ዘሑልቍ 14 FHB Father's Heart Bible™

14 ¹ኵሉ እቲ ማሕበር ድማ ድምፆም ኣልዒሎም ዓው በሉ፤ እቶም ህዝቢ ኸዓ በታ ለይቲ እቲኣ በኸዩ። ²ኵሎም ደቂ እስራኤል ኣብ ልዕሊ ሙሴን ኣሮንን ኣጕረምረሙ፤ ኵሉ እቲ ማሕበር ከዓ “ኣብ ምድሪ ግብፂ እንተ ንመውት ኔርና! ወይ ከዓ ኣብዝ ምድረ በዳ እዙይ እንተ ንመውት ኔርና! በልዎም። ³ኣቦና ብሰይፊ ምእንቲ ኽንወድቕ ናብዛ ምድሪ እዚኣ ስለምንታይ የእትወና ኣሎ? ኣንስትናን ደቅናን ምርኮ ክኾኑ እዮም። ናብ ግብፂ እንተ ተመለስና ይሕሸናዶ ኣይኮነን?” ⁴ነንሕድሕዶም ድማ “መራሒ ሺምና ናብ ግብፂ ንመለስ” ተበሃሃሉ።

⁵ሽዑ ሙሴን ኣሮንን ኣብ ቅድሚ ኵሉ ማሕበር ህዝቢ እስራኤል ብገፆም ተደፊኦም ናብ ምድሪ ፍግም በሉ።

⁶ካብቶም ነታ ምድሪ ዝሰለሉ ዝነበሩ፥ ኢያሱ ወዲ ነዌን ካሌብ ወዲ ዮፎኒን ክዳውንቶም ቀደዱ። ⁷ንዅሉ ማሕበር ደቂ እስራኤል ከዓ ከምዙይ በልዎም፦ “እታ ሓሊፍና ዝሰለናያ ምድሪ፥ የመና ፅብቕቲ እያ። ⁸ኣቦና ብኣና እንተ ተሓጒሱ፥ ናብዛ ምድሪ እዚኣ ኼእትወና፥ ነዛ ፀባን መዓርን እተውሕዝ ምድሪ ኸዓ ክህበና እዩ። ⁹ኣብ ልዕሊ ኣቦና ጥራሕ ኣይትዓልዉ፤ ነቶም ህዝቢ እታ ምድሪ ኸዓ ኣይትፍርሕዎም፤ ንሳቶም ምግብና እዮም እሞ። ፅላሎም ሐዲግዎም እዩ፤ ኣቦና ኸዓ ምሳና እዩ። ኣይትፍርሕዎም።”

¹⁰ኵሉ እቲ ማሕበር ድማ ንኢያሱን ንካሌብን ብእምኒ ክቕጥቅጥዎም ተዛረቡ። ሽዑ ክብሪ ኣቦና ኣብ ድንኳን ምርኻብ ንኵሎም ደቂ እስራኤል ተገልፀ።

¹¹ኣቦና ድማ ንሙሴ ከምዙይ በሎ፦ “እዝ ህዝቢ እዙይ ክሳዕ መዓዝ ክንዕቀኒ እዩ? በቲ ኣብ ማእኸሎም ዝገበርክዎ ዅሉ ምልክታት ከይተረፈ፥ ክሳዕ መዓዝ ብኣይ ዘይኣምን? ¹²ብፌራ ኽወቕዖም፥ ርስቶም ድማ ከሕድጎም እየ፤ ንኣኻ ኸዓ ካብኣቶም ዝዓበየን ዝሓየለን ህዝቢ ኽገብረካ እየ።”

