Amar Pitri laga Mahima Dikhai Dise

Aath din te Aaron pora age nijor nimite aru tar pichete manuh khan nimite bhet dise, kineka hukum dise thik oinisena. Tai taikhan ke ashirbad diye, aru hamar Pitri laga mohima dikhai diye — jui ulai kene bhet ke khai loi, aru sob manuh khan khushi pora chilai uthe aru mati te mukh nichete pori jai.

Adhyay 9.

Aath-ta din te Moses pora Aaron aru tar laga putro khan aru Israel laga bura manuh khan ke matise. Moses pora Aaron ke koise, “Tumi nijor nimite paap laga boli hobole ekta mota bachha goru, aru jolai diya boli hobole ekta mer-mota, duita bhi eku golti nathaka, loi kene amar Pitri laga age te boli dibi. Israel manuh khan ke kobi: paap laga boli nimite ekta mota saguli, aru jolai diya boli nimite ek-saal pura ekta bachha goru aru ekta mer-bachha, eku golti nathaka, loi lobi. aru shanti laga boli nimite ekta bolod aru ekta mer, amar Pitri laga age te boli dibole, aru tel logot milai diya anaj laga boli bhi; kilemane aji amar Pitri tumikhan ke dikhai dibo.”

Moses pora hukum diya saman khan milon-tambu laga dorja usor te anise; aru guta sabha usor te ahhi kene amar Pitri laga age te khara hoise. Moses pora koise, “Amar Pitri pora hukum diya kaam koribi, titia amar Pitri laga mahima tumikhan ke dikhai dibo.” Moses pora Aaron ke koise, “Bedi usor te ahhibi. Tumi laga paap laga boli aru jolai diya boli dibi, aru nijor nimite aru manuh khan nimite prayaschit koribi. Manuh khan laga boli bhi dibi aru tarkhan nimite prayaschit koribi, jineka amar Pitri pora hukum dise.”

Titia Aaron bedi usor te ahhi kene, nijor nimite thaka paap laga boli laga bachha goru ke mari dise. Aaron laga putro khan pora tar ke khoon anise; aru tai nijor anguli eitu te dubai kene bedi laga seng khan te lagai dise, aru bachi juwa khoon tu bedi laga gorai te hali dise. Kintu paap laga boli laga charbi, gurda khan, aru kaleja laga tukra tu bedi te jolai dise, jineka amar Pitri pora Moses ke hukum dise. Aru gau-mangso aru chamra tu tambu-chaoni laga bahar te jui pora jolai dise. Tai jolai diya boli ke mari dise. Aaron laga putro khan pora tar ke khoon dise, aru tai eitu bedi laga char-phale chitikai dise. Tarkhan pora tar ke jolai diya boli tu tukra-tukra kori kene, matha logot, dise, aru tai eitu khan bedi te jolai dise. Tai aantha aru theng khan dhui kene, jolai diya boli logot bedi te jolai dise. Titia tai manuh khan laga boli anise: tarkhan laga paap laga boli laga saguli ke loi kene mari dise, aru poila laga nisena paap nimite boli dise. Tai jolai diya boli anise aru niyom hisab te boli dise. Tai anaj laga boli anise, aru ek-mutti loi kene bedi te jolai dise, phojur laga jolai diya boli logote. Tai manuh khan laga shanti laga boli nimite bolod aru mer ke mari dise, aru Aaron laga putro khan pora tar ke khoon anise, juntu tai bedi laga char-phale chitikai dise. Kintu bolod aru mer laga charbi: charbi thaka nejor, bhitor dhaki thaka charbi, gurda khan, aru kaleja laga lamba tukra, eitu charbi khan tu chati khan laga upra te rakhise, aru tai charbi khan tu bedi te jolai dise. Kintu Aaron pora chati khan aru dyna juwa theng-upor tu amar Pitri laga age te hilai diya boli hisab te hilai dise, jineka Moses pora hukum disele. Aaron pora manuh khan phale tar laga hath uthai kene tarkhan ke asirbad dise, titia paap laga boli, jolai diya boli, aru shanti laga boli diya pora nichete namise.

Moses aru Aaron milon-tambu bhitor te ghusi kene, bahar ulai ahhi kene, manuh khan ke asirbad dise; aru amar Pitri laga mahima sob manuh khan ke dikhai dise. Amar Pitri laga age pora jui ulai ahhi kene bedi te thaka jolai diya boli aru charbi tu khai loise. Sob manuh khan eitu dikhi kene, khushi pora hala korise, aru mukh niche kori kene giri porise. ^a