Mi eng' bukuit

Isaiah 29 FHB Father's Heart Bible™

Kiistoi 15% eng' kiy ne iale korook →
Bukuit

Ariel, Nganaseetap Daudi

Kiyiemi Jerusalem agoi kong'alaal kutit mutyo kobunu temburyek, yeityo kobetyo puunikyik ko uu karwotitoetap amitwogik ne bagaakte chii koituun soon. Toroorei Kwanda eng' kutikwak ago muguleldakwak ko loo, nooto si koitun kaguiyetap icheek. Ago kas iit che miing'at.

Ng'alaali Kwandanyo eng' mustarisyek 13–15, 22–24

Sura 29.

Pwo eng' Ariel, Ariel, nganaseet ne ki togosta Daudi! Tes kenyiit kenyiit; koyobyob igoorwek ko bendi. Ago anyun ayiemi Ariel, ak komi iteiyo ak riirek; koegu anee ko uu kaptisisyet. Atogosta aneegitin komugul; ayiemin eng' irimeet ak atonon tuguugap lugeet agobo inyee. Iming'initu; ing'alaal ibune ng'wony, ak koik ng'aleeguk mutyo eng' temburyek. Punu kaasitng'ung' ng'wony ko uu po oik, ak kong'alaal ng'aleeguk mutyo kobunu temburyek. Ago koegu chaang'indap puuniguk ko uu temburyek ne ming'in, ak chaang'indap che ma tinyei rireenetapkei ko uu mobeek che iip koristo. Ak koyaak eng' sait age, korwai. Rutoochin Kwanda ne po lugoosyek eng' tuleet ak potaneetap ng'wony ak porisyet ne oo, eng' kipchurchuryet ak koristo ne iim ak liplibenetap maat ne amei. Ak koegu chaang'indap pororyosyek tugul che bookyi Ariel, icheek tugul che bargei ak inee ak irimennyi ak che yiemei inee, ko uu tartet, ng'ang'utyetap kemoi. Koegu ko uu ye karwotu chii ne amei rubeet kole amei, ak kong'eet ko ma piyong'; anan ko uu ye karwotu chii ne amei melelda kole iee, ak kong'eet konyalul, ma pet melelda. Uu nooto ko koegu chaang'indap pororyosyek tugul che bookyi Tulweetap Zion. Okaboorgei ak oiywei; otuch konyekwok si okoraat! Bogitos, ago ma eng' divai; putputyo, ago ma eng' maiyek. Amu kaibese Kwandanyo agobo okweek kabuusetap ruuyet ne oo; kaituch konyekwok, oegu maotik, ak kagwalu metowekwok, oegu keeriik. Egu ng'ang'utyet komugul eng' okweek ko uu ng'aleegap bukuit ne king'ooch. Ye kegoochi chiito ne muuchi kosoman, kole, “Soman ni, asoomin,” ak kole, “Mamuuchi; king'oochotin.” Ye kegoochi bukuit chiito ne ma muuchi kosoman, kole, “Soman ni,” kole, “Mamuuchi asoman.”

Mwaei Kiptaiyat Kwanda, kole: “Amu nyoonei pichu eng' kutinnywa ak koteech eng' ng'elebwekwa, ago loo muguleldanywa kong'eetwo; iyweisennywa anee ko ng'atuutyet ne ki koneet piik, Nooto si, keero, ayaei kwang'utik agaigai eng' pichu, kwang'utyet parak ap kwang'utyet; kobetyo utaatyetap che tinyei utaatyet, ak kobet naetap che nin.” Pwo eng' icheek che wendi barak si koun ng'aleekwak eng' Kwandanyo, che yaei poisyonikwak eng' imenindo, che le, “Ng'oo ne keeriech? Ng'oo ne ngen echeek?”

Omaasei tuguuk tugul! Tos nyolu keyai chiito ne yaei tereetap ng'ung'unyek ko uu ng'ung'unyennyi— ko uu ye le kiy ne kigeyai agobo Yaindennyi, “Ma ki yaiywo,” anan ko le kiy ne kigeree agobo ne ki tem ineendet, “Ma ngen kiy”?

Tos ma kasarta ne ming'in kityo ne tomo keweek Lebanon koek mbareet ne lalang', ak kebit mbareet ne lalang' koek osnet? Eng' peetuunooto kas che miing'en ng'aleegap bukuit, ak kobunu imenindo ak mesundeito kogeer konyegap che koraat. Nyooru che iming'initu boiboindo ne leel eng' Kwandanyo, ak koboiboi pooryeet eng' kwenutap piik eng' Ne Tiliil ne po Israel, Kwandanyo. Amu ma komi kogeny che ma tinyei rireenetapkei, ak kowong'kei ne kireenyei; kitiluuni tugul che koyoe ya, icheeget che eng' ng'olyoot age koyai chiito koek kiptengekyot, che choptoi mesteet ne saaei kirwooget eng' kurgeet, ak koisto eng' ng'aleek che boroten ne tinyei imanda. a a v21 Kurgeetap nganaseet ko ki kot ne po kirwooget ne po keny, ole ki kigasto ng'eereek ak koitchin piik kirwooget.

Nooto si mwaei Kwandanyo, ne ki sar Abraham, agobo kootap Jakobo: “Ma kolilaan kogeny Jakobo, ma koek kogeny tainnyi ne leelach. Amu ye keerei lagokyik, poisyetap eunenyu eng' kwenutap icheek, ko kitiliili kainennyu ne tiliil; kitiliili Ne Tiliil ne po Jakobo ak koiywei Kwandanyo. b b v23 Ye keerei Kwandanyo lagokyik — che ki iyai eunnyi ineegei — koteechei kainennyi. Taunei weegunet ye wekyigei lagok che ki yai ineendet ko ineendet. Konyooru naet icheeget che moong'otin eng' muguleldo, ak koyan kaneetiset icheeget che ing'unyng'ung'jino.”