Pāngmonshi 10

10 ¹Aaronwui naomayara Nadab eina Abihuna ava̱va̱na kachichāwui thaokhong khuida, chiwuitungli mei sharkāda, nganamkaphā sangda, ana athumli mamayāmada makathar mei ithumwui Avāwui mangāli chigata. ²Ithumwui Avāwui mangā eina mei shokta athumli chuitāhaowa, kala athum ithumwui Avāwui mangāli thihaowa. ^a a v2 Miwui khorum khuisang khavai ithumwui Avāwui eina katā kahai mei chi, ara ali ningsharlak maleila nganaikahai mibingli chuitā khavai tāhaira—awui nganaikhui hi runla kathara meila kanina.

³Mosesna Aaronli hānga, "Hi ithumwui Avāna hāngkahaina: 'Iwuili nganaikahaibingwui alungli ina I khalatta kathar chitheira, kala mi saikorawui mangāli ili khayā sāra.'" Aaron kasaikha pama.

⁴Mosesna Aaronwui avāgato Uzzielwui naomayara Mishael eina Elzaphanli hokta, athumli hānga, "Nganaida rālu, nathumwui achinābing chi katharapamwui mangā eina rāmrahwui ayarli khuirālu." ⁵Athum nganaida, Mosesna hāngkahai athishurda, athumwui katuma phahonli tangda rāmrahwui ayarli khuishoka.

⁶Mosesna Aaron kala awui naomayara Eleazar eina Ithamarli hānga, "Nathumwui sam maphakhampaimana kala nathumwui kachon maserkhāpaimana, maningakha nathum thipaishina, kala yarui ashangva̱ katongawuitungli malungkhavāt rāpaishina. Kha nathumwui achinābing, Israelwui shang katonga chi, ithumwui Avāna mei sa̱katā kahaiwui vang chapngachāra. ⁷Kazip khavai kachonshimwui khāmong eina mathuipaimana, maningakha nathum thipaishina; kaja ithumwui Avāwui neokhavai thao nathumtungli lei." Mosesna hāngkahai athishurda athumna sai.

⁸Ithumwui Avāna Aaronli hānga,

⁹"Na kala nawui naomayarabing, kazip khavai kachonshimli nathum zang tharan drakhāra̱ kala kazazam mamangpaimana, maningakha nathum thipaishina. Hi nathumwui thot-thot vāshungda katang makhavaiwui shiyan-chikanna, ¹⁰kathar eina khamakhao, kala makathar eina kathar ngachaili khangatei theikhavai, ¹¹kala Israelwui mibingli, Moses eina ina athumli hāngkahai ain saikora chi nathumna tamchitheishap khavaina."

¹²Mosesna Aaron kala awui shāk kahai naomayara, Eleazar eina Ithamarli hānga, "Ithumwui Avāli meili chigat kahaiwui eina taikahai tharāzāt kachigat chi khuilu, kala hanphutwui pheili khawok makazangmāng shailu, kaja hi tharmathengmeikap kajena. ¹³Chi kathara pamli shailu; hi ithumwui Avāli meili chigat kahaiwui eina nawui yar kala nawui naomayarabingwui yarna, kaja ili hithāda kaso kahaina. ¹⁴Kha na, nawui naomayarabing, kala nawui naongalāva̱bingna khayitchigat kahai asuk kala chigat kahai khaishāng chi kathara pamli shaipaisera; chi Israelwui ningyatshar kachigatwui eina nawui yar kala nawui naomayarabingwui yarna mikahaina. ^b b v14 Khayitchigat hi pāngmonna ayar chi hanphutshong khuivāda ngakhui rāluishit kahai sākahai chānna; chi Vareli chigatna da chitheida, pāngmonwui yarna thāda ngakhui rā ngasakna. ¹⁵Athumna chigat kahai khaishāng kala khayitchigat kahai asuk chi, meili riktā kahai thao kachigatbing ngasoda khuirālaga, ithumwui Avāwui mangāli khayitta khayitchigat sāra; ithumwui Avāna kakaso athishurda, chi na kala nawui naomayarabingwui katang makhavaiwui yarna."

¹⁶Mosesna suihamchigatwui mevā chiwui vang ningsharlak eina ngahāna, kala chi riktā serhairakasā chi theihaowa. Ana Aaronwui shāk kahai naomayara, Eleazar eina Ithamarli malungvātlak eina hānga, ¹⁷"Khisāda nathumna suihamchigat chi kathara pamli mashaimikhala? Hi tharmathengmeikap kajena, chiwui vang eina ithumwui Avāna yarui ashangva̱wui khayonkhamāng khuithuimi khavai kala ithumwui Avāwui mangāli athumwui vang pheomi khavai nathumli mihaowa. ¹⁸Chiwui ashee chi katharapamli makhuizangmana, nathumna ina kaso kahai thāda katharapamli chi shaikhavai kahaina."

¹⁹Aaronna Mosesli hānga, "Yanglu, aja iwui naomayarabingna athumwui suihamchigat kala rikkatā kachigat ithumwui Avāwui mangāli chigata, chithālala hi saikora ili shokkahaina. Aja ina suihamchigat chi shaikahaiakha, chi ithumwui Avāna ningyāng ungrala?"

²⁰Mosesna chi kashā eina, ana ningyāng unglakhaowa.