Leviticus 7

7 ¹"Na dis be di law of di guilt offering. E holy well well. ²For di same place wey dem dey kill di burnt offering, na dia dem must kill di guilt offering; make dem splash im blood for all di sides of di altar. ³Dem go offer all im fat: di fat tail and di fat wey cover di inside organs, ⁴di two kidneys and di fat wey dey dem for di waist, and di long part of di liver, wey dem go comot together wit di kidneys. ⁵Di priest go burn dem for di altar as food offering give our Papa; na guilt offering e be. ⁶Any man wey be priest fit chop am, but na only for holy place dem go chop am; e holy well well.

⁷"Di sin offering and di guilt offering dey follow one law: e belong to di priest wey take am make atonement. ⁸Di priest wey offer person burnt offering go keep di skin for imsef. ⁹Any grain offering wey dem bake for oven, and all wey dem make for pan or for griddle, go belong to di priest wey offer am. ¹⁰Every grain offering, whether dem mix am wit oil or e dry, go belong equally to all di sons of Aaron.

Di Law of di Peace Offering

¹¹"Na dis be di law of di sacrifice of peace offerings wey person fit bring give our Papa. ¹²If e dey bring am as thank offering, e must offer am togeda wit cakes wey no get yeast wey dem mix wit oil, thin bread wey no get yeast wey dem rub oil for body, and cakes of fine flour wey dem knead well well and mix wit oil. ¹³E must bring loaf of bread wey get yeast togeda wit im thanksgiving sacrifice of peace offerings. ¹⁴From am e must give one from each kind as offering give our Papa; e go belong to di priest wey splash di blood of di peace offerings. ¹⁵Dem must chop di meat of im thanksgiving peace offerings for di same day wey dem offer am; nutin from am must not remain reach morning.

¹⁶"But if im offering na vow or offering wey e give from im mind, dem must chop am for di day wey e offer am; and wetin remain, dem fit chop am for di next day. ¹⁷But any meat of di sacrifice wey remain reach di third day, dem must burn am wit fire. ¹⁸If dem chop any of di meat of im peace offering for di third day, dem no go accept am, e no go count for di person wey offer am—e don spoil, and whoever chop am go carry im guilt.

¹⁹"Meat wey touch anytin wey no clean, dem must not chop am—make dem burn dat meat wit fire. But di oda meat: anybody wey clean fit chop am. ²⁰Anybody wey chop di meat of our Papa peace offering while e no clean, dem go cut am comot from im people. ^a a v20 To 'cut person comot from im people' mean say dem go remove am from di Covenant community of Israel, e fit be by judgement from God or by wetin di community go do. ²¹Whoever touch anytin wey no clean—dirty tin wey comot from person, animal wey no clean, or any tin wey no clean wey dem hate—den e come chop di meat from our Papa peace offering, dem go cut dat person comot from im people."

Our Papa Say Make Dem No Chop Fat and Blood

²²Our Papa talk give Moses:

²³"Tell di people of Israel: Make una no chop any fat from cow, sheep, or goat. ²⁴Fat from animal wey don die by imsef or animal wey wild beast tear, una fit use am do any oda tin, but make una no chop am at all. ²⁵Anybody wey chop fat from animal wey dem offer give me wit fire, dem go cut am comot from im people. ²⁶Una must not chop any blood at all, whether na from bird or animal, for anywia una dey stay. ²⁷Anybody wey chop any blood, dem go cut am comot from im people."

Di Portion Wey Belong to di Priests

²⁸Our Papa talk give Moses:

²⁹"Talk give di people of Israel: Whoever bring im peace offering give me must bring im offering give me from dat sacrifice. ³⁰Wit im own hands e must bring my food offerings; e must bring di fat togeda wit di chest, make dem wave di chest as wave offering for my front. ³¹Di priest go burn di fat for di altar; but di chest go belong to Aaron and im sons. ³²Una go give di right thigh to di priest as offering from una peace offerings. ³³Whichever son of Aaron wey offer di blood and di fat of di peace offering go get di right thigh as im own portion. ³⁴Bicos I don take di chest of di wave offering and di thigh of di offering from di peace offerings of Israel, and I don give dem to Aaron di priest and im sons as portion wey go dey forever from Israel."

³⁵Na dis be di portion of Aaron and im sons from di food offerings of our Papa, from di day wey dem bring dem come serve our Papa as priests. ³⁶Our Papa command say make dem give dem dis tin from di people of Israel, for di day wey e anoint dem—portion wey go dey forever for all dia generations. ³⁷Na dis be di law for burnt offerings, grain offerings, sin offerings, guilt offerings, ordination offerings, and peace offerings, ³⁸wey our Papa command Moses for Mount Sinai, for di day wey e command di people of Israel make dem bring dia offerings give our Papa for di Wilderness of Sinai.