Ariel, David laga Sheher

Jerusalem ke ghira kori diye jitia tak tai laga awaj dhula pora phus-phus kore, pichete tai ke lorai kora khan sapna te dikha khana nisina nai hoi jai jun pora manuh ke bhuk thaki rakhe. Taikhan uth pora Pitri ke sonman kore kintu taikhan laga mon dur te thake, etu nimite taikhan laga gyan kaam nakore. Tinu bhi kala khan hunibo.

Adhyay 29.

Hai Ariel ke, Ariel, David pora tombu lagai thaka sheher! Bochor te bochor milai dibi; porob khan ghuri ghuri ahhi thakibo dibi. Kintu Moi Ariel ke bhisi dabai dibo, aru ta te kanda aru bilap hobo; tai Moi nimite bedi laga jui jola jaga nisina hobo. Moi tumar chari phale tombu lagai dibo; Moi tumar ke deewar pora gher dibo aru tumar birodh te juddho-bandh khan tuli dibo. Tumar ke niche kori dibo; mati pora tumi kotha kobo, aru tumar kotha khan dhuli te dhima hoi jabo. Tumar awaj bhoot laga nisina mati pora ulabo, aru tumar kotha dhuli pora phus-phus kori ulabo. Kintu tumar dushman khan laga bhir misina dhuli nisina hoi jabo, aru nirdoi manuh khan laga bhir urikena jua bhush nisina hobo. Aru eitu ek-khon te, achanak pora hoi jabo. Sorgo laga sena khan laga Pitri pora tumar ke bhijili gorja aru matikampa aru dangor awaj logot te sabole ahhibo, ghurni-batas aru toofan aru khai pela diya jui laga lolona logot te. Aru Ariel bhirodh te juddho kora sob desh khan laga bhir, tai aru tai laga gorh bhirodh te lorai kora aru tai ke dabai diya sob khan, sapna nisina, rati laga darshan nisina hobo. Bhuka thaka manuh pora khai thaka sapna dikha nisina eitu hobo, aru ghumi uthile tar bhuk puncha nathake; nahole pyas laga manuh pora pani khai thaka sapna dikha nisina, aru ghumi uthile komjur hoi jai, tar pyas nahata thake. Teneka Sion Pahar bhirodh te lorai kora sob desh khan laga bhir hobo. Aschorit hoi kene dabra hobi; nijor ke andha koribi aru andha hobi! Tarkhan nisa hoi ase, kintu draksha-ros pora nohoi; tarkhan tal-matal kore, kintu kara daru pora nohoi. Kilemane amar Pitri pora tumikhan uporte gobhir ghum laga atma hali dise; Tai tumar suku khan, bhabobadi khan, bondh kori dise, aru tumar matha khan, darshan dikha khan, dhaki dise. Pura darshan tu tumi nimite mohor mara kitab laga kotha khan nisina ase. Jitia eitu porhibo para ekjon ke di kene koi, “Daya kori kene eitu porhibi,” tai koi, “Moi na pare; eitu mohor mara ase.” Jitia kitab tu porhibo napara ekjon ke di kene koi, “Eitu porhibi,” tai koi, “Moi porhibo napare.”

Sorbosaktiman Pitri pora koise: “Kilemane etu manuh khan tai laga mukh pora Moi usorte ahe aru tai laga oth pora Moi ke sonman kore, kintu tai laga mon Moi pora dur te ase; Moi ke tarkhan laga bhoi tu manuh pora sikhai diya niyom he ase,” “Etu karone, sabi, Moi etu manuh khan logot te aru bar asurit kaam khan koribo, asurit uporte asurit; tarkhan laga gyani khan laga gyan khotom hoi jabo, aru tarkhan laga buddhiman khan laga buddhi harai jabo.” Hai taikhan ke, kun amar Pitri pora tarkhan laga jukti lukai dibole gobhir te jai, jun laga kaam khan andhera te kore, jun koi, “Kun pora amikhan ke dikhe? Kun pora amikhan ke jane?”

Tumikhan sob jinis ke kiman ulta kori diye! Kumhar ke tai laga mati nisina bhabibo naki— jen bonai diya jinis pora tai ke bona manuh ke kobo pare, “Tai pora moi ke bona nai,” nahole gathi diya jinis pora tai ke gathi diya ke kobo pare, “Tai eku najane”?

Olop somoi pichete Lebanon tu ekta upojau kheti nohoi najabo naki, aru upojau kheti tu jongol nisina ginti nahobo naki? Hei dinte behera khan pora kitab laga kotha khan hunibo, aru dhundli aru andhera pora andha khan laga suku khan dikhibo. Nomro manuh khan amar Pitri logot te notun khushi pabo, aru manuh khan majot te gorib khan Israel laga Pobitro Jon, amar Pitri, logot te anond koribo. Kilemane nirdoi manuh khan aru nathakibo aru thatta kora khan khotom hoi jabo; biya kaam te mon diya sob khan kati phela hobo, kun ekta kotha pora ekjon manuh ke paapi bonai diye, kun dorja te niyai bachai diya manuh nimite phand pati diye, aru khali kotha pora hosa thaka manuh ke ulta phale ghurai diye. ^a

Etu karone, kun pora Abraham ke mukti dise, hei amar Pitri pora Jacob laga ghor laga bisoy te eneka koi ase: “Jacob tu aru sorom nakoribo, tar chehera aru pheka nahobo.” “Kilemane jitia tai tar bacha khan ke dikhibo, tarkhan majot te thaka Moi laga hath laga kaam ke dikhibo, tetiya tarkhan Moi laga nam ke pobitro rakhibo; tarkhan Jacob laga Pobitro Jon ke pobitro mani lobo, aru bhoi aru adar logot te amar Pitri ke sonman koribo.” ^b “Kun atma te bhatki berai, taikhan bujhi lobo, aru kun bhirbhir kore, taikhan upodesh grohon koribo.”