Avāna Awui Pāngmonbingli Tharchisin
Mosesna Aaron eina awui naomayarabingli tara̱ eina pheomi, phoi shonmi, thao sangmi, athumwui yāshongwui khanātonli, yapāngwui pangva̱li kala yāpheiwui pheiva̱li ashee neomi, kala kazip khavai kachonshimwui khāmongli shinithang ngāda athumli pāngmon sāmi. Athumna khalatta masangkhuimana; kahang kachiva̱ chi ithumwui Avāna sākhavai kahang otna.
8 1Ithumwui Avāna Mosesli hānga,
2"Aaron eina anaomayarabing ali ngasoda khuirālu, sāribing, neokhavai thao, suihamchigatwui vang mukvā, yaovā khani, kala khawok makazang khamuiwui māchum khuirālu, 3kala kazip khavai kachonshimwui khāmongpheili yarui ashangva̱ chi kazipkhuilu."
4Ithumwui Avāna ali kakaso athishurda Mosesna sai; kala kazip khavai kachonshimwui khāmongpheili yarui ashangva̱ rākazipa. 5Kala Mosesna ashangva̱li hānga, "Hi ithumwui Avāna sākhavai kakasona." 6Chieina Mosesna Aaron eina anaomayarabing chi khuirāda tara̱ eina pheowa. 7Ana Aaronli phahon ngavaimi, shānneira̱ neimi, katuma phahon ngavaimi, kala ephod ngavaimida, themlāk eina rakkakhui ephodwui chonsā eina neimi, kala chi ali hokshānmi. 8Ana thikhom chi ali sangmilaga, thikhomli Urim eina Thummim kāsangmi. a a v8 Urim eina Thummim hi thikhomli haichinga kathara otbingna, kala atam khangaronbingli Varewui chihokharā ngasan khavai shikachina. 9Ithumwui Avāna Mosesli kakaso athishurda, ana Aaronwui akuili kuitei teimi, kala kuiteiwui mangāli sinā khongphei, kathara kuihon chi sangmi. 10Chieina Mosesna neokhavai thao chi khuilaga tabernacle kala chiwui alungli khalei ot saikora neomida tharchigata. 11Kala chiwui eina hanphutli shini shida yikrora, kala hanphut, chiwui khorkhongbing saikora, kala khongsai eina chiwui rungkhavai aphei chi neomida tharchigata. 12Ana neokhavai thao ngayarkhuida Aaronwui akuili heirorda, ali tharchisin khavai neomi. b b v12 Aaron pāngmon akhoka sāda thao neomi kahai chi, Jishuli phaningung sai—ithumwui Avāna awui naobingli ashongli khuirā khavai thao neomi kahai Pāngmon Akhoka Katong chi. 13Chieina ithumwui Avāna Mosesli kakaso athishurda, Mosesna Aaronwui naomayarabing chi khuirāda, athumli phahon ngavaimi, shānneira̱ neimi, kala athumwui akuili kuihon ngahonmi.
14Ana suihamchigatwui vang mukvā chi khuirai, kala Aaron eina anaomayarabingna chiwui akuili athumwui pāng para. 15Mosesna chi taithatlaga, ashee chi khui, kala pāngmareng eina hanphutwui angajibing chili kuimareida neomida, hanphut chi tharmatheng ngasaka. Kala ashee katai chi hanphutpheili heirorda, hanphut chi tharchigatta, chiwui vang pheomi. 16Ana akharili khangathān athao katonga, amathinli khangathān athao, kala amakei khani eina chili khangathān athao chi khuilaga, hanphuttungli riktai. 17Kha ithumwui Avāna Mosesli kakaso athishurda, mukvā chiwui ahui, asā, kala apai chi rāmrahwui ayarli riktai.
18Ana rikkatā kachigatwui vang yaovā chi khuirai; Aaron eina awui naomayarabingna akuitungli apāng para. 19Mosesna chi taithatlaga, ashee chi hanphut kuimareida heirora. 20Ana yaovā chi amalim sālaga, akui, amalimbing, kala athao chi riktāhaowa. 21Ana akhari-akharā eina apheibing chi tara̱ eina pheohailaga, ithumwui Avāna Mosesli kaso kahai athishurda, yaovā chi tongda hanphutli riktāhaowa; hi rikkatā kachigat, nganamkaphā ot, ithumwui Avāli mei eina rikkatā kachigatna.
22Ana yaovā kakhane, tharchisin khavai yaovā chi khuirai, kala Aaron eina awui naomayarabingna akuitungli apāng para. 23Mosesna chi taithatlaga, ashee ngayarda khuilaga, Aaronwui nākor yāshongwui atonli, awui pangyungho yashongli, kala awui pheiyungho yashongli neomi. 24Mosesna Aaronwui naomayarabing chi khuirāda, athumwui nākor yāshongwui atonbingli, pangyungho yāshongbingli, kala pheiyungho yāshongbingli ashee neomi, kala katai chi hanphut kuimareida heirora. 25Ana athao, khameithao, akharili kharoma athao saikora, amathinli khangathān athao, amakei khani kala chili khangathān athao, kala yā khaishāng chi khuihaowa. 26Khawok makazang ithumwui Avāwui mangāli khalei lukwui eina, ana khamuitang akha, thao khangui khamuitang akha, kala thao makhangui khamuitang akha khuilaga, athao kala yā khaishāng chiwuitungli para. 27Ana saikora chi Aaron eina awui naomayarabingwui pāngli sangda, ithumwui Avāwui mangāli khayitchigat sai. 28Mosesna athumwui pāng eina khuida, rikkatā kachigat chiwuitungli hanphutli riktāhaowa; hi tharchisin kachigat, nganamkaphā ot, ithumwui Avāli mei eina rikkatā kachigatna. 29Ithumwui Avāna ali kaso kahai athishurda, Mosesna asuk chi khuilaga ithumwui Avāwui mangāli khayitchigat sai; hi tharchisin khavai yaovāwui eina Moseswui sharukna. 30Mosesna tharchisin khavai thao kala hanphutli khalei ashee ngayarkhuida, Aaronli kala awui sāribing, awui naomayarabingli kala athumwui sāribing chairora. Chithāda ana Aaron kala awui sāri, awui naomayarabing kala athumwui sāri chi ngasoda tharmatheng ngasaka.
31Mosesna Aaron eina awui naomayarabingli hānga, "Kazip khavai kachonshimwui khāmongpheili asā chi hangra, kala ina 'Aaron eina awui naomayarabingna shaira' da kaso kahai athishurda, tharchisin kachigatwui lukli khalei khamui chi ngasoda chili shailu. 32Asā eina khamui katai chi meili riktāra. 33Nathumwui tharchisin atambing vātlakha eina tangda, shinithang kazip khavai kachonshimwui khāmongpheiwui eina mashokpaimara; kaja nathumli tharchisin sākhavai shinithang sāra. 34Aja zimiksho sākahai chi, nathumwui vang pheomi khavai ithumwui Avāna sākhavai kaso kahaina. 35Nathumna kazip khavai kachonshimwui khāmongpheili ngashun ngayā shinithang pamra, ithumwui Avāwui ningkhami chi mayonda pamlu, maningakha nathum thipaishina; kaja hi ili kaso kahaina." 36Chieina Aaron eina anaomayarabingna, ithumwui Avāna Mosesli kaso kahai saikora chi tākam eina sai.
