Mishān 14

14 ¹Chieina yarui ashangva̱ katongana soso ungda vaotāda, kala chithang ngayā mibingna chapa. ²Israelnaobing saikorana Moses eina Aaronwuitungli ngurngur matuiya; kala yarui ashangva̱ katongana anili hānga, "Egypt ngaleili ithum thihaisasi kaje phāra, lah lamhāng hili ithum thihaisasi kaje phāra! ³Khisāda ithumwui Avāna raighai eina thikhavai ngalei hili ithumli thānkashokkhala? Ithumwui preiva̱ eina naoshinaobing sāshai ngasāra. Egyptli hanung kaji phāmei maningmarala?" ⁴Kala athumna akha eina akha hānga, "Ithumna kathāna akha phākhuida Egyptli hanunghaosa."

⁵Chieina Moses eina Aaronna Israel yarui ashangva̱ katongawui mangāli mai mashunzanga.

⁶Ngalei akhayangabing ngachaili kahai Nunwui naomayara Joshua eina Jephunnehwui naomayara Calebna athumwui kachon serkhāka. ⁷Athumna Israel yarui ashangva̱ katongali unghānga, "Ithumna khaung kahai kala ara̱yangkhui ngalei chi kayākha phāmei. ⁸Ithumwui Avāna ithumli ningyāng ungakha, ana seina̱ eina khuira̱ khalonga ngalei hili ithumli thānzangda mira. ⁹Khipākha ithumwui Avāli ngakaishi masaalu, kala ngalei chiwui mibingli mangacheealu, kaja athum ithumwui kashakazāna. Athumwui makārkhami thuihaira; ithumwui Avāna ithumli ngasomi. Athumli mangacheealu."

¹⁰Yarui ashangva̱ katongana Joshua eina Calebli lunggui eina horthatra jihaowa. Chieina ithumwui Avāwui tekhamatei kazip khavai kachonshimli Israel mibing saikorali rāchithei.

¹¹Kala ithumwui Avāna Mosesli hānga, "Mi hina zamda tang ili ningkachairakhala? Kala athumwui lungli ina sākahai machutkakhui saikora theilala, zamda tang athumna ili mashitsangrakhala? ¹²Ina athumli kazātkashi eina sāthatra, kala athumwui samphangrān chi khuithuira; chieina nali athumli reikhameiya kala pangmeiya yur akha sāra."

Mosesna Avāli Seihā Sai

¹³Kha Mosesna ithumwui Avāli hānga, "Egyptnaobingna chi shāra, kaja nawui pangshap eina mi hi athumwui lungli eina thānshok kahaina, ¹⁴kala athumna ngalei hiwui kapambingli hāngra. Na, ithumwui Avā, mi hiwui lungli ngasomi kaji, na, ithumwui Avā, mashā eina theihaira kaji, nawui muiyā chi athumwuitungli nganinga kaji, kala ngashun muiyā pakra̱ eina, ngayā meiwon pakra̱ eina nana athumwui mangāli rida vā kaji athumna shākahaina. ¹⁵Nana mi hi saikora akha thada shaothatakha, nawui mingkhamayāng shākahai yurbingna hāngra, ¹⁶'Varena mi hi athumli ngashit kahai ngaleili thānkashok mararthuwa kajiwui vang, ana athumli lamhāngli shaothathaowa.' ¹⁷Kala ara, ina nali kapona, nana hithāda kahāng athishurda Amei Avāwui pangshap chi reimeiranu, ¹⁸'Ithumwui Avā malung mathuizarmana, makhangachei leikashina pemtinghai, khayonkhamāng kala morei pheokhamena. Chithālala ana yonkahaibingli khipākha mavātlakla mapheomirarmana, avā ngarāwui morei chi naongarāwuitungli thot kakathuma kala khamate eina tangda tāngasaka.' ¹⁹Ina nali kapona, nawui makhangachei leikashi reimatai athishurda, Egyptwui eina ara eina tangda nana athumli pheokhami kahai thada, hi mibingwui khayonkhamāng chi pheomiserulu."

²⁰Chieina ithumwui Avāna hānga, "Nawui tui athishurda ina pheomihaira.