ሙሴ ናብ ኣቦ ይምህለል

¹³ሙሴ ግና ንኣቦና ከምዙይ በሎ፦ “ነዝ ህዝቢ እዙይ ካብ ማእኸሎም ብሓይልኻ ኣውፂእካዮ ኢኻ እሞ፥ ግብፃውያን ክሰምዕዎ እዮም፤ ¹⁴ንሳቶም ከዓ ነቶም ኣብዛ ምድሪ እዚኣ ዝነብሩ ሰባት ክነግርዎም እዮም። ንስኻ ኣቦና ኣብ ማእኸል እዝ ህዝቢ እዙይ ከም ዘለኻ፥ ንስኻ ኣቦና ገፅ ንገፅ ከም እትርአ፥ ደበናኻ ኣብ ልዕሊኦም ደው ከም ዝብል፥ ብመዓልቲ ብዓምዲ ደበና፥ ብለይቲ ኸዓ ብዓምዲ ሓዊ ኣብ ቅድሚኦም ከም እትኸይድ ሰሚዖም እዮም። ¹⁵ነዝ ህዝቢ እዙይ ብሓንሳእ እንተ ቐቲልካዮ፥ እቶም ዝናኻ ዝሰምዑ ኣህዛብ ከምዙይ ክብሉ እዮም፦ ¹⁶‘እግዚኣብሄር ነዝ ህዝቢ እዙይ ናብታ መሓለሎም ምድሪ ኼእትዎም ስለ ዘይከኣለ፥ ኣብ ምድረ በዳ ሓረዶም።’ ¹⁷ሕዚ ኸዓ፥ በይዛኻ፥ ከምቲ እተዛረብካዮ፥ ሓይሊ ጐይታይ ኣቦ ዓብዪ ይኹን፤ ከምዙይ ኢልካ ኢኻ፦ ¹⁸‘ኣቦና ንቝጥዓ ደንጓዪ፥ ምሕረቱ ዝበዝሐ፥ ዓመፅን በደልን ይቕረ ዝብል፥ ንበዳሊ ግና ኸም ንፁህ ዘይርኢ፥ ሓጢኣት ኣቦታት ኣብ ደቆም ክሳዕ ሳልሳይን ራብዓይን ትውልዲ ዘምፅእ እዩ።’ ¹⁹በይዛኻ፥ ከም ዕቤት ምሕረትካ፥ ከምቲ ኻብ ግብፂ ኽሳዕ ሕዚ ይቕረ ዝበልካሎም፥ ንበደል እዝ ህዝቢ እዙይ ይቕረ በለሉ።”

²⁰ኣቦና ድማ “ከም ቃልካ ይቕረ ኢለ ኣለኹ” በለ።

²¹“ግና ብሓቂ፥ ኣነ ህያው ከም ዝኾንኩ፥ ብክብረይውን ኵላ ምድሪ ኸም እትመልእ፥ ²²እቶም ክብረይን እቲ ኣብ ግብፅን ኣብ ምድረ በዳን ዝገበርክዎ ምልክታትን ዝረአዩ፥ እናሞ ዓሰርተ ጊዜ ዝፈተኑንን ቃለይ ዘይሰምዑን ኵሎም ሰባት፥ ²³ነታ ነቦታቶም ዝመሓልኩሎም ምድሪ ኣይክርእይዋን እዮም። ካብቶም ንኣይ ዝነዓቑ ሓደ እኳ ኣይክርእያን እዩ። ²⁴ባርያይ ካሌብ ግና ካልእ መንፈስ ስለ ዘለዎን ብምሉእ ልቡ ስለ ዝሰዓበንን፥ ናብታ ዝኣተዋ ምድሪ ኸእትዎ እየ፤ ዘርኡ ኸዓ ክወርሳ እዩ። ²⁵ኣማሌቃውያንን ከነዓናውያንን ኣብ ለሰታት ይነብሩ ኣለዉ። ፅባሕ ተመሊስኩም ናብ ምድረ በዳ፥ ናብ ቀይሕ ባሕሪ ኣምርሑ።”

²⁶ኣቦና ድማ ንሙሴን ንኣሮንን ከምዙይ ኢሉ ተዛረቦም፦

²⁷“እዝ ክፉእ ማሕበር እዙይ ክሳዕ መዓዝ ኣብ ልዕለይ ከጕረምርም እዩ? ምጕርምራም ደቂ እስራኤል ኣብ ልዕለይ ዘጕረምርምዎ ሰሚዐ ኣለኹ። ²⁸ንገሮም፦ ‘ኣነ ህያው ከም ዝኾንኩ፥ ይብል ኣቦና፥ ከምቲ ክትብሉ ዝሰማዕኩኹም ጌረ ክገብረኩም እየ፦

