Pāngmonshi 9

9 ¹Kachishatathang Mosesna Aaron eina awui naomayarabing kala Israelwui khararnaobingli hokhui. ²Ana Aaronli hānga, "Nakhalattawui vang, suihamchigatwui vang mukvā seinao akha kala rikkatā kachigatwui vang yaovā akha, achuk kapei khani chi khuilaga, ithumwui Avāwui mangāli chigatlu. ³Israelnaobingli hānglu, 'Suihamchigatwui vang mevā akha, kala rikkatā kachigatwui vang kumkha kākahai achuk kapei seinao akha kala yaonao akha khuilu.' ⁴Ithumwui Avāwui mangāli pha̱khavai ningyatchigatwui vang sei akha kala yaovā akha, kala thao eina manāt kahai tharāzāt kachigat ngasoda khuilu; kaja aja ithumwui Avā nathumli chitheira."

⁵Mosesna kaso kahai chi kazip khavai kachonshimwui khāmongpheili athumna khuirai; kala ashangva̱ saikorana vanganailaga ithumwui Avāwui mangāli nganinga. ⁶Mosesna hānga, "Ithumwui Avāna kaso kahai chi sālu, chieina ithumwui Avāwui tekhamatei nathumli chitheira." ⁷Mosesna Aaronli hānga, "Hanphutli rāmeilu. Nawui suihamchigat kala rikkatā kachigat chigatlu, nakhalatta kala mibingwui vang pheomilu; kala ithumwui Avāna kaso kahai athishurda, mibingwui kachigat chigatlaga athumwui vang pheomilu."

⁸Chieina Aaronna hanphutli vanganailaga, awui khalattawui vang kasā suihamchigat seinao chi taithata. ⁹Aaronwui naomayarabingna ashee chi awuili khuirāmi; kala ana apāng mareng ashee chili chumkhuilaga hanphutwui angajibing chili neoda, ashee katai chi hanphutpheili heirora. ¹⁰Kha suihamchigatwui athao, amakei khani, kala amathinli khangathān chi ithumwui Avāna Mosesli kaso kahai athishurda ana hanphuttungli riktai. ¹¹Asā kala ahui chi rāmrah ayarli mei eina ana riktāhaowa. ¹²Rikkatā kachigat chi ana taithata. Aaronwui naomayarabingna ashee chi ali khuirāmi, kala ana hanphutpam kuimareida ashee heirora. ¹³Rikkatā kachigat chi amarimrim sāda, akui eina ngasoda, athumna ali khuirāmi, kala ana hanphuttungli riktai. ¹⁴Ana akharibing kala akhobing chi tara̱ eina pheolaga, rikkatā kachigat eina ngasoda hanphuttungli riktai. ¹⁵Chiwui thili ana mibingwui kachigat chi khuirai; athumwui suihamchigat me chi khuida taithata, kala kharena thāda suihamchigat sai. ¹⁶Ana rikkatā kachigat chi khuirāda shiyan-chikanwui athishurda chigatta. ¹⁷Ana tharāzāt kachigat chi khuirāda panghomkha khuilaga, ngathor rikkatā kachigatli lāngda hanphuttungli riktai. ¹⁸Ana mukvā eina yaovā, mibingwui ningyatchigat pha̱kaphayā chi taithata, kala Aaronwui naomayarabingna ashee chi ali khuirāmi, chi ana hanphut kuimareida heirora. ¹⁹Kha mukvā eina yaovāwui athao chi, akhameiwui athao, akharili kharom athao, amakei, kala amathinli khangathān, ²⁰athumna athao chi asuktungli haihai, kala ana athao chi hanphuttungli riktai. ²¹Kha Mosesna kaso kahai athishurda, Aaronna asuk eina yāshongwui khaishāng chi ithumwui Avāwui mangāli khayitta khayitchigat sai. ²²Kala Aaronna mibingshong awui pāng khāngkālaga athumli somi, chiwui thili suihamchigat, rikkatā kachigat, kala ningyatchigat chigat kahaiwui eina tunhaowa.

²³Moses eina Aaronna kazip khavai kachonshimli zangda, latluida shoklaga mibingli somi; kala ithumwui Avāwui tekhamatei chi mibing saikorali rāchithei. ²⁴Kala ithumwui Avā khaleipamwui eina mei shokta hanphuttungli rikkatā kachigat kala athao chi chuithathaowa; kala mi saikorana chi theilaga, khamathānna vaoda, mai mashunzanga. ^a a v24 Mei tāda kachigat chi chuithat kahaia ithumwui Avā khalattawui ngahānkāmina — mibingwui vang pheomi khavai sā kahai chi ana miktāli theikhavai khuisang kahaina, athumli awui ngalemli rākhuivāmina.