²¹"Kha kachangkhat, I ringda, kala okathui saikora iwui tekhamateina pemra, ²²kachangkhat, iwui tekhamatei kala Egypt eina lamhāngli ina sākahai khamachutbing chi theida mi saikora, chithālala ili tharā shida chāng tangda iwui akhon manganāthuwabing chi, ²³ina athumwui avā ngarāli tuingashit sākahai ngalei chi matheimara. Ili chinhai khipākha chi matheimara. ²⁴Kha iwui rao Caleb manglā khangatei akha zanga, kala ili ningtongda shurhaira. Ina ali a vāzanga kahai ngalei chili khuizangngasakra, kala awui ara̱-azāna chi shimlui khuira. ²⁵Amaleknaobing kala Canaannaobing tampākbingli pamda lei. Akhama, ngareikhuida Red Seashong vāda lamhāngli kuizatlu."

²⁶Kala ithumwui Avāna Moses eina Aaronli hānga,

²⁷"Hi makhayā ashangva̱na khimatam eina tangda iwuitungli ngurngur matuikhala? Israelnaobingna iwuitungli kapumpama china ina shāhaira. ²⁸Athumli hānglu, 'I ringda, da ithumwui Avāna hānga, nathumna kahāngkahai ina shākahai chi tākam eina ina nathumli sāmira:

²⁹'Iwuitungli ngurngur khamatui, zingkum maga̱ kala chiwui atung mashing kahai nathum saikorawui kathingunbing lamhāng hili kongluira. ³⁰Jephunnehwui naomayara Caleb kala Nunwui naomayara Joshua maningla khipālikha, nathum khipākha ina nathumli sompaira da tuingashit sākahai ngalei chili mazanglakmara. ³¹Kha nathumna sāshai ngasāra da hāngkahai nathumwui naoshinaobing chi ina khuizangngasakra; nathumna khalanhai ngalei chi athumna theira. ³²Kha nathumva, hi lamhāngli thida kongluira. ³³Nathumwui kathingunbingwui naomeikapta lamhāngli haihaoranglakha eina tangda, nathumwui naongarāna nathumwui mashitkasang chi phungda lamhāngli zingkum hangmati yaokahoma ngasāra. ³⁴Nathumna ngalei chi akhayanga zimiksho hangmati athishurda, zimiksho akhawui khavā zingkum akha da, nathumna nathumwui khayonkhamāng chi zingkum hangmati phungra, kala ina nathumli makhamayā chi theira. ³⁵Ina, nathumwui Avā, hānghaira: ili makhamayāwui kazip khuikahai makaphā yarui ashangva̱ katonga hili makahatlakla ina hikathā sāra. Athum lamhāng hili katang vaida, chili thira.'"

³⁶Mosesna ngalei ara̱yang khavai chihokashoka mibingna latunglaga, ngalei chiwui pao kapikta unghānga yarui ashangva̱ katongali Moseswuitungli ngurngur khamatui ngasaka. ³⁷Ngalei chiwui pao kapikta unghāngkahai mibing china ithumwui Avāwui mangāli kazātkashi eina thihaowa. ³⁸Kha ngalei ara̱yang khavai vāshoka mibing chiwui ngachaili, Nunwui naomayara Joshua eina Jephunnehwui naomayara Caleb chila kharing eina leihaowa.

³⁹Mosesna tui hi Israelnaobing saikorali shokhānga tharan, mibingna haklak eina chapngachai.

⁴⁰Athum ngathorthakva̱ ngakarthuida kaphungtonli kaida hānga, "Yanglu, ithum hili lei. Ithumwui Avāna ngashit kahai pam chili ithum kāra, kaja ithumna morei sāhaira."

⁴¹Kha Mosesna hānga, "Khisāda nathum ara ithumwui Avāwui ningkhami manganāmakhala? Chi maungshungmara. ⁴²Mavaalu, kaja ithumwui Avā nathumli mangasomana, chithākha nathumwui yangkashebingwui pāngli maishipaishina. ⁴³Kaja Amaleknaobing eina Canaannaobing nathumwui mangāli apam chili lei; nathum raighai eina yumra. Nathumna ithumwui Avāli shurkahaiwui eina ngalanhaowa, chiwui vang ana nathumli mangasomana."

⁴⁴Kha ithumwui Avā kala Moseswui tuingashitwui oko chi rāmrahwui eina mathuilakmana chithālala, athumna kaphungramwui kaphungtonli kā khavai ngazeka. ⁴⁵Chieina chiwui kaphungram chili kapama Amaleknaobing eina Canaannaobingna tunglaga, athumli yuida Hormah vāshungda kharomvai.