Mishān 15

15 ¹Ithumwui Avāna Mosesli hānga:

²"Israelwui mibingli hithāda hānglu: 'Ina nathumli sompam khavai mikida ngalei chili nathum vāzang tharan, ³kala nathumna ili meili kachigat, rikkatā kachigat lah pha̱kaphayā, khamataiya khangashit kharun khavai, lah thāda kachigatwui vang, lah nathumwui langchin sākahai phanitbingli, seishangwui eina nilala yaoshangwui eina nilala ili ningyāngkhaung nganamkaphā sākhavai chigat tharan, ⁴chieina awui kachigat chigata a china manaktak kahai mathir khuilui akhawui akhum katharā chi thao lengkhor akhawui khum matiwui akha eina manātta ili tharāzāt kachigatla chigatra. ⁵Yaonao ava̱va̱li rikkatā kachigat lah pha̱kaphayā eina ngasoda ra̱shakchigat sākhavai drakhāra̱ lengkhor akhawui khum matiwui akha ngarānra.

⁶"Lah yaovā akhawui vang, manaktak kahai mathir khuilui akhawui akhum tharāwui khani chi thao lengkhor akhawui khum kathumwui akha eina manātta tharāzāt kachigat ngarānra, ⁷kala ra̱shakchigat sākhavai drakhāra̱ lengkhor akhawui khum kathumwui akha ili ningyāngkhaung nganamkaphā sāda chigatra. ⁸Nathumna mukvānao akha rikkatā kachigat lah pha̱kaphayā sākhavai, khamataiya khangashit kharun khavai, lah ili ningyatchigat sākhavai ngarān tharan, ⁹mukvānao chi eina ngasoda, manaktak kahai mathir khuilui akhawui akhum tharāwui kathum chi thao lengkhor akhawui tangkhai eina manātta tharāzāt kachigat khuirāra, ¹⁰ra̱shakchigat sākhavai drakhāra̱ lengkhor akhawui tangkhai khuirāra, hi ili ningyāngkhaung nganamkaphā meili kachigatna. ¹¹Mukvā akhawui vang, yaovā akhawui vang, yaonao akhawui vang, lah menao akhawui vang hithāda sāphalungra. ¹²Nathumna ngarān chi mashing athishurda, kachiva̱ ava̱va̱li chithāda sāra.

¹³"Israel luinganaibing saikorana meili kachigat, ili ningyāngkhaung nganamkaphā, chigat tharan hithāda sāphalungra. ¹⁴Kala kha̱mi akha nathumwui alungli ngaso, lah nathumwui thot-thot peichaoda nathumwui ngachaili khalei kachikathāna, ili ningyāngkhaung nganamkaphā meili kachigat sāakha, nathumna sā thāda ana sāphalungra. ¹⁵Nathum eina nathumwui alungli ngasokharā kha̱mi, kazipwui vang shiyan akhamāngna; hi nathumwui thot-thot peichaoda katang makhavaiwui shiyan-chikanna. Iwui mangāli kha̱mila nathum thāda leira. ¹⁶Ain akha eina shiyan-chikan akhana nathum eina nathumli ngasokharā kha̱miwui vang ngaraichāra."

¹⁷Kala ithumwui Avāna Mosesli hānga:

¹⁸"Israelnaobingli hithāda hānglu: Ina nathumli khuivā ngalei chili nathum vāzang tharan, ¹⁹chieina nathumna ngalei chiwui theishirai shai tharan, nathumna ili kachigat khuirāra. ²⁰Ranpumwui kachigat thada, nathumwui khamui kharewui eina khamuitang akha kachigat khavai khuirāra. ²¹Nathumwui khamui kharewui eina, nathumwui thot kachida nathumna ili kachigat mira.