²⁹‘ሬሳታትኩም ኣብዝ ምድረ በዳ እዙይ ክወድቕ እዩ፤ ካብ ዕስራ ዓመት ንላዕሊ ዝተቘፀርኩም፥ ኣብ ልዕለይ ዘጕረምረምኩም ኵሉ ቑፅርኹም። ³⁰ብዘይ ካሌብ ወዲ ዮፎኒን ኢያሱ ወዲ ነዌን፥ ናብታ ኣብኣ ኸቕምጠኩም ዝመሓልኩላ ምድሪ ኻባኻትኩም ሓደ እኳ ኣይኣቱን እዩ። ³¹ነቶም ምርኮ ኽኾኑ እዮም ዝበልኩሞም ናእሽቱ ደቅኹም ግና ኸእትዎም እየ፤ ንሳቶም ድማ ነታ ንስኻትኩም ዝነዓቕኩማ ምድሪ ክፈልጥዋ እዮም። ³²ንስኻትኩም ግና ኣብዝ ምድረ በዳ እዙይ ክትወድቑ ኢኹም። ³³ደቅኹም ድማ ክሳዕ እቲ ናይ መወዳእታ ሬሳኹም ኣብ ምድረ በዳ ዝወድቕ፥ ኣብ ምድረ በዳ ኣርብዓ ዓመት ጓሶት ኮይኖም፥ ክሕደትኩም ክፆሩ እዮም። ³⁴ከምቲ ነታ ምድሪ ዝሰለኹማ መዓልቲታት፥ ማለት ኣርብዓ መዓልቲ፥ ንሓንቲ መዓልቲ ሓደ ዓመት፥ ኣርብዓ ዓመት በደልኩም ክትፆሩ ኢኹም፤ ተቓውሞይ ከዓ ክትፈልጡ ኢኹም። ³⁵ኣነ ኣቦኹም ተዛሪበ ኣለኹ፦ ነዝ ኣብ ልዕለይ ዝተኣከበ ዅሉ ክፉእ ማሕበር እዙይ ብሓቂ ኸምዙይ ክገብሮ እየ፤ ኣብዝ ምድረ በዳ እዙይ ክውድኡ፥ ኣብኡ ኸዓ ክሞቱ እዮም።’”

³⁶እቶም ሙሴ ነታ ምድሪ ኽስልይዋ ዝሰደዶም ሰባት፥ ብዛዕባኣ ክፉእ ነገር ብምንጋር ንዅሉ እቲ ማሕበር ኣብ ልዕሊ ሙሴ ዘጕረምርም ገይሮም ተመለሱ። ³⁷እቶም ብዛዕባ እታ ምድሪ ኽፉእ ነገር ዘምፅኡ ሰባት፥ ኣብ ቅድሚ ኣቦና ብፌራ ሞቱ። ³⁸ኢያሱ ወዲ ነዌን ካሌብ ወዲ ዮፎኒን ግና፥ ካብቶም ነታ ምድሪ ኽስልይዋ ዝኸዱ ሰባት፥ ብህይወት ተረፉ።

³⁹ሙሴ ኸዓ ነዝ ቃላት እዙይ ንዅሎም ደቂ እስራኤል ምስ ነገሮም፥ እቶም ህዝቢ የመና ሓዘኑ።

⁴⁰ኣንጊሆም ድማ ተሲኦም ናብ ርእሲ እቲ እምባ ደየቡ፤ “እንሆ ኣለና። ሓጢኣት ጌርና ኢና እሞ፥ ናብቲ ኣቦና ዝመባፅዐልና ቦታ ክንድይብ ኢና” ድማ በሉ።

⁴¹ሙሴ ግና “ስለምንታይ ሕዚ ትእዛዝ ኣቦና ትሓልፉ ኣለኹም? ኣይቅንዐኩምን እዩ። ⁴²ኣቦና ኣብ ማእኸልኩም የለን እሞ፥ ኣብ ቅድሚ ፀላእትኹም ከይትውቅዑ፥ ኣይትደይቡ። ⁴³ኣማሌቃውያንን ከነዓናውያንን ኣብኡ ኣብ ቅድሜኹም ኣለዉ እሞ፥ ብሰይፊ ክትወድቁ ኢኹም። ካብ ምስዓብ ኣቦና ስለ ዝተመለስኩም፥ ምሳኹም ኣይኸውንን እዩ።”

⁴⁴ንሳቶም ግና ናብ ርእሲ እቲ ኰረብታ ኽድይቡ ደፈሩ፤ ታቦት ኪዳን ኣቦናን ሙሴን ግና ካብ ሰፈር ኣይተንቀሉን። ⁴⁵ሽዑ እቶም ኣብቲ ኰረብታ ዝነብሩ ኣማሌቃውያንን ከነዓናውያንን ወሪዶም ወቒዖም፥ ክሳዕ ሔርማ ቀጥቀጥዎም።