Ariyeli, Mbanza ya Tavidi
Yelusalemi yizíngidilwa tii ndinga yandi yisi zonza wa fyoti-fyoti tuka ha tsi, amana bimbeni byandi byazánga hanga ndosi ya madya yina yisisa mutu yi nzala. Bisi zitisa Tata wetu mu minwa myawu kaasi mbundu zya bawu zenina thama yi yandi, buna ngangu za bawu zabwa. Kaasi bafwa matu bakayuka.
Tata wetu kisi zonza mu mavese 13–15, 22–24
29 1Phasi kwena Ariyeli, Ariyeli, mbanza yina Tavidi kázinga! Kosikenu mvula ha mvula; yambulenu mikinzi milándakana. 2Kaasi meni yifítikisa Ariyeli ngolu, amana khondu yi makana byakála; yandi kakála kwena meni hanga kifulu kya mbawu ya kimenga. 3Meni yikuzíngidila ngeyi mu mbazi zoosu; yikutúngila kibaka amana yitélamisa biphangu bya mvita ha ngeyi. 4Ngeyi wakúlumuka; tuka ha tsi wazímbula, amana mambu maku makála wa fyoti-fyoti mu fusyangeni. Ndinga yaku yátuka ha tsi hanga ndinga ya mvumbi, amana nzonzolo yaku yazímbwala wa fyoti-fyoti tuka mu fusyangeni. 5Kaasi kibuka kya bimbeni byaku kyakála hanga fusyangeni ya fyoti, amana kibuka kya bakwa mbundu za ngolu hanga tswala yina pfunzi yisi nata. Amana byakála mu mbala mosi, mu kithulumukina. 6Tata, Mukwa ngolu zoosu, kakwísa thala ha ngeyi ni thungidi yi mafu manikani yi malokosi ma lawu, ni kimbongila yi pfunzi yi muleku wa mbawu yina yisi yoka byosu. 7Amana kibuka kya makanda moosu mana masi nwana mvita yi Ariyeli, boosu bana bisi nwanisa yandi yi kibaka kyandi kya ngolu amana bisi fitikisa yandi ngolu, kyakála hanga ndosi, hanga mbona mesu ya phipha. 8Byakála hanga mutu wa nzala wisi lota ndosi ni kenina mu kudya, amana wisi sikama ni nzala yisi mukwata kaka; ho hanga mutu wa kihwinya wisi lota ndosi ni kenina mu kunwa, amana wisi sikama wa vonga, ni kihwinya kyandi kyakála kaka. Bwabu phi byakála yi kibuka kya makanda moosu mana masi nwanisa mongu wa Siyoni. 9Yitukenu amana luyukenu bweya; lukitukenu baphofu amana lukalenu baphofu! Bawu bazedini, kaasi ka mu vinu ku; bisi dyengana-dyengana, kaasi ka mu malafu ma ngolu ku. 10Mukuma Tata wetu wámwanga ha ngeyi kitembu kya nimba ya ngolu; wákanga mesu menu, disongidila bambikudi, amana wáfukidila mitwa myenu, disongidila bamoni ba mbona mesu. 11Mbona mesu yosu yenina kwena benu hanga mambu ma mukanda wuna bánamika. Hanga baheka mukanda kwena mutu wuna wafwana tanga, bazimbula: «Tanga mukanda wawu, ngyondi,» yandi wuzimbudi: «Yifwaniku; wunamika.» 12Amana hanga bápheka mukanda kwena mutu wuna kafwaniku tanga, bazimbula: «Tanga mukanda wawu,» yandi wuzimbudi: «Yifwaniku tanga.»
13Pfumu Tata wuzimbudi: «Mukuma kanda dyadi dyisi fikama kwena meni ni munwa wandi amana dyisi nzitisa ni malebu mandi, kaasi mbundu yandi yenina kyana yi meni; bweya bwa bawu kwena meni bwenina mitsiku mina batu bálonga, 14buna, tala, meni yivútukila hika mu kuhanga biphadi yi kanda dyadi, kiphadi ha kiphadi; ngangu za batu ba ngangu ba bawu zakátota, amana nzayilu ya batu badimuka ba bawu yazímbala.» 15Phasi kwena bana bisi kwenda ku tsina mu kusweka mabanza ma bawu kwena Tata wetu, bana mambu ma bawu masi hangama mu mudima, bana bisi zimbula: «Nani wutumoni? Nani wutuzayi?»
16Lwisi balula mambu moosu lawu! Keti mubumbi wa tuma kafwani fwanikiswa yi tuma dyandi? Hanga ni kilekwa kina basala kyalenda zimbula kwena mubumbi wandi: «Yandi kambumbaku,» ho kima kina bafwanikisa kyalenda zimbula kwena wuna wákifwanikisa: «Yandi kazayiku kima»?
17Keti ka mu ndambu ya tangwa fyoti ku, Lebanoni dyakituka kilanga kya kuha bibundu, amana kilanga kya kuha bibundu kyatángwa hanga musitu? 18Muna kilumbu kina, tuhuwa twayúka mambu ma mukanda, amana tuka mu kiwayi yi mudima, mesu ma baphofu mamóna. 19Batu badikulumuna bakála yi kyesi kya pha mwena Tata wetu, amana batsukami mu kati dya batu bakála yi kyesi mwena Watoma wa Kiseledi, Tata wetu. 20Mukuma bakwa mbundu za ngolu bamana, amana bana bisi ta ngusi bamana; boosu bana bisi keba mu kusala mbi bazíluka, 21bana, ha ndinga yimosi, bisi khitula mutu mukwa masumu, bana bisi sya mutambu kwena mutu wuna wisi nwanina masonga ha mwelu, amana ni ndinga za mpamba bisi hukumuna mutu wa masonga. a a v21 Mwelu wa mbanza wákala nzu ya pfundusu ya thama, muna bakala yukila mambu ma mitsiku amana bakala zenga pfundusu.
22Buna, Tata wetu, wuna wáhulula Bulahami, wuzimbudi mama kikuma kya nzu ya Yakobi: «Yakobi kakwátukaku hika tsoni, zizi dyandi dyakítukaku hika phemba. 23Mukuma, tangwa kamóna bana bandi, muhangu wa moku mama mu kati dya bawu, bakitula khumbu yama yatoma; bazítisa Watoma wa Yakobi amana bayúka bweya kwena Tata wetu. b b v23 Tangwa Tata wetu kamóna bana bandi, bana básalwa ha moku mandi mamosi, khumbu yandi yizitiswa. Kuvutuka kweti yandika tangwa bana kásala bavutuka kwena yandi. 24Bana bisi hukumuka mu kitembu babákula, amana bana bisi dinyenga batámbula milongi.»