Ithumwui Avāna Matheimada Sākahai Morei Fakhammi

²²"Kala nathum ma̱thuihaida, ina Mosesli hānghai ningkhami saikora hi mamayon tharan, ²³ina Moseswui eina nathumli kaso kahai saikora, ina kaso kahai zimikshowui eina thuilaga, nathumwui thot kachida rida, ²⁴chithākha matheimada sāhaida, yarui ashangva̱wui eina thumhaiakha, yarui ashangva̱ katongana mukvānao akha rikkatā kachigat sākhavai, ili ningyāngkhaung nganamkaphā, chiwui tharāzātchigat kala ra̱shakchigat eina ngasoda khangachā athishurda khuirāra, kala suihamchigatwui vang mevā akhala chigatra. ²⁵Pāngmon china Israelnao yarui ashangva̱ katongawui vang pheomira, kala athumli pheomihaora, kaja hi matheimada sākahaina, kala athumna athumwui kachigat, ili mei eina riktā kachigat, kala athumwui matheimada khayonwui vang iwui mangāli athumwui suihamchigat khuirāhaira. ²⁶Israel yarui ashangva̱ katonga, kala athumwui ngachaili ngasokharā kha̱mi eina ngarumda, pheomihaora, kaja mi saikorana matheimada morei sāhaira.

²⁷"Kala mi akhana matheimada morei sāhaiakha, ana suihamchigatwui vang kumkha kākahai me ava̱ akha chigatra. ²⁸Pāngmon china iwui mangāli matheimada morei sāda ma̱thui kahai miwui vang pheomira, awui vang pheomida, kala ali pheomihaora. ²⁹Israelnaobing ngachaili luinganaibing kala athumli ngasokazata kha̱mi, matheimada kasāwui vang ain akhamāngmara.

³⁰"Kha khayāning khanganing eina kasā mi, luinganai nilala, ngasokharā kha̱mi nilala, ana ili mashāta. Mi chi awui miyurwui eina katathaora. ³¹Kaja ana iwui tui ningkachaihaida, kala iwui ningkhami sakhaida, mi chi makahatlakla katathaora; awui khayonkhamāng awuili leira."

Sabbath Ngakaikashi kala Chiwui Pangshap

³²Israelnaobing lamhāngli leilakha, sabbaththang thing khuiphung kahai mi akha athumna thei. ³³Ali thing khuiphung kahai theibingna Moses, Aaron, kala yarui ashangva̱ katongawui mangāli ali khuivai. ³⁴Athumna ali phātopli narhaisai, kaja awuili khi sāphalungkhala da machishātrangsai.

³⁵Ithumwui Avāna Mosesli hānga, "Mipa chi shaothatra; mi ashangva̱na ali rāmrahwui ayarli ngalung eina horthatra."

³⁶Ithumwui Avāna Mosesli kakaso athishurda yarui ashangva̱na ali rāmrahwui ayarli khuishokta lunggui eina horthathaowa, kala a thihaowa.

Ithumwui Avāli phaningung khavai chontheira̱

³⁷Kala ithumwui Avāna Mosesli hānga:

³⁸"Israelwui mibingli hānglu: athumna thot kachida athumwui kachonwui achikunbingli chontheira̱ sāsangserranu, kala achikun kachiva̱wui chontheira̱li khamayinga khara̱ akha pamranu. ^a a v38 Chontheira̱ — kachonwui achikunli sāsangserlaga farorki — thangthangwui mikna theida ithumwui Avāwui ningkhamiwui athishurda kharing khavai phaningung ot china; shitkasang Israelnaobingna kum kachungkha farorhaisai. ³⁹Chi nathumna khayang khavai chontheira̱ akha sāra, chithāda nathumna iwui ningkhami saikora phaningungda mayonra, nathumli shitkasang makhaleiva̱ ngasakki nathumwui wuklung kala nathumwui mikwui thi mashurmara. ⁴⁰Hithāda nathumna iwui ningkhami saikora phaningungda mayonra, kala nathum iwui vang katharasera. ⁴¹Nathumwui Avā sākhavai Egypt ngaleiwui eina nathumli thānshokkhame nathumwui Avā chi ina. Ina nathumwui Avā chi ina."