ክብሪ ኣቦና ይግለፅ

ኣብ ሻምነይቲ መዓልቲ ኣሮን ንባዕሉ መጀመርታ፥ ድሕሪኡ ኸዓ ንህዝቢ፥ ልክዕ ከምቲ ዝተኣዘዞ የቕርብ። ባረኾም ድማ፥ ክብሪ ኣቦና ኸዓ ተገልፀ — ሓዊ ወፂኡ ነቲ መስዋእቲ በልዖ፥ ብዘሎ ህዝቢ ድማ ብሓጐስ ኣእወየ፥ ብገፆምውን ወደቑ።

ምዕራፍ 9።

ኣብ ሻምነይቲ መዓልቲ ድማ ሙሴ ንኣሮንን ንደቁን ንዓበይቲ እስራኤልን ፀውዐ። ንኣሮን ከዓ ከምዙይ በሎ፦ “ምእንቲ ሓጢኣት ዝስዋእ ጣዕዋ ብዕራይን ዝቃፀል መስዋእቲ ዝኸውን ማጕላን፥ ክልቲኦም ጐደሎ ዘይብሎም ንኣኻ ውሰድ፤ ኣብ ቅድሚ ኣቦና ድማ ኣቕርቦም። ንደቂ እስራኤል ድማ ከምዙይ በሎም፦ ምእንቲ ሓጢኣት ዝስዋእ ዲበላ፥ ዝቃፀል መስዋእቲ ዝኸውን ከዓ ዓመት ዝገበረ ጣዕዋን ጡቦት በጊዕን፥ ጐደሎ ዘይብሎም ውሰዱ፤ ኣብ ቅድሚ ኣቦና ክትስውእዎ፥ ንመስዋእቲ ምስጋና ዝኾኑ ብዕራይን ማጕላን፥ ብዘይቲ ዝተለወሰ መስዋእቲ እኽልን ድማ ውሰዱ፤ ሎሚ ኣቦና ክግለፀልኩም እዩ እሞ።”

ነቲ ሙሴ ዝኣዘዞ ድማ ናብ ኣፍ ደገ እቲ መራኸቢ ድንኳን ኣምፅእዎ፤ ኵሉ እቲ ማሕበር ከዓ ቀሪቡ ኣብ ቅድሚ ኣቦና ደው በለ። ሙሴ ኸዓ “ክብሪ ኣቦና ምእንቲ ክግለፀልኩም፥ ነቲ ኣቦና ዝኣዘዞ ግበሩ” በለ። ሙሴ ንኣሮን ከምዙይ በሎ፦ “ናብ መሰውኢ ቅረብ፤ ናትካ ምእንቲ ሓጢኣት ዝስዋእ መስዋእትን ዝቃፀል መስዋእትን ኣቕሪብካ ንባዕልኻን ነቲ ህዝብን ኣስተስሪ። ነቲ ናይ ህዝቢ መስዋእቲ ኣቕሪብካ ኸዓ፥ ከምቲ ኣቦና ዝኣዘዞ፥ ኣስተስርየሎም።”

