Arieli, Nzinda wa Dhavidhi
Yerusalemu asazungulirwa mpaka fala yace isanong'ona kubulukira m'pfumbi, buluka penepo anyamalimbana naye asapita ninga ndoto ya cakudya inasiya munthu na njala. Iwo asalemedza Baba na milomo yawo mbwenye mitima yawo iri kutali, natenepa udziwi wawo usamala. Mbwenye anyakukhonda kubva anadzabva.
29 1Tsoka kuna Arieli, Arieli, nzinda ule Dhavidhi adamanga misasa! Thimizani caka pa caka; maphwando mbapitirize kubwerera. 2Mbwenye Ine ndinatsindikiza Arieli, penepo panadzakhala kulira na kutsukwala; iye anadzakhala kuna Ine ninga guwa ya ntsembe. 3Ndinamanga misasa kukuzungulirani kuonsene; ndinakuzungulirani na mpanda, mbandikwirisa mitumbi ya nkhondo toera kukumenyani. 4Munadzatsikiswa; mukubuluka pantsi munadzalonga, mphapo mafala anu anadzabveka pang'ono nkati mwa pfumbi. Fala yanu inadzabuluka pantsi ninga ya nzimu wa wakufa, pontho kulonga kwanu kunadzanong'onezera mukubuluka mu pfumbi. 5Mbwenye mwinji wa anyamalwa anu unadzakhala ninga pfumbi yakufewa, mwinji wa anthu aukali ninga makoko anapeperwa na mphepo. Pyenepi pinadzacitika mwakucimbiza, mwakudzidzimusa. 6Imwe munadzadingwa na Baba wa Nyankhondo za Kudzulu na mabingu, na citekenyeko ca pantsi, na ndungunyu ukulu, na condzi, na cimphepo cikulu, na malirimo a moto wakudya. 7Na mwinji wa madzindza onsene anamenya nkhondo na Arieli, onsene anamenyana na iye na linga yace, mbayapanikiza, anadzakhala ninga nlota, masomphenya a namasiku. 8Pinadzakhala ninga munthu wa njala analota kuti ankudya, mbalamuka na njala yace icikhonda kukwana; peno ninga munthu wa nyota analota kuti ankumwa, mbalamuka waneta, nyota yace icikhonda kumala. Ndi momwe pinadzakhalira mwinji wa madzindza onsene anamenyana na Phiri ya Siyoni. 9Dzumatirwani, mbamudzidzimuka; fungani maso anu mbamukhala amaboliboli! Iwo ndi akuledzera, mbwenye nee na vinyu; akudzungaira, mbwenye nee thangwi ya pyakumwa pyamphambvu. 10Thangwi Baba wathu adakhuthula pa imwe nzimu wa citulo cikulu; Iye adafunga maso anu, apolofeta, mbaphimba misolo yanu, anyakuona. 11Masomphenya onsene kuna imwe ali ninga mafala a mupukutu wakudindwa. Angaupereka kuna munthu anakwanisa kuleri, mbalonga kuti: “Lerini ii, ndaphata miyendo,” iye alonga: “Nkhabe kwanisa; wadindwa.” 12Angaupereka mupukutu kuna munthu anakhonda kudziwa kuleri, mbalonga kuti: “Lerini ii,” iye alonga: “Nkhabe kudziwa kuleri.”
13Baba Wankulu alonga tenepa: “Thangwi mbumba iyi isafendedzera na mulomo wayo, mbandilemedza na milomo yayo, mbwenye ntima wayo uli kutali na Ine; kundigopa kwawo ndi mwambo wakupfundzisa na anthu basi, 14natenepa, onani, Ine ndinacitambo pontho pirengo kuna mbumba iyi, cirengo pa cirengo; udziwisi wa anyaudziwisi awo unadzafudzika, pontho kuzindikira kwa anyakuzindikira awo kunadzamala.” 15Tsoka kuna ale anabisala kakamwe toera kubisa mabverano awo kuna Baba wathu, anacita mabasa awo mu cidima, mbalonga: “Mbani anationa? Mbani anatidziwa?”
16Imwe musapendukisa pinthu pyonsene! Kodi nyakuumba anafunika kuonwa ninga dongo yace—ninga kuti cinthu cakuumbwa cingakwanisa kupanga nyakuciumba kuti: “Iye nee adandiumba,” peno cinthu cakusasanyirwa cingapanga ule adacisasanya kuti: “Iye nkhabe kudziwa cinthu”?
17Kodi nkhabe kusala n'dzidzi ung'ono toera Libano acinjwe mbakhala munda wakubala, pontho munda wakubala ulengeswe ninga nsitu? 18Pa ntsiku ineyi, anthu akhonda kubva anadzabva mafala a mupukutu, pontho mukubuluka mu khundu na cidima, maso a maboliboli anadzaona. 19Anthu akucepeseka anadzagumana kutsandzaya kupsa mwa Baba wathu, pontho atcerengi pakati pa anthu anadzatsandzaya mwa Wakucena wa Izarayeli, Baba wathu. 20Thangwi anthu aukali anadzasoweka, pontho anyakunyoza anadzamala; onsene anaphatana na pyakuipa anadzagwaswa, 21ale anaphatisa basa fala ibodzi toera kupasa mulando munthu, anatheka nsampha kuna ule anatsidzikiza ulungami pa nsuwo wa nzinda, pontho na mafala a papezi asapeusa ule ali na ndimomwene. a a v21 Nsuwo wa nzinda pa n'dzidzi wakale ukhali mbuto yakutongera miseru, kunabveka miseru mbaperekwa kutonga.
22Natenepa, Baba wathu, ule adaombola Abrahamu, asalonga tenepa thangwi ya nyumba ya Yakobe: “Yakobe nkhabe kudzapaswa manyadzo pontho, nkhope yace nkhabe kudzacinja na manyadzo pontho. 23Thangwi iye angaona anace, basa ya manja anga pakati pawo, iwo anadzacenesa dzina yanga; anadzacenesa Wakucena wa Yakobe mbagopa na kulemedza Baba wathu. b b v23 Baba wathu angaona anace — akusasanyirwa na manja ace ene — dzina yace isalemedzwa. Kubwezeresa kusatoma n'dzidzi ule anace adaumbwa na Iye anatendeukira kuna Iye. 24Ale anadzungaira mu nzimu anadzafika pa kuzindikira, pontho ale anang'ung'udza anadzatambira cipfundziso.”
