Ngatiende Kumba Kwavo
Rwiyo rwokukwira. RwaDhavhidhi.
Mufaro womufambi wokunamata paanosvika paimba yaBaba vedu, tsoka dzake dzichitomira mukati mamasuwo. Guta ndipo panoungana marudzi uye panotongwa nokururama, saka anonyengeterera rugare rwaro, uye anoti anozviita nokuda kwehama dzake, kwete nokuda kwake.
122 1Ndakafara pamwe navaya vakati kwandiri, “Ngatiende kumba kwaBaba vedu.” 2Tsoka dzedu dzimire mukati mamasuo ako, Jerusarema. 3Jerusarema, rakavakwa seguta rakabatanidzwa zvakasimba, 4uko marudzi anokwira, marudzi aBaba vedu, somutemo kuvaIsraeri, kuti avonge zita raBaba vedu. 5Nokuti ipapo pakagadzwa zvigaro zvokutonga, zvigaro zveimba yaDhavhidhi.
6Nyengetererai rugare rweJerusarema: “Avo vanokuda ngavave norunyararo. 7Rugare ngaruve mukati mamasvingo ako, kuchengetedzeka mukati menhare dzako.” 8Nokuda kwehama dzangu neshamwari dzangu, ndichati, “Rugare ngaruve mukati mako.” 9Nokuda kweimba yaBaba vedu ndichatsvaka zvakanaka zvako.