²⁰Nʼihi na ndị obi tara mmiri agaghị adịkwa, onye na-akwa emo ka a ga-emebikwa; ndị niile obi ha dị nʼịrụ ihe ọjọọ ka a ga-ebipụ, ²¹ndị ahụ na-eji otu okwu mee ka mmadụ bụrụ onye mmehie, ndị na-esiri onye na-agbachitere ikpe ziri ezi nʼọnụ ụzọ ama ọnyà, werekwa okwu efu wezuga onye ikpe ya ziri ezi. ^a a v21 Ọnụ ụzọ ama obodo bụ ụlọikpe oge ochie ebe a na-anụ esemokwu gbasara iwu ma na-ekpe ikpe.

²²Ya mere, nke a bụ ihe Nna anyị, bụ́ onye gbapụtara Ebraham, na-ekwu banyere ụlọ Jekọb: “Jekọb agaghị emekwa ihere ọzọ, ihu ya agaghịkwa acha ọcha ọzọ. ²³Nʼihi na mgbe ọ hụrụ ụmụ ya, bụ́ ọrụ aka m nʼetiti ha, ha ga-edebe aha m nsọ; ha ga-edebekwa Onye Nsọ nke Jekọb nsọ, ma tụọ egwu Nna anyị. ^b b v23 Mgbe Nna anyị hụrụ ụmụ ya — bụ́ ndị aka ya kpụrụ — a na-asọpụrụ aha ya. Mweghachi na-amalite mgbe ụmụ o kere tụgharịkwutere ya. ²⁴Ndị na-akpafu nʼime mmụọ ga-enweta nghọta, ndị na-atamu ntamu ga-anabatakwa ndụmọdụ.”