અરીએલ, દાઉદનું નગર

યરૂશાલેમને એવું ઘેરવામાં આવે છે કે તેનો અવાજ ધૂળમાંથી ગણગણે છે; પછી તેના હુમલાખોરો ખોરાકના સ્વપ્નની જેમ અદૃશ્ય થાય છે, જે માણસને ભૂખ્યો જ રાખે છે. તેઓ હોઠથી પિતાનું સન્માન કરે છે પણ તેમનાં હૃદય દૂર રહે છે, તેથી તેમનું જ્ઞાન નિષ્ફળ જાય છે. છતાં બહેરા સાંભળશે.

અધ્યાય 29.

અરીએલને અફસોસ, અરીએલ, જે નગરમાં દાઉદે છાવણી નાખી હતી! વર્ષમાં વર્ષ ઉમેરો; પર્વો આવ્યા કરે. તોપણ હું અરીએલ પર સખત દબાણ કરીશ, અને શોક તથા વિલાપ થશે; તે મારે માટે વેદીના ચૂલા જેવી થઈ જશે. હું ચારે બાજુ તારી સામે છાવણી નાખીશ; હું કોટથી તને ઘેરીશ અને તારી સામે ઘેરાબંધીના બાંધકામ ઊભાં કરીશ. તને નીચો પાડવામાં આવશે; તું ભૂમિમાંથી બોલીશ, અને તારાં વચન ધૂળમાં દબાઈ જશે. તારો અવાજ ભૂતના જેવો જમીનમાંથી આવશે, અને તારી વાણી ધૂળમાંથી ધીમે બબડશે. પણ તારા શત્રુઓનું ટોળું ઝીણી ધૂળ જેવું થઈ જશે, અને ક્રૂર લોકોનું ટોળું ઊડતા ભૂસા જેવું. અને એ ક્ષણમાત્રમાં, અચાનક બનશે. આકાશની સેનાઓના પિતા ગર્જના, ધરતીકંપ અને મોટા ઘોંઘાટ સાથે, વંટોળિયા, તોફાન તથા ભસ્મ કરનાર અગ્નિની જ્વાળા સાથે તારી મુલાકાત લેશે. અને અરીએલ સામે યુદ્ધ કરનાર સર્વ પ્રજાઓનું ટોળું, જેઓ તેની તથા તેના કિલ્લાની સામે લડે છે અને તેના પર સખત દબાણ કરે છે, તે બધા સ્વપ્ન જેવા, રાતના સંદર્શન જેવા થશે. જેમ ભૂખ્યો માણસ સ્વપ્નમાં ખાય છે, પણ જાગે ત્યારે તેની ભૂખ સંતોષાઈ નથી; અથવા જેમ તરસ્યો માણસ સ્વપ્નમાં પીએ છે, પણ જાગે ત્યારે નિર્બળ થઈ જાય છે, તેની તરસ છીપી નથી; તેમ સિયોન પર્વત સામે લડનાર સર્વ પ્રજાઓના ટોળાની દશા થશે. સ્તબ્ધ તથા આશ્ચર્યચકિત થાઓ; પોતાને આંધળા કરો ને આંધળા થાઓ! તેઓ પીધેલા છે, પણ દ્રાક્ષારસથી નહિ; તેઓ લથડે છે, પણ દારૂથી નહિ. કેમ કે આપણા પિતાએ તમારા પર ગાઢ નિદ્રાનો આત્મા રેડ્યો છે; તેમણે તમારી આંખો, એટલે પ્રબોધકોને, બંધ કરી દીધી છે, અને તમારાં માથાં, એટલે દ્રષ્ટાઓને, ઢાંકી દીધાં છે. આખું સંદર્શન તમારે માટે મહોરબંધ ઓળિયાનાં વચન જેવું થયું છે. જ્યારે વાંચી શકનારને તે આપીને કહે છે, “કૃપા કરીને આ વાંચો,” ત્યારે તે કહે છે, “હું વાંચી શકતો નથી; એ તો મહોરબંધ છે.” જ્યારે વાંચી ન શકનારને તે ઓળિયું આપીને કહે છે, “આ વાંચો,” ત્યારે તે કહે છે, “મને વાંચતાં આવડતું નથી.”

સાર્વભૌમ પિતાએ કહ્યું: “કેમ કે આ લોકો પોતાના મુખથી મારી પાસે આવે છે અને પોતાના હોઠથી મને માન આપે છે, પણ તેમનું હૃદય મારાથી દૂર છે; મારા પ્રત્યેનો તેમનો ભય માણસોએ શીખવેલો નિયમ માત્ર છે, તે માટે, જુઓ, હું આ લોકોની સાથે ફરી અદ્ભુત કાર્યો કરીશ, આશ્ચર્ય પર આશ્ચર્ય; તેમના જ્ઞાનીઓનું જ્ઞાન નાશ પામશે, અને તેમના બુદ્ધિમાનોની સમજ લોપ થઈ જશે.” અફસોસ તેઓને જેઓ પોતાની યોજનાઓ આપણા પિતાથી સંતાડવા ઊંડે જાય છે, જેમનાં કાર્યો અંધારામાં થાય છે, જેઓ કહે છે, “આપણને કોણ જુએ છે? આપણને કોણ જાણે છે?”

તમે કેવું બધું ઊલટું કરો છો! શું કુંભારને તેની માટી જેવો ગણવો?— જાણે ઘડેલી વસ્તુ પોતાના ઘડનારને કહે, “તેણે મને બનાવ્યો નથી,” અથવા ઘાટ ઘડેલી વસ્તુ પોતાને આકાર આપનારને કહે, “તે કંઈ જાણતો નથી”?

શું હજી થોડી જ વાર નથી કે લબાનોન ફળદ્રુપ ખેતરમાં ફેરવાઈ જશે, અને ફળદ્રુપ ખેતર વન તરીકે ગણાશે? તે દિવસે બહેરા ઓળિયાનાં વચન સાંભળશે, અને અંધકાર તથા ગાઢ અંધારામાંથી આંધળાની આંખો જોશે. નમ્ર લોકો આપણા પિતામાં નવો આનંદ પામશે, અને માણસોમાંના ગરીબો ઇઝરાયલના પવિત્ર, આપણા પિતામાં હરખાશે. કેમ કે ક્રૂર માણસ રહેશે નહિ અને ઠઠ્ઠા કરનારનો અંત આવશે; દુષ્ટતા કરવા મથનારા સર્વ કપાઈ જશે, જેઓ વચનથી માણસને પાપી ઠરાવે છે, જેઓ દરવાજા પાસે ન્યાયનો બચાવ કરનારને માટે ફાંદો રચે છે, અને પોકળ દલીલોથી નિર્દોષને આડે માર્ગે વાળે છે. ^a

તે માટે આપણા પિતા, જેમણે ઇબ્રાહિમને મુક્ત કર્યો, યાકૂબના ઘર વિષે આમ કહે છે: “હવે પછી યાકૂબ શરમાશે નહિ, હવે પછી તેનો ચહેરો ફિક્કો પડશે નહિ. કેમ કે જ્યારે તે પોતાનાં બાળકોને જોશે, તેમની મધ્યે મારા હાથનું કાર્ય જોશે, ત્યારે તેઓ મારા નામને પવિત્ર ગણશે; તેઓ યાકૂબના પવિત્રને પવિત્ર ગણશે અને આપણા પિતાથી ભય પામશે. ^b જેઓ આત્મામાં ભટકે છે તેઓ સમજણ પામશે, અને જેઓ બડબડ કરે છે તેઓ શિખામણ સ્વીકારશે.”