Mi eng' bukuit

1 Laitorinik 17 FHB Father's Heart Bible™

Kiistoi 15% eng' kiy ne iale korook →
Bukuit

Kobaei Kwanda Elijah kobun chepkugik

Ki mwa Elijah kole me kobiit ropta, ak kounyi ineendet Kwandanyo eng' cherongo ole kobain chepkuginik ineendet. Ye koteenyo peek, ki goochi mosoget ne rubo ne po Sarepat magatyannyi ne mutai agobo ineendet, ago ma kobatee; ye kome weeriinnyi, kowegakta tuunetap Elijah ineendet.

Ng'alaali Kwandanyo eng' mustarisyek 3–4, 9, 14

Sura 17.

Ki mwachi Elijah Tisbindet, ne punu Tisbe eng' Gilead, Ahab, kole, “Ko uu ye sabei Kwandanyo, Kamuktaindetap Israel—ne atonone eng' tainnyi—ma kobutyo rewoot anan ropta eng' kenyisyechu, kobatee eng' ng'olyoonnyu.”

Ki nyoonji ng'olyootap Kwandanyo Elijah, koleenji:

“Manda oli, iweigei kotokyigei kong'asiis, ak iunyegei eng' cherongo Cherith, ne mi komostap kong'asiis ne po Jordan. Inageni eng' cherongo, ago kaang'at chepkuginik kobain eng' olooto.”

Ki wo anyun koyai ko uu ye mwa Kwandanyo; ki wo komeny eng' cherongo Cherith, komostap kong'asiis ne po Jordan. Ki ipchi chepkuginik magatyat ak panyeek eng' mornet, ak magatyat ak panyeek eng' koyamet, ak ki ee eng' cherongo. Kingo pata sait, koteenyo cherongo, amu ki ma mi ropta eng' emet.

Kogoochin Kwanda tuguuk kobun kwony

Ki nyoonji ng'olyootap Kwandanyo ineendet, koleenji:

“King'eetu, iba Sarepat ne neegit Sidon, imeny olooto. Kaang'at kwony age olooto kobain.”

Ki wo anyun Sarepat. Eng' oliin ne po nganaseet, koyumi kwony age kirokweek. Koguur ineendet, kole, “Kaigai iibwa peek tutigin eng' tereet aee.” Ye kiwendi konam, koguur, kole, “Kaigai iibwa agine magatyat kitigin.”

Ki le, “Ko uu ye sabei Kamuktaindet ne Toroor Kamuktaindeng'ung', ma atinye magatyat—kobatee suumeek che mugutat eng' euut eng' tereet ak mwaita tutigin eng' soteet. Ayumi kirokweek che ng'ering' si achut achop agobo anee ak weeriinnyu, si keam, yeityo kebek.”

Ki leenji Elijah ineendet, kole, “Matiny luendo. Iba, iyai ko uu ye imwae. Ago itoreta ichobwa magatyat ne ming'in kobunji, iibwa; yeityo ichobchigei inyee ak weeriing'ung'.”

Amu mwaei Kwandanyo, Kamuktaindetap Israel, kole, “Ma koak tereetap suumeek, ak ma koak soteetap mwaita, agoi peetuut ne igoochin Kwandanyo ropta eng' emet.”

Ki wo anyun koyai ko uu ye mwa Elijah, ak ki amis ineendet, ak Elijah, ak piigap koonnyi eng' peetuusyek che chaang'. Ma koak tereetap suumeek ak ma koteenyo soteetap mwaita, ko uu ye mwa Kwandanyo kobun Elijah.

Kingo pata ni, komyan weeriitap kwonyooto, chiitap koot. Ki ng'wanit myoentennyi miising' kot koma tee kabuusetap sabeet age eng' ineendet. Ki teebee kwonyooto Elijah, kole, “Nee ne mi kwenunnyo, chiitap Kamuktaindet? Inyonu si ibwaata tengekwogikyuk ak ibar weeriinnyu?”

Ki le, “Igoono weeriing'ung'.” Yeityo konam ineendet eng' eunekyik, koip ineendet parak koot ne menyei, ak ki inde ineendet eng' itogunnyi. Ki awaach Kwandanyo, kole, “Kwandanyu, tos iipchi kora kwony ne amenye ngokiito, ye ibar weeriinnyi?” Ki butyegei paragutap lakweet oriisyek somok, ak ki awaach Kwandanyo, kole, “Kwandanyu, ingoweekyi saboondap lakwechu ineendet.”

Ki kas Kwandanyo awaachetap Elijah, ak ki weekyi saboondap lakweet ineendet, ak ki sap. a a v22 Niito ko sait ne po tai eng' Bukuit ne Tiliil ne kiing'etji chii age eng' pigap meet — ne boorunei Kwandanyo kole ineendet ko ne igoochin ak ne weektaei saboondo, ak koboorunei ng'etunetap pigap meet ne nyoonei komye kobun Jeso. Ki nam Elijah lakweet, koip ineendet kong'etee koot ne po parak kochut koot, ak kogoochi kamennyi. Ki le Elijah, “Keero, sabei weeriing'ung'.”

Ki mwachi kwonyooto Elijah, kole, “Nguno anai ole inyee ko chiitap Kamuktaindet, ak ng'olyootap Kamuktaindet ne mi kuting'ung' ko po iman.”