Pāngmonshi 7

7 ¹"Hi khayonchigatwui ainna. Hi tharmathengmeikap kajena. ²Rikkatā kachigat taithat khavai apam chili, khayonchigatla taithatra; kala hanphutwui ayar saikorali ashee kuimareida heirora. ³Chiwui athao saikora, akhameiwui athao kala akharili khangathān athao, ⁴amakei khani kala chili kharoma khangathān athao, kala amathinli khangathān, amakei eina ngarumda khuithuilaga chigatra. ⁵Pāngmon china hanphuttungli ithumwui Avāli mei eina rikkatā kachigat sāda riktāra; hi khayonchigatna. ⁶Pāngmon shimkhurwui mayarnao kachiva̱ shaipai, katharapamli maningla shaira; hi tharmathengmeikap kajena.

⁷"Suihamchigat kala khayonchigat ain akhana: chi eina pheomi khavai kasā pāngmonwui ngasāra. ⁸Khipākhawui rikkatā kachigat chigat kahai pāngmon china, chiwui ahui chi khalattawui yar sāra. ⁹Tharāzāt kachigat meiphungli ngānkahai, kala hamli lah khāngtungli sākahai saikora, chi chigat kahai pāngmonwui ngasāra. ¹⁰Tharāzāt kachigat kachiva̱, thao eina manāt lah thengkahai, Aaronwui naomayarabing saikorali ngaraichā eina ngayarra.

Ningyatchigatwui Ainna

¹¹"Hi khipākhana ithumwui Avāli khuirā khavai ningyatchigatwui pha̱kaphayāwui ainna. ¹²Ana ningkashiwui pha̱kaphayā chigatakha, chieina ngasoda khawok makazang thao eina manāt khamui, thao neokahai khawok makazang katheng khamui, kala manaktak kahai mathir naikazakzaklaga thao eina manāt khamui chigatra. ¹³Awui ningkashiwui ningyatchigatwui pha̱kaphayāli ngasoda khawok kazang khamui khuirāra. ¹⁴Chiwui eina ana akha-akha ithumwui Avāli chigat khavai chigatra; chi ningyatchigatwui ashee kuimarei kahai pāngmonwui ngasāra. ¹⁵Awui ningkashiwui ningyatchigatwui asā chi chigat zimikshochida shaira; chiwui eina khipākha ngathor eina tangda mahaipaimara.

¹⁶"Awui kachigat chi khangashit kachigat lah lemmet kachigatakha, chi chigat zimikshochida shaira; kala katai chi akhama kathāli shaipaisera. ¹⁷Kha pha̱kaphayāwui asā kakathuma thangla katai chi meili riktāphalungra. ¹⁸Awui ningyatchigatwui sā chi kakathumathang shaisaakha, chi makhuisangmimara, kala chigat kahai miwui vang phā masamphangmara; hi ningkakachai otna, kala kashaiya mi kachiva̱ khayon phungra.

¹⁹"Makathara otli saza̱ sā chi mashaipaimana; asā chi mei eina riktāhaora. Kha asā chiya, kathara mi kachiva̱na shaipaisera. ²⁰Ithumwui Avāwui ningyatchigatwui sā chi makathar laleida kazā mi chi awui miyurwui eina katathaora. ^a a v20 'Mibingwui eina katathaora' hangkahai hi Israelwui kadhara yaruiwui eina ngashamshok khangaraona; hi khamalā Varewui bicharna nilala yaruiwui otsakna nilala shokpaira. ²¹Kachikathāna makathara ot, miwui makathar, makathara sāyur, khamalā makathar ningkakachai ot khipākha saza̱laga, chi thili ithumwui Avāwui ningyatchigatwui sā shaiakha, mipa chi awui miyurwui eina katathaora."

Avāna Athao kala Ashee Mashai da Ningmi

²²Ithumwui Avāna Mosesli hānga,

²³"Israelwui mibingli hānglu: Sei, yao, lah mewui athao khipākha mashaipaimana. ²⁴Kathingunwui athao, lah khazursāwui athao chi khipākha otli sāpaira, kha chi khipālikha mashaipaimana. ²⁵Ili mei eina rikkatā chigat sāyurwui athao kazā mi kachiva̱ chi awui miyurwui eina katathaora. ²⁶Nathumwui somkapam apam saikorali, vānaoranu sayurranu, ashee khipākha mashaipaimana. ²⁷Ashee khipākha kazā mi kachiva̱ chi awui miyurwui eina katathaora."

Pāngmonbingwui Yar

²⁸Ithumwui Avāna Mosesli hānga,

²⁹"Israelnaobingli hāngra: Awui ningyatchigatwui pha̱kaphayā ili chigat mi kachiva̱na, chi pha̱kaphayāwui eina awui kachigat ili khuirāra. ³⁰Awui pāng eina iwui mei eina rikkatā kachigat khuirāra; asuk chi iwui mangāli khayitta khayitchigat sākhavai, athao eina asuk chi ana khuirāra. ³¹Pāngmon china athao chi hanphuttungli riktāra; asuk chi Aaron eina anaomayarabingwuina. ³²Nathumwui ningyatchigatwui eina chigat sāda, yāshongwui akhaishāng chi pāngmonli milu. ³³Aaronwui naomayarabingwui alungli, ningyatchigatwui ashee eina athao chigat mi china, yāshongwui akhaishāng chi awui sharuk sāra. ³⁴Kaja Israelnaobingwui ningyatchigatwui eina, khayitchigat kahai asuk eina chigat kahai akhaishāng chi ina khuihaira, kala chi Israelnaobingwui eina pāngmon Aaron eina anaomayarabingli mashimānda leiching yar sāda mihaira."

³⁵Hi ithumwui Avāli pāngmon sāda otram ngatha̱mi khavai athumli khuirāmi mithangwui eina, ithumwui Avāwui mei eina kachigatwui eina Aaron kala anaomayarabingwui yarna. ³⁶Athumli thao neomi mithangli, Israelnaobingwui eina hi athumli mikhavai ithumwui Avāna kasoi; hi athumwui thot kachida katang makhavai yarna. ³⁷Hi rikkatā kachigat, tharāzāt kachigat, suiham kachigat, khayonchigat, tharchisinwui kachigat, kala ningyat kachigatwui ningkhamina, ³⁸chi ithumwui Avāna Sinai Kaphungli Mosesli kaso kahaina; chi Sinai lamhāngli Israelwui mibingli athumwui kachigatbing ithumwui Avāli khuirā khavai kaso mithangna.