1 Wungnaobing 17

17 ¹Gilead ngaleiwui Tishbewui Elijahna Ahabli hānga, "Israelwui Vare ithumwui Avāwui mangāli ina nganingda lei; awui ming singda kahāngna, hi zingkumbingwui alungli iwui tui eina maningla ikra̱la kazing rotā marāpaimara."

²Chiwui thili ithumwui Avāwui tui china Elijahli rāhānga:

³"Apam hiwui eina zatphoklu, zingshoshong ngareivāda Jordanwui zingshoshong khalei Chereth kongli nakhalatta thumhailu. ⁴Nana kongrāra̱ mangra, kala apam chili nali zākhavai hangkhābingli ina kasohaira."

⁵Chieina ana vālaga ithumwui Avāna kahāng tākam eina sai; ana vālaga Jordanwui zingshoshong khalei Chereth kongli pamsai. ⁶Hangkhābingna ali ngathor khamui eina sā, kala ngazin khamui eina sā khuirāmi; kala ana kongrāra̱ manga. ⁷Atam khaleilaga kongrā chi thenghaowa, kaja okathuili kazing rot matāmana.

Avāna Ra̱meinao Akha Eina Ngayarmi

⁸Chiwui thili ithumwui Avāwui tui china ali rāhānga:

⁹"Ngakarthuilu; Sidonli khanganai Zarephatli vāda apam chili pamsālu. Apam chili nali zākhavai ra̱meinao akhali ina kasohaira."

¹⁰Chieina ana Zarephatli vai. Keinungwui ngaveili ra̱meinao akhana thing kaphāda leisai. Ana ali hokhuida hānga, "Iwui vang ham akhali tara̱ kateokha khamimanglu." ¹¹Ana chi khuikhavai vā tharan, ana hānga, "Iwui vang khamui ngahomkha akhala khuirālu."

¹²Ana hānga, "Nawui PROHO Varewui ming singda kahāngna, iwuili khamui maleimana; ham akhali mathir panghomkha kala thaokhong akhali thao kateokha maningla leisai. Azangda iwui khalatta kala iwui naowui vang chi ngarānda shailaga anina thihaora khavai, ina thing kateokha kaphāda lei."

¹³Elijahna ali hānga, "Mangacheealu. Vālu, na kahāng tākam eina sālu. Kha kharena chiwui eina iwui vang khamui kateokha akha sāda iwuili khuirālu; chiwui thili na khalatta kala nawui naowui vang sālu."

¹⁴Kaja Israelwui Vare ithumwui Avāna hānga: "Ithumwui Avāna okathuili kazing rotā ngasakra zimiksho eina tangda mathir ham chi makhavaimara, kala thaokhong chila mathengmara."

¹⁵Ana vālaga Elijahna kahāng tākam eina sai, kala ana, Elijah, kala awui shimkhurna atam kasāngkha shai. ¹⁶Ithumwui Avāna Elijahwui khamor eina kahāng thāda mathir ham chi makhavaimana, kala thaokhong chila mathengmana.

¹⁷Chiwui thili shim akhavā sha̱nao chiwui nao chi kazāhaowa. Awui kakazā chi sakkachangkhathaoda, awuitungli khaksuikha maleiluimana. ¹⁸Preiva̱ china Elijahli hānga, "Varewui mi, iniwui ngachaili khi leikhala? Iwui khayonkhamāng ili phaningung ngasak khavai, kala inaomayarali sāthat khavai na rākhala?"

¹⁹Ana hānga, "Nanaomayara ili milu." Chieina ana ali ava̱va̱wui pāng eina vamkhuilaga awui mathāng ato kāli khuikāda, awui khalattawui pettungli chipethai. ²⁰Ana ithumwui Avāli khangakaona hānga, "O Ishavā, na I ngasopam ra̱meiva̱litungli tangda kalāshāt khuirāda awui naomayarali sāthat kahaila?" ²¹Ana nao chiwuitungli kathumshida kāngapumlaga, ithumwui Avāli khangakaona hānga, "O Ishavā, hi naowui manglā awuitungli latungluiranu."

²²Ithumwui Avāna Elijahwui khavao shāmi, kala naowui manglā awuitungli latungluihaida, a ringluihaowa. ^a a v22 Hiya Katharatuili khipākha thikahai eina ringshokluishit kahai kharethangna — hi eina ithumwui Avā chi kharing khamipā kala kharing hanmiluipā kaho chitheimida, kala Jishuwui mangā eina kupda rāra ringshokluishit chiwuitungli sāngngarānda chitheimina. ²³Elijahna nao chi khuilaga mathāng ato eina shimlungli khuitāda ava̱va̱li hanmi. Elijahna hānga, "Yanglu, nanaomayara ringda lei."

²⁴Preiva̱ china Elijahli hānga, "Ara na Varewui mi kaji ina theihaira, kala nakhamorli khalei Varewui tui hi khamashungana."