Isaiah 29

29 ¹Davidna rairum vasai keinung Ariel, Arielli kakhanang ngasāranu! Zingkumli zingkum tataisanglu; phanit phanaobing kuimareida kuizatranu. ²Chithālala Ina Arielli ngahot ngasakra, kala sifa kala malungringda leira; ana ili hanphutwui meiphung thāda ngasāra. ³Ina nali kuimareida rairum rāsāra; Ina nali raipan eina kuinamra kala nali ngasoda sakchang rānsākhuira. ⁴Na ngakhun ngasakra; ngalei eina na khamatuira, kala nawui tui chifali akhonnao thāda shaira. Nawui akhon amāhāwui thāda ngalei eina rāra, kala nawui tui chifa eina yinyinyāyā shaira. ⁵Kha nawui yangkashebingwui kachungkha chifa manāta thāda ngasāra, kala lukhamashan makathei mibingwui kachungkha phankathui lanji thāda ngasāra. Kala chi kashuirak mikkhayip akhawui alungli shokhaora. ⁶Kazingram raimibingwui Avāna kazing khangashum kala neina̱ kala panglāk kakhangang eina, sur kala siphan zingrot kala mei kachuiwui meiwon eina nali rāyangmira. ⁷Kala Arielli ngarar khavai rai vai yur saikorawui kachungkha, ali kala awui raipanli ngararbing saikora kala ali ngahot ngasakbing, mang thāda, ngayāwui khamahā thāda ngasāra. ⁸Mi kathaia akhana phazā mang theikahai thāda ngasāra, kala khamathuk tharan awui thai maphauida; lah mi kara̱changa akhana khikha mangda mang theida, kala khamathuk tharan vānda, awui ra̱chang mathirumda. Chithāda Zion Kaphungli ngarar yur saikorawui kachungkhali ngasāra. ⁹Khananghaida matakhakhailu; nathum khalatta mik ngapeo sākhuida, mik khangapeobing ngasālu! Athum khamaripa, kha zam eina makhamaripmana; athum jakchāngchāng zata, kha ra̱ kayāng eina maningmana. ¹⁰Kaja ithumwui Avāna nathumwuitungli piphuphaiwui manglā heirormi; ana marānbing, nathumwui mik shungmi, kala khanongbing, nathumwui kui farormihaira. ¹¹Khamahā saikora nathumli mahor namkahai lairik akhaluiwui tui thāda ngasāra. Chi pāshapa mi akhali khuimi tharan, "Kapona, hi pāmilu," da hānglaga, ana "I mapāshapmara; hi mahor namkahaina," da hānga. ¹²Lairik chi mapāshapa mi akhali khuimi tharan, "Hi pāmilu," da hānglaga, ana "I mapāshapmara," da hānga.

¹³Proho Avāna hānga: "Mibing hi akhamor eina rānganaida, morchai eina ili khayāshiya, kha athumwui wuklung iwui eina katāva̱li lei; athumna ili ngacheeki chi mina tamchithei ain kathāna, ¹⁴chiwui vang eina, yanglu, ina mibing hili matakhak kahaiwuitungli matakhak kahai ot sāluishitra; athumwui thangkhamei mibingwui thangkhamei shimānhaora, kala athumwui ningkhamazing mibingwui theishingkakhui mayāmthuihaora." ¹⁵Ithumwui Avā eina athumwui khangarān thum khavai kathukla kazatbing, athumwui otbing tangkhamangli sāda, "Khipāna ithumli theira? Khipāna ithumli theikhui?" da kahāngbing, kakhanang ngasāranu!

¹⁶Nathumna otbing saikora khi eina ngui ngasakhaowa! Ham kasaa chi awui leikhon thāda shānkhuiranglā? Sākahai otna awui kasaali, "Ana ili masāhaimana," da hangshapralā, lah kasema otna ali kasākhuia chili, "Ana khikha matheimana," da hangshapralā?

¹⁷Ara atam kateokha peichaoda, Lebanon chi athei khamatheiya raipam maonhaomala, kala athei khamatheiya raipam chi ngahong thāda mashānkhuimala? ¹⁸Chithanghon khangakhokbingna lairik akhaluiwui tui shāhaora, kala tangmangting kala tangkhamangwui eina khangapeobingwui mik eina theira. ¹⁹Kakhanangabingna ithumwui Avāli khamathān thingra̱ samphangra, kala mibingwui ngachaili kachāmabingna Israelwui Kathara, ithumwui Avāli mathānra. ²⁰Kaja sākashe mibing maleiluimara kala mashātkathei vānhaora; makaphā sākhavai khangarānabing saikora katathaora, ²¹tui akha eina mi akhali morei kaphunga ngasakbing, ngaveili mashun phayetkhame chili khalen kasangbing, kala arema hāngkapapai eina khangarong mili ngateithuibing. ^a a v21 Keinungwui ngavei chi atam kachida bichar sākhavaipam sai, chili tuingaphunbing nganāda bichar sāhaipamna.

²²Chiwui vang eina, Abrahamli ngatangkhui ithumwui Avāna Jacobwui shimkhurwui pongli hithāda hānga: "Jacob makhayakluimara, awui mai mathengchengluimara. ²³Kaja ana awui naongarā, athumwui ngachaili ipāngwui otsak theiakha, athumna iwui mingli kathara ngasakra; athumna Jacobwui Katharali kathara ngasakra, kala ithumwui Avāwui mangāli khayāshida nganingra. ^b b v23 Ithumwui Avāna awui naongarā — awui pāng eina semkakhui chibing — theiakha, awui mingli tekmatei ngasakhaira. Ana semkakhui naongarāna awuili latungakha, shokngasakwui hi haokaphok ngasaka. ²⁴Manglāli ngachāngmeibingna theishingkakhui samphangra, kala ngurngur khamatuibingna tamkachithei khuisangra."