Ani Pa Om Sung Lianga Pi Swaknu
Ani Pa om phaangkriang na mi nun ding loh lo thang nge: chakrin manga tanu saan thangnu chwantok mi nunna kani bathin om balo brumza lousu rwe, atiga kamanu hung ongnu mi khang na ha ding chak make. Mannu khatna sa kataknu kaong riak kani hweini nge; Jisu na kong khat pi thangluga, kalian ongnu ga swak tonu danga nge diga rinne. Mik panu manpa pani, chong maak ongro diga rin thangnu kaan bi, rakan pi pao rwe, atiga bani ding ngaisu thang rwe.
20 1“Balangbe ani Pa om krwang talei ga, baom drakha anqwat lang chwantok mi saan langna louthwan khwan swaknu taram puba khat danga nge. 2Maanna chwantok mi nun khou kani khat lang denari khat pi lang za thangluga baom drakha anqwat bi bani ding bathan swak rwe. 3Zingpha chakrin inthum dat pi maan swakluga keithian bi takaatnu ga dung ongnu mi katei ding mu rwe. 4Maanna bani khou rinne, ‘Nani le drakha anqwat bi se ngo; ririak ga eina nani khou pi thangne.’ Atiga bani se drwe. 5Maan chakrin karuk tanu le chakrin kaqwa tanu le dat pi swak latluga hadanga le to rwe. 6Chakrin manga tanu dat pi maan swakluga mi katei habei ga dung ongnu ding mu rwe. Maanna bani khou rinne, ‘Nani kani bathin takaatnu ga abeiya pa-aam toga dung ongnubo?’”
7“Banina katake, ‘Ani ding tudannuna saan make.’ Maanna rinne, ‘Nani le drakha anqwat bi se ngo.’
8“Nainem hung tangnu kaan bi, drakha anqwat om bapubana baom chwan sian thangnu mi khou rinne, ‘Chwantok mi nun ding kouluga, bakaanu riak pina bakamanu riak tanga bani balo man pi thangro.’ 9Atiga chakrin manga tanu dat pi saan thang damnu mi nun hungnu kaan bi, bani pakhat khatna denari khat lousu rwe. 10Bakamanu nun hungnu kaan bi, banina inkuga lousulune diga baning ngaake, atiyeda bani pakhat khatna le denari khat za lousu rwe. 11Haba lousunu kaan bi banina taram puba lang bi tu tu tam tam thou rwe, 12banina rinne, ‘Hei bakaanu nun chakrin khatza chwan to ngaake, atiyeda kani bathin om potrit khatle lumik kanatnu lounu ani le diga nangna bani ding khatcha to thang rwe.’
13“Maanna bani lak pi khat khou katake, ‘Abaanpa, eina nang ding koi pi to make. Nang eile diga denari khat lang za thang maknu makpo? 14Naom ga louluga se ngo. Hei bakaanu chwantok mi khou le nang khou pinu danga pi thang lang eina nwamme. 15Aom ga eina nwamnu ga to lang eina za makpo? Haga danga, eina sung lianga pi swak briakpina nang antiam thounubo? 16Hadanga bakaanu nun ga bakamanu to lune, atiga bakamanu nun ga bakaanu to lune.”
Jisu na Cross Om Chong Kama Rinne
17Jisu na Jerusalem la ka bacham lang hung bi, Maanna potroi somkhatni ding sek la kaiga lampui bi bani khou rinne,
18“Phaang ngo, ani Jerusalem la ka bacham nge, atiga Misa Sa Kapaisa ding takopuba rwan le chongtan bachuthangnu rwan kut pi pi swaklune, banina Bating thinu lang chong kasemlune, 19atiga Bating kiam lang, bwei lang khatle cross pi athat lang Gentile rwan kut pi pi swaklune—atiga Maan ni thum ni ring thou latlune.”
Bataknu Liannuba Chwanlaang Tonu Gaye
20Habei ga Zebedee sa kapaisa rwan nu basa rwan le diga Bakim bi hungluga, Bakhou pa-aam khat ni lang kekhok de rwe.
21Maanna bakhou rinne, “Nang pa-aam nwamnubo?” Mannuna katake, “Nang om krwang talei bi asa kapaisa pat ni, khat Nakut inchang la khatle khat Nakut inrwei la dung ding ngo diga rinno.”
22Atiyeda Jisu na katake, “Nani pa-aam ninnuba nanina thei make. Eina nong lang damnu tongkhan ding nani za nonggabo?” Banina katake, “Ani za nge.”
23Maanna rinne, “Nani Atongkhan ding nonglune, atiyeda Akut inchang le Akut inrwei la dung ongnu ga pi thang lang Aom make—haga Apa na tudannu lang chamdaan thang damnu nun om gaye.”
24Potroi som-nu nunna haba ngaisunu kaan bi, bani unao pat ni lang bi balung pwan rwe.
25Jisu na bani ding kouluga rinne, “Gentile rwan om bapuba rwanna bani lu chung bi kai thang nge, khatle bani om kanatnu mi rwanna bani lu chung bi ngam choinu amme diga nanina theiye. 26Nani lak pi hadanga ong mako. Atiyeda tudannu nani lak pi lian lang nwamnu maan ga nani om chwanlaang tonu mi to ding ngo, 27khatle tudannu nani lak pi bakama to lang nwamnu maan ga nani om sal to ding ngo, 28Hadanga Misa Sa Kapaisa gana Bating chwanlaang pi to thang langna hungnu make atiyeda chwanlaang to thang langna khatle mi taswang khak lang ran swak thang lang Bakum ding bathan swak thangnu man toga pi swak thang langna hungnuwe.”
Mik Chonu Mi Pat Ni Mik Lousu Rwe
29Atiga bani Jericho bina swak hung bi, mi khang pui khatna Banung sui se drwe. 30Lampui paan bi badungnu mik chonu mi pat ni na Jisu na se phao swak nge diga ngaisunu kaan bi paoga rinne, “Pukraangba, David Sa Kapaisa, ani phaangkriang thang ngo!” a a v30 "David Sa Kapaisa" diga rinnuba, David om krwang laang pina hunglune diga bathan damnu krwang lang Jihudi rwanna theinu takhwangnu meng khat ngaake. 31Mi khangna bani ding thiap thiap ong lang twei rwe; atiyeda banina pao rakan ranga rinne, “Pukraangba, David Sa Kapaisa, ani phaangkriang thang ngo!”
32Atiga Jisu na dungluga bani ding kouga rinne, “Nani lang Eina pa-aam to thang lang nani nwamnubo?”
33Banina Bakhou katake, “Pukraangba, ani mik ka lat swak ding ngo.”
34Atiga Jisu na bani ding kriangnuna sip briakpina, bani mik ding namluga, haba kahan bi gana bani mik mu lat rwe khatle Banung sui se drwe.