ኣሮን ድማ ናብ መሰውኢ ቀሪቡ፥ ነቲ ንባዕሉ ዝኸውን፥ ምእንቲ ሓጢኣት ዝስዋእ ጣዕዋ ሓረዶ። ደቂ ኣሮን ከዓ ነቲ ደም ኣምፅኡሉ፤ ንሱ ድማ ኣፃብዕቱ ኣብኡ ጠሚዑ፥ ኣብ ኣቕርንቲ መሰውኢ ገበሮ፤ ነቲ ዝተረፈ ደም ከዓ ኣብ እግሪ መሰውኢ ኣፍሰሶ። ነቲ ስብሕን ዅላሊትን ቃንጡጥ ከብድን ናይቲ ምእንቲ ሓጢኣት ዝስዋእ ግና፥ ከምቲ ኣቦና ንሙሴ ዝኣዘዞ፥ ኣብ ልዕሊ መሰውኢ ኣቃፀሎ። ነቲ ስጋን ቘርበትን ከዓ ኣብ ወፃኢ እቲ ሰፈር ብሓዊ ኣቃፀሎ። ነቲ ዝቃፀል መስዋእቲ ድማ ሓረዶ። ደቂ ኣሮን ከዓ ነቲ ደም ኣረከብዎ፤ ንሱ ድማ ኣብቲ መሰውኢ ብዅሉ ወገኑ ነፀጎ። ነቲ ዝቃፀል መስዋእቲ በብኽፍሉ ምስ ርእሱ ኣረከብዎ፤ ንሱ ድማ ኣብ ልዕሊ መሰውኢ ኣቃፀሎ። ነቲ ኣምዑትን ኣእጋርን ድማ ሓፂቡ፥ ምስቲ ዝቃፀል መስዋእቲ ኣብ ልዕሊ መሰውኢ ኣቃፀሎ። ነቲ ናይ ህዝቢ መስዋእቲ ድማ ኣቕረበ፤ ነቲ ምእንቲ ሓጢኣቶም ዝስዋእ ዲበላ ወሲዱ ሓረዶ፤ ከምቲ ቀዳማይ ከዓ ምእንቲ ሓጢኣት ኣቕረቦ። ነቲ ዝቃፀል መስዋእቲ ድማ ኣቕሪቡ፥ ከምቲ ስሩዕ ኣቕረቦ። ነቲ መስዋእቲ እኽሊ ድማ ኣምፂኡ፥ ብሓደ ኢዱ ዓዂቱ ኣልዒሉ፥ ብዘይ እቲ ናይ ንግሆ ዝቃፀል መስዋእቲ፥ ኣብ ልዕሊ መሰውኢ ኣቃፀሎ። ነቲ ናይ ህዝቢ መስዋእቲ ምስጋና ዝኾኑ ብዕራይን ማጕላን ድማ ሓረዶም፤ ደቂ ኣሮን ከዓ ነቲ ደም ኣምፅኡሉ፥ ንሱ ድማ ኣብቲ መሰውኢ ብዅሉ ወገኑ ነፀጎ። ናይቲ ብዕራይን ማጕላን ስብሒ ግና፥ ሕልሕሉን ነቲ ዝጕልብብ ስብሕን ዅላሊትን ቃንጡጥ ከብድን፥ ነቲ ስብሒ ኣብ ልዕሊ እቲ ሓኸለ ኣንበርዎ፤ ንሱ ድማ ነቲ ስብሒ ኣብ ልዕሊ መሰውኢ ኣቃፀሎ። ኣሮን ግና ነቲ ሓኸለን የማነይቲ እግርን፥ ከምቲ ሙሴ ዝኣዘዞ፥ ኣብ ቅድሚ ኣቦና እናወዝወዘ ዝቐርብ መስዋእቲ ገይሩ ወፈዮ። ኣሮን ድማ ኣእዳዉ ናብቲ ህዝቢ ኣልዒሉ ባረኾም፤ ነቲ ምእንቲ ሓጢኣት ዝስዋእ መስዋእትን ዝቃፀል መስዋእትን መስዋእቲ ምስጋናን ኣቕሪቡ ድማ ወረደ።

ሙሴን ኣሮንን ድማ ናብ መራኸቢ ድንኳን ኣተዉ፤ ወፂኦም ከዓ ነቲ ህዝቢ ባረኽዎ፤ ክብሪ ኣቦና ድማ ንዅሉ እቲ ህዝቢ ተገለፀሉ። ካብ ቅድሚ ኣቦና ድማ ሓዊ ወፀ፤ ነቲ ኣብ ልዕሊ መሰውኢ ዝነበረ ዝቃፀል መስዋእትን ስብሕን ከዓ በልዖ። ኵሉ እቲ ህዝቢ ድማ ርእዩ፥ ብሓጐስ ዓለለ፥ ብገፆም ከዓ ተደፍኡ። ^a